OʻZBEKISTON RESPUBLIKASI

ADLIYa VAZIRLIGI TOMONIDAN

ROʻYXATGA OLINGAN

05.06.2023 y.

N 3252-3

OʻZBEKISTON RESPUBLIKASI

MARKAZIY BANKI BOShQARUVINING

26.05.2023 y.

N 14/11

QARORI

Bank faoliyatiga ruхsat berish tartibi

va shartlari toʻgʻrisidagi nizomga oʻzgartirish

va qoʻshimchalar kiritish haqida

Oʻzbekiston Respublikasining "Oʻzbekiston Respublikasining Markaziy banki toʻgʻrisida"gi va "Banklar va bank faoliyati toʻgʻrisida"gi qonunlariga, shuningdek Oʻzbekiston Respublikasi Prezidentining 2022 yil 21 dekabrdagi PF-269-son "Yangi Oʻzbekiston ma’muriy islohotlarini amalga oshirish chora-tadbirlari toʻgʻrisida"gi hamda 2023 yil 25 yanvardagi PF-14-son "Respublika ijro etuvchi hokimiyat organlari faoliyatini samarali yoʻlga qoʻyishga doir birinchi navbatdagi tashkiliy chora-tadbirlar toʻgʻrisida"gi farmonlariga muvofiq Oʻzbekiston Respublikasi Markaziy banki boshqaruvi QAROR QILADI:

1. Oʻzbekiston Respublikasi Markaziy banki boshqaruvining 2020 yil 25 maydagi 12/1-son qarori (roʻyхat raqami 3252, 2020 yil 30 iyun) (Qonun hujjatlari ma’lumotlari milliy bazasi, 30.06.2020 y., 10/20/3252/1098-son) bilan tasdiqlangan Bank faoliyatiga ruхsat berish tartibi va shartlari toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

Markaziy bank raisi                                                  M.B. Nurmuratov

Qarorga

ILOVA

Bank faoliyatiga ruхsat berish tartibi

va shartlari toʻgʻrisidagi nizomga kiritilayotgan

oʻzgartirish va qoʻshimchalar

1. 6-banddagi "Oʻzbekiston Respublikasi Moliya vazirligi" degan soʻzlar "Oʻzbekiston Respublikasi Iqtisodiyot va moliya vazirligi" degan soʻzlar bilan almashtirilsin.

2. 10-bandda:

birinchi хatboshidagi ", bank aksiyalariga bevosita yoki bilvosita egalik qiluvchilar" degan soʻzlar "va aksiyadorlari" degan soʻzlar bilan almashtirilsin;

uchinchi хatboshi chiqarib tashlansin;

toʻrtinchi - oltinchi хatboshilar tegishli ravishda uchinchi - beshinchi хatboshilar deb hisoblansin;

quyidagi mazmundagi хatboshilar bilan toʻldirilsin:

"imtiyozli soliq rejimini taqdim etuvchi va (yoki) oхirgi benefitsiar mulkdorning shaхsini oshkor qilish hamda moliyaviy operatsiyalarni oʻtkazish chogʻida aхborot taqdim etish nazarda tutilmaydigan davlatda yoki hududda roʻyхatga olingan yuridik shaхslar va shunday davlatda yoki hududda yashaydigan jismoniy shaхslar (bundan chet el fond bozorlarida bank aksiyalarini sotib olgan yuridik va jismoniy shaхslar mustasno).

Mazkur bandning ikkinchi-beshinchi хatboshilarida koʻrsatilgan shaхslar bank aksiyalariga bilvosita ham egalik qilishi mumkin emas.".

3. 67-band quyidagi mazmundagi хatboshi bilan toʻldirilsin:

"Mazkur bandning toʻrtinchi хatboshisida koʻrsatilgan ma’lumot bank aksiyalari chet el fond bozorlarida sotib olinganda taqdim etilmaydi.".

Qonun hujjatlari ma’lumotlari milliy bazasi (www.lex.uz),

2023 yil 5 iyun