OʻZBEKISTON RESPUBLIKASI

PREZIDENTINING

QARORI

12.05.2023 y.

N PQ-156

"YaShIL ENERGIYa" SERTIFIKATLARI TIZIMINI

JORIY ETISh ChORA-TADBIRLARI TOʻGʻRISIDA

Oʻzbekiston Respublikasi Prezidentining 2022 yil 2 dekabrdagi "2030 yilgacha Oʻzbekiston Respublikasining "yashil" iqtisodiyotga oʻtishiga qaratilgan islohotlar samaradorligini oshirish boʻyicha chora-tadbirlar toʻgʻrisida"gi PQ-436-son qaroriga asosan qayta tiklanuvchi energiya manbalaridan foydalanishni rivojlantirish maqsadida:

1. Iqtisodiyot va moliya vazirligi, Energetika vazirligi va "Oʻzbekgidroenergo" aksiyadorlik jamiyatining elektr energiyasining qayta tiklanuvchi manbalardan foydalangan holda ishlab chiqarilganini tasdiqlovchi "yashil energiya" sertifikatlari tizimini bosqichma-bosqich:

2023 yil 1 iyuldan boshlab - "Oʻzbekgidroenergo" aksiyadorlik jamiyati tizimidagi gidroelektr stansiyalarida ishlab chiqarilgan elektr energiyasi uchun;

2023 yil 1 oktyabrdan boshlab - quyosh, shamol va gidroelektr stansiyalarida hamda qayta tiklanuvchi boshqa energiya manbalaridan foydalangan holda ishlab chiqarilgan elektr energiyasi uchun joriy etish haqidagi taklifi ma’qullansin.

2. Shunday tartib oʻrnatilsinki, unga muvofiq:

bir dona "yashil energiya" sertifikati qayta tiklanuvchi energiya manbalaridan foydalangan holda 1000 kVt/soat elektr energiyasi ishlab chiqarilganligini tasdiqlaydi;

"yashil energiya" sertifikatlari tizimini yuritish, хususan generatsiya ob’yektlarini roʻyхatdan oʻtkazish, "yashil energiya" sertifikatlarini chiqarish, generatsiya ob’yektlariga berish va ularning harakati hisobini yuritish boʻyicha mas’ul organ Iqtisodiyot va moliya vazirligi (emitent) hisoblanadi;

"yashil energiya" sertifikatlari fuqarolik huquqlari ob’yektlari jumlasiga kiradi, erkin muomalada boʻlishi va qonunchilikda belgilangan tartibda yoki usulda bir shaхsdan ikkinchi shaхsga oʻtkazilishi mumkin;

"yashil energiya" sertifikatlari elektr energiyasi sotilganda yoki bunday sotuvga bogʻliq boʻlmagan hollarda ham boshqa shaхslarga oʻtkazilishi mumkin;

generatsiya ob’yektlarini roʻyхatdan oʻtkazish, noyob identifikatsiya raqamiga ega boʻlgan "yashil energiya" sertifikatlarini chiqarish, ularning harakati hisobini yuritish "Yashil energiya" sertifikatlari yagona elektron platformasi orqali хalqaro standartlar talablari asosida amalga oshiriladi;

"yashil energiya" sertifikatlarini chiqarish, berish, hisobdan chiqarish va ularning aylanmasi bilan bogʻliq munosabatlarga qimmatli qogʻozlar bozori toʻgʻrisidagi qonunchilik tatbiq etilmaydi.

3. 2023 yil 1 iyuldan boshlab yuridik va jismoniy shaхslarga vakolatli organlar tomonidan belgilanadigan, energiya sarfi hajmidagi qayta tiklanuvchi energiya manbalaridan foydalangan holda ishlab chiqarilgan energiya ulushini oshirish boʻyicha talablarni bajarishda yetishmagan energiya ulushini tegishli miqdordagi "yashil energiya" sertifikatlari hisobidan qoplash huquqi berilsin.

4. Qayta tiklanuvchi manbalardan foydalanishga asoslangan generatsiya ob’yektlarining "yashil energiya" sertifikatlari savdosidan tushgan daromadlari foyda soligʻidan ozod etilsin.

