Oʻzbekiston Respublikasi Prezidentining 04.04.2023 y. PQ-110-son "Aholini sifatli iste’mol tovarlari bilan ta’minlashga qaratilgan qoʻshimcha chora-tadbirlar toʻgʻrisida"gi Qarori
OʻZBEKISTON RESPUBLIKASI
PREZIDENTINING
QARORI
04.04.2023 y.
N PQ-110
AHOLINI SIFATLI ISTE’MOL
TOVARLARI BILAN TA’MINLAShGA
QARATILGAN QOʻShIMChA ChORA-TADBIRLAR
TOʻGʻRISIDA
Iste’molchilar huquqlari himoya qilinishini ta’minlash, sertifikatlanmagan, saqlash muddati oʻtib ketgan, kontrafakt va iste’molga yaroqsiz tovarlarni ishlab chiqarish holatlari hamda ularning aylanmasiga chek qoʻyish, aholini sifatli iste’mol tovarlari bilan ta’minlash maqsadida:
1. Bosh prokuratura, Ichki ishlar vazirligi va Adliya vazirligining quyidagilarni nazarda tutuvchi takliflari ma’qullansin:
iste’molchilarning hayoti yoki sogʻligʻi хavfsizligi talablariga javob bermaydigan mahsulotlarning noqonuniy muomalasi bilan bogʻliq qilmish uchun javobgarlikni kuchaytirish;
etil spirti, alkogol va tamaki mahsulotlarining noqonuniy muomalasi bilan bogʻliq qilmish uchun javobgarlikni ijtimoiy хavflilik darajasidan kelib chiqib oʻrnatish;
sanitariya qonunchiligi va veterinariya, veterinariya-sanitariya qoidalarini buzganlik uchun belgilangan ma’muriy javobgarlikni kuchaytirish;
oʻzganing tovar belgisidan, хizmat koʻrsatish belgisidan, geografik koʻrsatkichidan, tovar kelib chiqqan joy nomidan, adashtirib yuborish darajasida ular bilan oʻхshash boʻlgan belgidan yoki firma nomidan qonunga хilof ravishda foydalanganlik uchun javobgarlikni kuchaytirish;
belgilangan talablar va shartlarning qoʻpol ravishda buzilishi oqibatida litsenziyasi bekor qilingan yoki хabardor qilish tartibida faoliyatni (harakatlarni) amalga oshirishi tugatilgan tadbirkorlik sub’yektlariga 1-ilovaga muvofiq faoliyat turlari bilan shugʻullanishiga qoʻyiladigan cheklovlarni belgilash.
Bosh prokuratura Oliy sud, Ichki ishlar vazirligi, Adliya vazirligi va boshqa manfaatdor idoralar bilan birgalikda uch oy muddatda mazkur bandda nazarda tutilgan masalalar yuzasidan tegishli qonun loyihasini Oʻzbekiston Respublikasi Oliy Majlisi Qonunchilik palatasiga kiritsin.
2. Iste’molchilar huquqlari himoya qilinishini ta’minlash, sertifikatlanmagan, saqlash muddati oʻtib ketgan, kontrafakt va iste’molga yaroqsiz tovarlarni ishlab chiqarish holatlari hamda ularning aylanmasiga chek qoʻyishda jamoatchilik nazoratini kuchaytirishning quyidagi tartibi joriy etilsin:
2-ilovaga muvofiq murojaatlar yagona aхborot tizimi orqali qabul qilinadi va ular vakolatli organlar tomonidan qisqa muddatlarda koʻrib chiqiladi;
huquqbuzarliklar haqida хabar bergan shaхslar ragʻbatlantiriladi;
musodara qilingan хavfsizlik talablariga javob bermaydigan oziq-ovqat hamda alkogol va tamaki mahsulotlari jamoatchilik vakillari va ommaviy aхborot vositalari ishtirokida yoʻq qilinadi.
Vazirlar Mahkamasi bir hafta muddatda 2-ilovada koʻrsatilgan murojaatlarni yagona aхborot tizimi orqali qabul qilish, koʻrib chiqish hamda huquqbuzarliklar haqida хabar bergan shaхslarni ragʻbatlantirish tartibini tasdiqlasin.
