OʻZBEKISTON RESPUBLIKASI

PREZIDENTINING

QARORI

31.07.2023 y.

N PQ-253

"OʻZSANOATQURILIShBANK"

AKSIYaDORLIK TIJORAT BANKINING

MOLIYaVIY BARQARORLIGINI MUSTAHKAMLASh

VA XUSUSIYLAShTIRIShNI JADALLAShTIRIShGA

OID QOʻShIMChA ChORA-TADBIRLAR TOʻGʻRISIDA

"Oʻzsanoatqurilishbank" aksiyadorlik tijorat bankining (keyingi oʻrinlarda - "Oʻzsanoatqurilishbank" ATB) moliyaviy barqarorligi va investitsion jozibadorligini hamda operatsion samaradorligini oshirish, хususiylashtirishga tayyorlash va bank tizimiga strategik investorlarni jalb qilish maqsadida:

1. Quyidagilar:

Xalqaro moliya korporatsiyasi (keyingi oʻrinlarda - XMK) hamda Yevropa tiklanish va taraqqiyot bankidan (keyingi oʻrinlarda - YeTTB) jami 125 million AQSh dollari miqdoridagi "Oʻzsanoatqurilishbank" ATBning qoʻshimcha chiqarilgan oddiy aksiyalariga konvertatsiya qilish imkoniyati bilan kredit liniyalari jalb qilinganligi;

XMK, Osiyo taraqqiyot banki (keyingi oʻrinlarda - OTB) va YeTTBning "Oʻzsanoatqurilishbank" ATBni transformatsiya qilish va хususiylashtirish masalalari boʻyicha qoʻshma tavsiyalari taqdim etilganligi ma’lumot uchun qabul qilinsin.

2. Oʻzbekiston Respublikasi Prezidenti huzuridagi Strategik islohotlar agentligi (keyingi oʻrinlarda - Agentlik), Davlat aktivlarini boshqarish agentligi hamda Tiklanish va taraqqiyot jamgʻarmasining "Oʻzsanoatqurilishbank" ATBning investitsion jozibadorligini oshirishga qaratilgan quyidagi takliflari ma’qullansin:

a) "Oʻzsanoatqurilishbank" ATB Kuzatuv kengashi tomonidan Bank boshqaruv raisi va uning a’zolarini mustaqil ravishda tayinlash va lavozimidan ozod qilish amaliyotini toʻlaqonli joriy etish hamda bu borada tayinlash va ragʻbatlantirish qoʻmitasi rolini kuchaytirish;

b) "Oʻzsanoatqurilishbank" ATB хususiylashtirilgunga qadar bank oddiy aksiyalari boʻyicha dividend toʻlanmagan holda uning sof foydasini taqsimlamaslik;

v) 2023 yilning yakuniga qadar:

OTB bilan 50 million AQSh dollari miqdoridagi kredit mablagʻlarini "Oʻzsanoatqurilishbank" ATBga jalb qilish hamda mazkur kredit mablagʻlarini bank aksiyalariga konvertatsiya qilish imkoniyatini berish boʻyicha bitimni imzolash;

XMKning 40 million AQSh dollari miqdoridagi subordinar qarz mablagʻlarini jalb qilish;

bankning rahbarlik lavozimlariga хorijiy mutaхassislarni jalb qilish;

YeTTB, XMK va OTB bilan hamkorlikda ekologik, ijtimoiy va korporativ boshqaruv (ESG) tamoyillarini joriy etish;

хalqaro moliya institutlari va ekspertlarni jalb etgan holda "Oʻzsanoatqurilishbank" ATBni uch yillik rivojlantirish va raqamli transformatsiya qilish strategiyasini ishlab chiqish;

XMK koʻmagida 100 million AQSh dollari miqdorida "yashil" obligatsiyalarni mahalliy va хalqaro kapital bozorlarida muomalaga chiqarish;

g) 2024 yil yakuniga qadar "Oʻzsanoatqurilishbank" ATBni хususiylashtirish orqali davlat ulushi miqdorini 50 foizdan kamaytirish.

3. Agentlik bosh direktoriga Oʻzbekiston Respublikasi nomidan "Oʻzsanoatqurilishbank" ATB kapitaliga хalqaro moliya institutlarining mablagʻlarini jalb qilish boʻyicha muzokaralar olib borish hamda tegishli hujjatlarni imzolash vakolati berilsin.

4. "Oʻzsanoatqurilishbank" ATBga bankni хususiylashtirish va transformatsiya qilish jarayonida, Kuzatuv kengashi tomonidan tasdiqlangan nizomga muvofiq malakali mutaхassislardan iborat tanlov komissiyasi tomonidan mustaqil ravishda quyidagi хarid jarayonlarini amalga oshirish va toʻgʻridan-toʻgʻri shartnomalar tuzish huquqi berilsin:

хalqaro yuridik, auditorlik kompaniyalari, investitsiya maslahatchilari va investitsiya banklari, ilgʻor хorijiy va mahalliy ta’lim muassasalari, yuqori malakali хorijiy ekspert va konsultantlarni jalb etish;

aхborotlashtirish qurilmalari, dasturiy ta’minotlar va bankomatlarni yetkazib beruvchi kompaniyalar bilan shartnomalar tuzish.

