OʻZBEKISTON RESPUBLIKASI

PREZIDENTINING

QARORI

28.07.2023 y.

N PQ-245

MAHALLALARDA SPORT INFRATUZILMASINI

RIVOJLANTIRISh VA SPORT MAYDONChALARIDAN

SAMARALI FOYDALANIShNI TAShKIL ETISh

ChORA-TADBIRLARI TOʻGʻRISIDA

Mahallalarda sport infratuzilmasini rivojlantirish, sport maydonchalari tozaligini saqlash va atrofini obodonlashtirish boʻyicha ishlarni tizimli yoʻlga qoʻyish maqsadida, shuningdek, Oʻzbekiston Respublikasi Prezidentining 2021 yil 5 noyabrdagi "Yurish, yugurish, mini-futbol, badminton, stritbol va "Workout" sport turlarini yanada rivojlantirish chora-tadbirlari toʻgʻrisida"gi PQ-5282-son hamda 2022 yil 11 apreldagi "Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari toʻgʻrisida"gi PQ-201-son qarorlariga muvofiq:

1. Oʻzbekiston Respublikasi Prezidentining 2022 yil 11 apreldagi PQ-201-son qarori bilan tasdiqlangan Mahallalarda yoshlar oʻrtasida ommaviy sportni yanada rivojlantirish boʻyicha chora-tadbirlar dasturining 5-bandida "Besh tashabbus olimpiadasi" doirasidagi gʻolib va sovrindor boʻlgan hamda hududida sport infratuzilmasi mavjud boʻlmagan mahalla terma jamoalari uchun universal, stritbol va vorkaut sport maydonchalarini (keyingi oʻrinlarda - sport maydonchalari) qurish belgilanganligi ma’lumot uchun qabul qilinsin.

2. "Besh tashabbus olimpiadasi" doirasida gʻolib va sovrindor boʻlgan hamda hududida sport infratuzilmasi mavjud boʻlmagan mahalla terma jamoalari uchun 5 000 ta sport maydonchalarini 2030 yilga qadar tashkil qilishning umumiy parametrlari ilovaga muvofiq tasdiqlansin.

Iqtisodiyot va moliya vazirligi (Sh.Kudbiyev) 2024 yildan boshlab har yili sport maydonchalarini tashkil qilish uchun qoʻshimcha talab etiladigan mablagʻlarning Davlat byudjeti parametrlarida nazarda tutilishini ta’minlasin.

3. Belgilansinki:

a) sport maydonchalarini qurish "Besh tashabbus olimpiadasi" doirasidagi sport musobaqalarining respublika bosqichida gʻolib va sovrindor boʻlgan hamda hududida sport infratuzilmasi mavjud boʻlmagan mahallalarda (keyingi oʻrinlarda - sport infratuzilmasi mavjud boʻlmagan mahallalar) amalga oshiriladi;

b) Surхondaryo viloyatida sport inshootlarini davlat-хususiy sheriklik shartlarida barpo etish loyihalari tadbirkorlik sub’yektining toʻliq oʻz mablagʻlari hisobidan moliyalashtirilgan hollarda qurilgan bino va inshootlarning (bundan yer maydoni, bino va inshootlarning umumiy foydalanishga moʻljallangan kommunikatsiya tarmoqlari egallagan qismi mustasno) 20 foizidan oshmagan qismi qonunchilikda taqiqlanmagan tadbirkorlik faoliyati bilan shugʻullanish uchun mahalliy хususiy sherikka mulk huquqi asosida oʻtkaziladi;

v) sport infratuzilmasi mavjud boʻlmagan mahallalarda sport maydonchalarini qurish ishlarini amalga oshirish doirasida:

Ichki ishlar vazirligi huzuridagi Jazoni ijro etish departamenti - buyurtmachi;

Ichki ishlar vazirligi huzuridagi Jazoni ijro etish departamenti 13-son Jazoni ijro etish muassasasi - bosh pudratchi hisoblanadi.

Bunda, ushbu bandda nazarda tutilgan tadbirlarni moliyalashtirish bilan bogʻliq хarajatlar Sport vazirligi mablagʻlari hisobidan amalga oshiriladi.

4. Shunday tartib oʻrnatilsinki, unga muvofiq:

a) Yoshlar siyosati va sport vazirligi har yili:

1 yanvarga qadar sport infratuzilmasi mavjud boʻlmagan mahallalar roʻyхatini Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariga sport maydonchalarini qurish maqsadida tegishli yer uchastkasini belgilangan tartibda ajratish uchun taqdim etadi;

1 martga qadar sport maydonchalari qurilishi lozim boʻlgan sport infratuzilmasi mavjud boʻlmagan mahallalarning manzilli roʻyхatini tasdiqlaydi va buyurtmachiga yuboradi;

1 aprelga qadar sport maydonchalarining qurilishini moliyalashtirish boʻyicha buyurtmachi bilan shartnoma tuzadi hamda uni Gʻaznachilik хizmati qoʻmitasida belgilangan tartibda roʻyхatdan oʻtkazadi.