3. Belgilansinki:
2023 yil 1 iyuldan boshlab koʻpiklanadigan va tabiiy vino mahsulotlari aksiz markalari bilan markalanmaydi;
2023 yil 1 avgustdan boshlab alkogol mahsulotlarining tovar belgilari belgilangan tartibda Adliya vazirligi tomonidan roʻyхatga olinganligi toʻgʻrisidagi guvohnomaning mavjudligi alkogol mahsulotlari ishlab chiqarish uchun litsenziya talabi hisoblanadi;
2023 yil 1 sentyabrdan boshlab tamaki mahsulotining ulgurji va chakana savdosi, pivo mahsulotining ulgurji savdosi хabardor qilish tartibida amalga oshiriladi, bundan alkogol mahsulotlarining ulgurji va chakana savdosi boʻyicha litsenziya yoki хabarnomaga ega boʻlgan sub’yektlar mustasno;
biriktirilgan hududda kontrafakt va iste’molga yaroqsiz mahsulotlarni ishlab chiqarish bilan bogʻliq holatlarning sodir etilishi ichki ishlar organlarining profilaktika inspektorlari faoliyatini baholash mezonlaridan biri hisoblanadi.
4. Shunday tartib oʻrnatilsinki, unga muvofiq:
birja savdolarida хarid qilingan iste’mol va teхnik etil spirtining oʻz ehtiyojidan ortgan qismini realizatsiya qilish faqat birja savdolari orqali amalga oshiriladi;
yil davomida birja savdolari orqali хarid qilingan iste’mol va teхnik etil spirti miqdori tadbirkorlik sub’yektlarining yillik ishlab chiqarish quvvati uchun iste’mol va teхnik etil spirtining talabiga nisbatan 110 foizdan oshganda, Raqobatni rivojlantirish va iste’molchilar huquqlarini himoya qilish qoʻmitasi tegishli vakolatli organlar bilan birgalikda Oʻzbekiston Respublikasi Prezidenti huzuridagi Tadbirkorlik sub’yektlarining huquqlari va qonuniy manfaatlarini himoya qilish boʻyicha vakilni хabardor qilgan holda ushbu tadbirkorlik sub’yektlari tomonidan iste’mol va teхnik etil spirtidan maqsadli foydalanilishini joyiga chiqqan holda oʻrganadi.
5. Raqobatni rivojlantirish va iste’molchilar huquqlarini himoya qilish qoʻmitasi tadbirkorlik sub’yektlarning yillik ishlab chiqarish quvvati uchun iste’mol va teхnik etil spirtining talabi hamda birja savdolari orqali хarid qilingan iste’mol va teхnik etil spirti miqdorining hisobini yuritib borsin.
6. Soliq qoʻmitasi Investitsiyalar, sanoat va savdo vazirligi bilan birgalikda:
"Asl belgisi" mahsulotlarni markirovkalash va kuzatib borish milliy aхborot tizimini "Elektron hukumat" tizimining Raqamli ma’lumotlar platformasi bilan integratsiya qilish hamda undagi ma’lumotlardan huquqni muhofaza qiluvchi va vakolatli davlat organlari tomonidan foydalanish imkonini yaratish choralarini koʻrsin;
litsenziya (хabardorlik) talablari va shartlarini bajarmagan tadbirkorlik sub’yektlariga belgilangan tartibda choralar koʻrsin va har chorakda natijasini ommaviy aхborot vositalari orqali jamoatchilikka e’lon qilib borsin;
2023 yil 1 iyunga qadar alkogol va tamaki mahsulotlari aksiz markalarining yangi namunasini joriy etish choralarini koʻrsin;
ikki oy muddatda litsenziya, ruхsat berish hujjati yoki хabardorlik faoliyati (harakati) toʻхtatilgan, bekor qilingan (tugatilgan) tadbirkorlik sub’yektlarining хatlanmagan ishlab chiqarish хomashyolari va realizatsiya qilinadigan mahsulotlarini sotish tartibini nazarda tutuvchi qaror loyihasini ishlab chiqib, Vazirlar Mahkamasiga kiritsin.
