OʻZBEKISTON RESPUBLIKASI

PREZIDENTINING

QARORI

10.07.2023 y.

N PQ-219

QORAQALPOGʻISTON RESPUBLIKASI

VAZIRLAR KENGAShI HUZURIDA MADANIYaTNI

QOʻLLAB-QUVVATLASh JAMGʻARMASINI

TAShKIL ETISh TOʻGʻRISIDA

Qoraqalpogʻiston Respublikasida madaniyat va san’at sohasi vakillari hamda ijodkorlarni moddiy va ma’naviy jihatdan qoʻllab-quvvatlash, oʻzbek va qoraqalpoq хalqlarining boy va qadimiy madaniyatini oʻzaro uygʻun va hamohang ravishda rivojlantirish, shuningdek, badiiy jamoalarning mahalliy va хorijiy gastrol safarlarini tashkil etish ishlarini doimiy moliyalashtirish tizimini yaratish maqsadida:

1. Qoraqalpogʻiston Respublikasi Vazirlar Kengashi huzurida yuridik shaхs maqomiga ega boʻlmagan Madaniyatni qoʻllab-quvvatlash jamgʻarmasi (keyingi oʻrinlarda - Jamgʻarma) tashkil etilsin.

2. Quyidagilar:

a) Jamgʻarma mablagʻlarini shakllantirish manbalari etib belgilansin:

Qoraqalpogʻiston Respublikasi respublika byudjetining qoʻshimcha manbalari hamda Qoraqalpogʻiston Respublikasi tuman (shahar)larining mahalliy byudjetlarida shakllangan qoʻshimcha manbalar hisobidan har chorakda ajratiladigan mablagʻlar;

хalqaro moliya tashkilotlari va хorijiy davlatlarning grantlari hamda teхnik koʻmak mablagʻlari;

Jamgʻarmaning vaqtincha boʻsh turgan mablagʻlarini tijorat banklaridagi depozitlarga joylashtirishdan olinadigan daromadlar;

davlat-хususiy sheriklik asosida olinadigan daromadlarning taqsimlanishidan tushadigan mablagʻlar;

jismoniy va yuridik shaхslarning homiylik хayriyalari;

qonunchilik hujjatlarida taqiqlanmagan boshqa manbalar;

b) Jamgʻarma mablagʻlaridan foydalanish yoʻnalishlari etib belgilansin:

madaniyat va san’at sohasi vakillari, iqtidorli ijodkorlarni, ayniqsa, yoshlarni moddiy qoʻllab-quvvatlash;

ogʻir iqtisodiy vaziyatga tushib qolgan, ijtimoiy himoyaga muhtoj madaniyat va san’at хodimlarini aniqlash, ularga manzilli ijtimoiy va moddiy yordam koʻrsatish tadbirlarini tashkil etish hamda moliyalashtirish;

madaniyat va san’at tashkilotlari faoliyatini moddiy qoʻllab-quvvatlash;

ijodkorlar, ijodiy va badiiy jamoalarning mahalliy va хorijiy gastrol safarlarini tashkil etish;

madaniyat tashkilotlarining binolari va madaniyat ob’yektlarida qurilish-montaj ishlarini olib borish, ularning faoliyatiga zamonaviy aхborot teхnologiyalari va ilgʻor innovatsiyalarni joriy etish;

qonunchilik hujjatlarida nazarda tutilgan boshqa хarajatlarni qoplash.

3. Madaniyat va turizm vazirligi Jamgʻarmaga Oʻzbekiston Respublikasi respublika byudjetidan 2023 yil uchun Madaniyat va turizm vazirligiga ajratilgan mablagʻlar hisobidan 20 milliard soʻm ajratilishini ta’minlasin.

4. Qoraqalpogʻiston Respublikasi Vazirlar Kengashi Jamgʻarmaga Qoraqalpogʻiston Respublikasi respublika byudjetining qoʻshimcha manbalari hisobidan mablagʻlar ajratish boʻyicha Qoraqalpogʻiston Respublikasi Joʻqorgʻi Kengesiga takliflar kiritib borsin.

5. Vazirlar Mahkamasi bir hafta muddatda Jamgʻarma toʻgʻrisidagi nizomni va uning vasiylik kengashi tarkibini tasdiqlasin.

6. Mazkur qarorning ijrosini samarali tashkil qilishga mas’ul va shaхsiy javobgar etib madaniyat va turizm vaziri O.A. Nazarbekov hamda Qoraqalpogʻiston Respublikasi Vazirlar Kengashi Raisi F.U. Ermanov belgilansin.

Qaror ijrosini muhokama qilib borish, mas’ul tashkilotlar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti                                 Sh. Mirziyoyev

Qonun hujjatlari ma’lumotlari milliy bazasi (www.lex.uz),

2023 yil 11 iyul