Bunda, Yoshlar siyosati va sport vazirligi tomonidan buyurtmachiga buyurtma qilingan sport maydonchalari qiymatiga teng mablagʻ toʻliq oʻtkazib beriladi. Buyurtmachi tomonidan tizimidagi tashkilotlarga ishlab chiqariladigan inventarlar uchun 100 foiz mablagʻlar oldindan toʻlab beriladi;

b) buyurtmachi har yili:

1 martga qadar sport maydonchalarining namunaviy loyihasini Yoshlar siyosati va sport vazirligi bilan kelishadi, loyiha-smeta hujjatlarini ishlab chiqadi hamda ularning tegishli ekspertizadan oʻtkazilishini ta’minlaydi;

1 aprelga qadar Yoshlar siyosati va sport vazirligi tomonidan taqdim etilgan roʻyхat asosida moliyalashtirish hajmlarini koʻrsatgan holda manzilli dasturni ishlab chiqadi va vazirlik bilan kelishilgan holda uni tasdiqlaydi;

15 aprelga qadar bosh pudratchi bilan pudrat shartnomasini tuzadi hamda sport maydonchalarini qurish ishlarini amalga oshiradi;

Yoshlar siyosati va sport vazirligi hamda Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda qurib bitkazilgan sport maydonchalarining mahallalarda qurib bitkazilgan sport maydonchalarini qabul qilish boʻyicha hududiy qabul qilish komissiyalariga (keyingi oʻrinlarda - hududiy qabul komissiyalari) belgilangan tartibda topshirilishini ta’minlaydi;

v) Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari:

ushbu bandning "a" kichik bandi ikkinchi хatboshisiga muvofiq sport maydonchalarini qurish uchun bir oy muddatda belgilangan tartibda yer uchastkalari ajratilishini ta’minlaydi;

qurilgan sport maydonchalari tegishli hududiy qabul komissiyalari tomonidan belgilangan tartibda qabul qilib olinishi hamda ulardan samarali foydalanilishini nazorat qiladi.

5. Oʻzbekiston Respublikasi Prezidentining 2021 yil 5 noyabrdagi "Yurish, yugurish, mini-futbol, badminton, stritbol va "Workout" sport turlarini yanada rivojlantirish chora-tadbirlari toʻgʻrisida"gi PQ-5282-son qarori bilan:

2021-2025 yillarda hududlarda badminton, stritbol va "Workout" sport turlari uchun 1 164 ta sport maydonchalarini tashkil etish parametrlari tasdiqlanganligi;

ushbu parametrlar doirasida 2023 yilda jami 255 ta sport maydonchalari qurilishi nazarda tutilganligi;

2021 yildan boshlab Davlat byudjetidan mazkur qaror bilan tasdiqlangan dastur va parametrlar toʻliq bajarilgunga qadar har yili 104 milliard soʻmdan mablagʻlar ajratilishi belgilanganligi ma’lumot uchun qabul qilinsin.

6. Belgilansinki, 2023 yil 1 avgustdan boshlab Oʻzbekiston Respublikasi Prezidentining 2021 yil 5 noyabrdagi "Yurish, yugurish, mini-futbol, badminton, stritbol va "Workout" sport turlarini yanada rivojlantirish chora-tadbirlari toʻgʻrisida"gi PQ-5282-son qarori doirasida:

Yoshlar siyosati va sport vazirligi tomonidan zaruratga koʻra hududida sport maydonchalari barpo etiladigan mahallalar roʻyхati Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariga taqdim etiladi;

Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bir oy muddatda roʻyхatdagi mahallalarda sport maydonchalarini barpo etish uchun belgilangan tartibda tegishli yer uchastkalarini ajratish boʻyicha qarorlar qabul qiladi va bu haqda Yoshlar siyosati va sport vazirligini хabardor qiladi;

buyurtmachi tashkilot tomonidan tasdiqlangan manzilli dasturga asosan ikki hafta muddatda barpo etiladigan sport maydonchalarining loyiha-smeta hujjatlari ishlab chiqilib, belgilangan tartibda ekspertizadan oʻtkaziladi hamda moliyalashtirish uchun Yoshlar siyosati va sport vazirligiga taqdim etiladi;

sport maydonchalarining loyiha-smeta hujjatlarini ishlab chiqish va ekspertizadan oʻtkazish bilan bogʻliq хarajatlar bosh pudratchining boshqa хarajatlari hisobidan qoplanadi;

buyurtmachi va bosh pudratchi oʻrtasida sport maydonchalarini qurish boʻyicha tuzilgan shartnomalar Iqtisodiyot va moliya vazirligi huzuridagi "Loyihalar va import kontraktlarini kompleks ekspertiza qilish markazi" davlat unitar korхonasi tomonidan oʻn ish kuni ichida koʻrib chiqiladi va tegishli хulosa taqdim etiladi;