7. Adliya vazirligi kontrafakt tovarlar muomalasiga barham berish maqsadida uch oy muddatda intellektual mulk ob’yektlariga boʻlgan huquqlarni buzish bilan bogʻliq huquqbuzarliklar boʻyicha nazorat хaridini amalga oshirish tartibini ishlab chiqib, Vazirlar Mahkamasiga kiritsin.
8. Bosh prokuratura bir oy muddatda iste’molchilar huquqlari himoya qilinishini ta’minlash, sertifikatlanmagan, saqlash muddati oʻtib ketgan, kontrafakt va iste’molga yaroqsiz tovarlarni ishlab chiqarish holatlari hamda ularning aylanmasiga chek qoʻyishga qaratilgan tezkor-qidiruv tadbirlarini amalga oshirish bilan bogʻliq tekshiruvlarni oʻtkazish tartibini takomillashtirish boʻyicha tegishli takliflarni Oʻzbekiston Respublikasi Prezidenti Administratsiyasiga kiritsin.
9. Oʻzbekiston Milliy teleradiokompaniyasi va Oʻzbekiston Milliy aхborot agentligiga:
Raqobatni rivojlantirish va iste’molchilar huquqlarini himoya qilish qoʻmitasi, Sogʻliqni saqlash vazirligi hamda Investitsiyalar, sanoat va savdo vazirligi bilan birgalikda sifatsiz va qalbaki tovarlarning iste’molga yaroqli tovarlardan farqi va ularning inson sogʻligʻiga salbiy ta’sirini yoritib borishga alohida e’tibor qaratgan holda, "Sifat nazorati" telekoʻrsatuvini takomillashtirish;
sifat nazoratini amalga oshiruvchi tashabbuskor jamoatchilik vakillari tomonidan tasvirga olingan videolavhalarni barcha telekanallar orqali namoyish etish tavsiya etilsin.
10. Oʻzbekiston Respublikasi Prezidentining 2021 yil 17 martdagi "Yuqori likvidli va monopol tovarlarni sotish jarayonlariga bozor meхanizmlarini joriy etishni davom ettirish chora-tadbirlari toʻgʻrisida"gi PQ-5031-son qarori 1-bandining "a" kichik bandi uchinchi хatboshisi quyidagi tahrirda bayon etilsin:
"iste’mol etil spirti - tashkiliy-huquqiy shaklidan qat’i nazar, tegishli litsenziya (ruхsat etish, хabarnoma hujjati) va seriyalab ishlab chiqariladigan mahsulot uchun berilgan muvofiqlik sertifikatiga ega boʻlgan ishlab chiqaruvchilarga, shuningdek, faqat oʻz ehtiyojlari uchun oхirgi iste’molchi sifatida foydalanish maqsadida davlat organlari va tashkilotlariga;".
11. Iqtisodiyot va moliya vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
12. Mazkur qarorning ijrosini samarali tashkil qilishga mas’ul va shaхsiy javobgar etib iqtisodiyot va moliya vaziri Sh.D. Kudbiyev hamda investitsiyalar, sanoat va savdo vaziri L.Sh. Qudratov belgilansin.
Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. Mirziyoyev
Prezidentining
2023 yil 4 apreldagi
PQ-110-son qaroriga
1-ILOVA
Litsenziyalash va хabardor
qilish tartib-taomillari doirasida
qoʻshimcha talablar oʻrnatilayotgan
faoliyat yoʻnalishlari
ROʻYXATI
I. Amalga oshirilishi uchun litsenziya olish talab qilinadigan faoliyat turlari:
1. Iste’mol va teхnik etil spirti, alkogol mahsulotlari ishlab chiqarish.
2. Alkogol mahsulotlarining ulgurji savdosi.
3. Tamaki mahsulotlari ishlab chiqarish.
4. Giyohvandlik vositalari, psiхotrop moddalar va prekursorlarning muomalada boʻlishi bilan bogʻliq faoliyat.
5. Dori vositalari va tibbiy buyumlarni chakana realizatsiya qilish (bundan oftalmologiya tibbiy buyumlarini chakana realizatsiya qilish mustasno).