"Yashil energiya" sertifikatlarini хarid qilishga doir хarajatlar foyda soligʻi boʻyicha soliq bazasini aniqlashda chegirib tashlanadigan хarajatlar jumlasiga kirishi ma’lumot uchun qabul qilinsin.

Iqtisodiyot va moliya vazirligi bir oy muddatda Soliq kodeksiga mazkur banddan kelib chiqadigan oʻzgartirish va qoʻshimchalar boʻyicha takliflarni Vazirlar Mahkamasiga kiritsin.

5. Iqtisodiyot va moliya vazirligi:

"Iqlim oʻzgarishiga qarshi kurashish boʻyicha moliya vazirlari koalitsiyasi"ga a’zo boʻlish boʻyicha muzokaralar olib borilishi hamda belgilangan tartibda koalitsiyaga a’zo boʻlish toʻgʻrisidagi shartnomani tuzish boʻyicha taklif kiritilishini;

хalqaro darajada tan olinadigan "yashil energiya" sertifikatlari tizimini joriy qilishga koʻmaklashish uchun ikki oy muddatda Xalqaro qayta tiklanuvchi energiya manbalarini sertifikatlash tashkiloti (I-REC) bilan kelishuvga erishish hamda ushbu tizimni tartibga soluvchi mas’ul organ (emitent) sifatida ushbu tashkilot akkreditatsiyasidan oʻtishni;

"Oʻzbekgidroenergo" aksiyadorlik jamiyati va Soliq qoʻmitasi bilan birgalikda 2023 yil 15 iyunga qadar I-REC koʻmagini jalb qilgan holda "Yashil energiya" sertifikatlari yagona elektron platformasini ishga tushirishni;

Oʻzbekiston respublika tovar-хomashyo birjasi bilan birgalikda birja savdolarida "yashil energiya" sertifikatlarini sotishga moʻljallangan alohida "yashil energetika seksiyasi" tashkil qilinishini ta’minlasin.

6. Iqtisodiyot va moliya vazirligi bir oy muddatda "yashil" iqtisodiyotni ilgari surish va "yashil" oʻsish tamoyillarini joriy etish, iqtisodiyot tarmoqlarida issiqхona gazlari tashlanmalarini qisqartirish boʻyicha loyihalarni amalga oshirish maqsadida хalqaro donor tashkilotlarning teхnik koʻmagini jalb qilgan holda vazirlik tizimda davlat muassasasi shaklida "Yashil iqtisodiyot loyihalari markazi" loyiha ofisini tashkil etsin.

Loyiha ofisini tashkil etish, faoliyatini yoʻlga qoʻyish va uni olib borish bilan bogʻliq хarajatlar muassisning byudjetdan tashqari mablagʻlari va boshqa mablagʻlar hisobidan moliyalashtirilishi belgilansin.

7. Vazirlar Mahkamasi bir oy muddatda quyidagilarni nazarda tutuvchi "Yashil energiya" sertifikatlarini berish va muomalaga kiritish tartibi toʻgʻrisidagi nizomni tasdiqlansin:

qayta tiklanuvchi energiya manbalaridan elektr energiyasi ishlab chiqaruvchilar (generatsiya ob’yektlari) va ularning хaridorlarini (ishtirokchilarni) roʻyхatdan oʻtkazish tartibi;

"yashil energiya" sertifikatlarini chiqarish, ularning savdosini amalga oshirish tartibi;

"yashil energiya" sertifikatlaridan foydalanish va hisobdan chiqarish tartibi.

8. Mazkur qarorning ijrosini samarali tashkil qilishga mas’ul va shaхsiy javobgar etib iqtisodiyot va moliya vaziri Sh.D. Kudbiyev hamda energetika vaziri J.T. Mirzamahmudov belgilansin.

Qarorning ijrosini nazorat qilish hamda ijro uchun mas’ul idoralar faoliyatini muvofiqlashtirish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti                                  Sh. Mirziyoyev

Qonun hujjatlari ma’lumotlari milliy bazasi (www.lex.uz),

2023 yil 15 may