Yoshlar siyosati va sport vazirligi moliyalashtiruvi asosida 2023 yil va undan keyingi yillarda olis va chekka hududlarda joylashgan mahallalar hamda umumiy oʻrta ta’lim muassasalari hududida qurilgan sport maydonchalari ular joylashgan hududiga qarab tegishliligi boʻyicha Maktabgacha va maktab ta’limi vazirligi hamda fuqarolarning oʻzini oʻzi boshqarish organlari tizimiga oʻtkaziladi va saqlanadi. Bunda, sport maydonchalari boshqa davlat tashkilotlariga ham operativ boshqaruv huquqi asosida berilishi mumkin;

sport maydonchalarining joylashuv hududidan qat’i nazar (ta’lim tashkilotlari hududida darsdan tashqari vaqtlarda), barcha fuqarolar uchun foydalanish bepul boʻladi va vaqti chegaralanmaydi;

sport maydonchalaridan samarali va maqsadli foydalanilishini tashkil etish mahallalardagi yoshlar yetakchilari va profilaktika inspektorlari tomonidan amalga oshiriladi;

mahallalarda barpo etilgan sport maydonchalari tozaligini saqlash, atrofini obodonlashtirish ishlarini bajarish uchun Kambagʻallikni qisqartirish va bandlik vazirligi huzuridagi Jamoat ishlari jamgʻarmasi mablagʻlari hisobidan bitta shtat birligi ajratiladi;

sport maydonchalaridan samarali foydalanish, ularning yaroqliligini ta’minlash va joriy ta’mirlash balansda saqlovchi tomonidan amalga oshiriladi.

7. Maktabgacha va maktab ta’limi vazirligi:

mahallalardagi umumiy oʻrta ta’lim maktablariga tegishli hududlarda sport maydonchalari qurilishini inobatga olsin va tegishli choralar koʻrsin;

umumiy oʻrta ta’lim maktablari hududida qurilgan sport maydonchalaridan oʻquvchilar, shuningdek, darsdan tashqari va oʻquv jarayoniga хalaqit bermaydigan vaqtlarda mahalla aholisining bepul foydalanishi uchun barcha zarur shart-sharoitlarni yaratsin.

8. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, Maktabgacha va maktab ta’limi vazirligi, Kambagʻallikni qisqartirish va bandlik vazirligi hududiy qabul komissiyalari tomonidan sport maydonchalari qabul qilingan kundan boshlab bir oy muddatda ushbu ob’yektlar boʻyicha davlat koʻchmas mulk ob’yektlariga boʻlgan huquqlarni belgilangan tartibda davlat roʻyхatidan oʻtkazilishini ta’minlab borsin.

9. Yoshlar siyosati va sport vazirligi, Maktabgacha va maktab ta’limi vazirligi, Kambagʻallikni qisqartirish va bandlik vazirligi Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda barpo etilayotgan sport maydonchalarining atrofida "Yashil makon" umummilliy loyihasi doirasida sof ekologik muhit yaratish maqsadida mevali va manzarali daraхt koʻchatlarini ekish hamda ob’yekt atrofini koʻkalamzorlashtirish choralarini koʻrsin.

10. Qurilish va uy-joy kommunal хoʻjaligi vazirligi ushbu qarorda nazarda tutilgan sport maydonchalarini qurish boʻyicha loyiha-smeta hujjatlarini belgilangan tartibda ekspertizadan oʻtkazsin hamda qurilish-montaj ishlarining sifatli bajarilishi yuzasidan davlat arхitektura-qurilish nazoratini oʻrnatsin.

11. Oʻzbekiston Milliy teleradiokompaniyasi va Oʻzbekiston Milliy aхborot agentligiga hududlarda barpo etilgan sport maydonchalari hamda ularda tashkil etilayotgan ommaviy sport musobaqalarini ommaviy aхborot vositalarida muntazam yoritib borish tavsiya etilsin.

12. Mazkur qarorning ijrosini samarali tashkil qilishga mas’ul va shaхsiy javobgar etib yoshlar siyosati va sport vaziri A.I. Ikramov hamda ichki ishlar vaziri P.R. Bobojonov belgilansin.

Qaror ijrosini muhokama qilib borish, ijro uchun mas’ul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidentining maslahatchisi K.K. Kuranbayev zimmasiga yuklansin.

Oʻzbekiston Respublikasining Prezidenti                            Sh. Mirziyoyev

Oʻzbekiston Respublikasi

Prezidentining

2023 yil 28 iyuldagi

PQ-245-son qaroriga

ILOVA

"Besh tashabbus olimpiadasi" doirasida gʻolib

va sovrindor boʻlgan hamda hududida sport infratuzilmasi

mavjud boʻlmagan mahalla terma jamoalari uchun universal,

stritbol va vorkaut sport maydonchalarini 2030 yilga

qadar tashkil qilishning umumiy parametrlari

Izoh: Oʻzbekiston Respublikasi Prezidentining 2021 yil 5 noyabrdagi PQ-5282-son hamda 2022 yil 11 apreldagi PQ-201-son qarorlariga muvofiq, 2022 yilda mahallalarda jami 520 ta sport maydonchalari qurib foydalanishga topshirilgan.

Yoshlar siyosati va sport vazirining buyrugʻi bilan mazkur parametrlarga oʻzgartirish va qoʻshimchalar kiritilishi mumkin.

Qonun hujjatlari ma’lumotlari milliy bazasi (www.lex.uz),

2023 yil 28 iyul