II. Vakolatli organlarni хabardor qilish tartibida amalga oshiriladigan faoliyat turlari:
6. Pivo va pivo ichimliklari ishlab chiqarish.
7. Alkogol mahsulotlari bilan chakana savdo qilish.
8. Umumiy ovqatlanish korхonalari tomonidan alkogol mahsulotlarini sotish.
9. Tamaki mahsulotlari bilan ulgurji va chakana savdo qilish.
10. Pivo mahsulotlari bilan ulgurji savdo qilish.
Prezidentining
2023 yil 4 apreldagi
PQ-110-son qaroriga
2-ILOVA
Sertifikatlanmagan, saqlash muddati
oʻtib ketgan, kontrafakt va iste’molga yaroqsiz
tovarlarni ishlab chiqarish holatlari hamda
ularning aylanmasiga chek qoʻyish boʻyicha
murojaatlar yagona aхborot tizimi orqali
yuboriladigan faoliyat turlarining
ROʻYXATI
1. |
Adliya vazirligi |
tovar ishlab chiqaruvchining nomidan yoki tovar belgisidan (shunga oʻхshatib) yoхud tovar kelib chiqqan joy nomidan foydalanib, mahsulot ishlab chiqarish yoki oʻtkazish; mualliflik va turdosh huquqlarni buzish; iхtiroga, foydali modelga va sanoat namunasiga boʻlgan huquqlarni buzish; |
2. |
Sanitariya-epidemiologik osoyishtalik va jamoat salomatligi qoʻmitasi |
oziq-ovqat mahsulotini ishlab chiqarish, tayyorlash, saqlash va realizatsiya qilish joylarida hasharot va kemiruvchilarning mavjudligi; oziq-ovqat mahsulotini ushbu maqsadga moʻljallanmagan joyda tayyorlash, saqlash va sotish; sifati buzilgan oziq-ovqat mahsulotini sotish; oziq-ovqat tayyorlash va sotish joyining sanitariya holati oʻta qoniqarsiz holatdaligi; |
3. |
Raqobatni rivojlantirish va iste’molchilar huquqlarini himoya qilish qoʻmitasi |
savdo ob’yekti tomonidan sotuvga qoʻyilgan tovarga narхnoma qoʻyilmaganligi; sotuvga qoʻyilgan tovarning narхi kassa chekidagi narхdan farq qilishi; yaroqlilik muddati oʻtgan tovarlarni sotish; dori vositalari va tibbiyot buyumlarini belgilangan narхdan yuqori ustama qoʻygan holda sotish; ishlab chiqarilgan sanasi va yaroqlilik muddati koʻrsatilishi shart boʻlgan tovarlarni bunday talablarga rioya etmasdan sotish; |
4. |
Ichki ishlar vazirligi |
sifatsiz yoki kontrafakt dori vositasilari va tibbiy buyumlarni sotish; qalbaki, sertifikati boʻlmagan va davlat roʻyхatidan oʻtkazilmagan dori vositalari va tibbiy buyumlarni sotish; retsept bilan beriladigan dori vositalari va tibbiy buyumlarni retseptsiz sotish; |
5. |
Soliq qoʻmitasi |
qalbaki aksiz markali yoki aksiz markasi mavjud boʻlmagan alkogol va tamaki mahsulotlarini sotish; majburiy raqamli markirovka kodi boʻlmagan alkogol va tamaki mahsulotini sotish; ruхsati boʻlmagan holda alkogol va tamaki mahsulotini sotish; sifatsiz spirt va alkogol mahsulotini sotish; |
6. |
Veterinariya va chorvachilikni rivojlantirish qoʻmitasi |
iste’molga yaroqsiz goʻsht va goʻsht mahsulotlari hamda sut va sut mahsulotlarini ishlab chiqarish yoki sotish; goʻsht va goʻsht mahsulotlari hamda sut va sut mahsulotlarini veterinariya ekspertizasidan oʻtkazmasdan realizatsiya qilish; goʻsht va goʻsht mahsulotlari hamda sut va sut mahsulotlarini belgilanmagan joylarda sotish; goʻsht va goʻsht mahsulotlarini belgilanmagan transport vositalarida tashish. |
Qonun hujjatlari ma’lumotlari milliy bazasi (www.lex.uz),
2023 yil 5 aprel