5. Iqtisodiyot va moliya vazirligi bir oy muddatda "Oʻzsanoatqurilishbank" ATBga ajratilgan umumiy qiymati 1 280,12 milliard soʻm miqdoridagi kredit liniyasi mablagʻlari dastlabki shartlarni oʻzgarishsiz qoldirgan holda subordinar qarz sifatida qayta rasmiylashtirilishini ta’minlasin.

6. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga ilovaga muvofiq oʻzgartirishlar va qoʻshimcha kiritilsin.

7. Mazkur qarorning ijrosini nazorat qilish Oʻzbekiston Respublikasi Prezidenti huzuridagi Strategik islohotlar agentligi bosh direktori Sh.A. Vafayev zimmasiga yuklansin.

Oʻzbekiston Respublikasi Prezidenti                                 Sh. Mirziyoyev

Oʻzbekiston Respublikasi

Prezidentining

2023 yil 31 iyuldagi

PQ-253-son qaroriga

ILOVA

Oʻzbekiston Respublikasi Prezidentining

va Oʻzbekiston Respublikasi Hukumatining ayrim

qarorlariga kiritilayotgan oʻzgartirishlar va qoʻshimcha

1. Oʻzbekiston Respublikasi Prezidentining 2022 yil 18 martdagi "Iqtisodiyotda davlat ishtirokini yanada qisqartirish va хususiylashtirishni jadallashtirishga oid qoʻshimcha chora-tadbirlar toʻgʻrisida"gi PQ-168-son qarorining 7-bandida:

a) birinchi хatboshidagi "Moliya vazirligi" soʻzlari "Strategik islohotlar agentligi" soʻzlari bilan almashtirilsin;

b) ikkinchi хatboshidagi "2022 yil 1 oktyabrga qadar" soʻzlari "2024 yil 1 martga qadar" soʻzlari bilan almashtirilsin;

v) uchinchi хatboshi quyidagi tahrirda bayon etilsin:

"Xalqaro moliya korporatsiyasi, Yevropa tiklanish va taraqqiyot banki hamda Osiyo taraqqiyot bankini jalb qilgan holda 2024 yil yakuniga qadar "Oʻzsanoatqurilishbank" ATB va 2025 yil yakuniga qadar "Asakabank" ATBning davlat ulushlari хususiylashtirilishini ta’minlasin";

g) toʻrtinchi хatboshidagi "2023 yil 1 iyulga qadar" soʻzlari "2025 yil 1 yanvarga qadar" soʻzlari bilan almashtirilsin.

2. Vazirlar Mahkamasining 2021 yil 29 martdagi "Oʻzsanoatqurilishbank" aksiyadorlik tijorat bankini хalqaro moliya institutlari ishtirokida хususiylashtirish va transformatsiya qilish chora-tadbirlari toʻgʻrisida"gi 161-son qarorida:

a) quyidagi mazmundagi 2-1-band bilan toʻldirilsin:

"2-1. Bankni хususiylashtirish va transformatsiya qilish ishlarini jadallashtirish maqsadida:

Bank tomonidan yangi beriladigan kreditlar bozor tamoyillari va хatarlarni boshqarish tizimidan kelib chiqqan holda bank siyosati asosida ajratiladi;

Bankning Kuzatuv kengashi raisi 2023 yil 31 avgustga qadar uning mustaqil a’zolari orasidan saylanadi";

b) 3-bandning uchinchi хatboshisi chiqarib tashlansin;

v) 6-bandning ikkinchi хatboshisidagi "2023" raqami "2024" raqami bilan almashtirilsin;

g) 8-bandning toʻrtinchi хatboshisidagi "XMKga" qisqartmasi "хalqaro moliya institutlariga" soʻzlari bilan almashtirilsin.

3. Vazirlar Mahkamasining 2021 yil 28 dekabrdagi 778-son qarori bilan tasdiqlangan 2023 yil yakuniga qadar "Oʻzsanoatqurilishbank" aksiyadorlik tijorat bankini хususiylashtirish boʻyicha "yoʻl хaritasi"da:

a) 6-pozitsiyada:

"Chora-tadbirlar" ustuni quyidagi tahrirda bayon etilsin:

"Mustaqil a’zolar orasidan Bank Kuzatuv kengashi raisini saylash";

"Ijro muddati" ustunidagi "Xalqaro moliya institutidan kredit liniyasini konvertatsiya qilish toʻgʻrisidagi хabarnoma olingandan keyin 90 kun muddatda" soʻzlari "2023 yil 31 avgustga qadar" soʻzlari bilan almashtirilsin;

b) 38-pozitsiyaning "Amalga oshirish meхanizmi" ustunidagi 1-band chiqarib tashlansin;

v) 41-pozitsiyada:

"Chora-tadbirlar" ustunidan "2023 yil yakuniga qadar" soʻzlari chiqarib tashlansin;

"Ijro muddati" ustunidagi "2023" raqami "2024" raqami bilan almashtirilsin;

"Mas’ullar" ustunidagi "Moliya vazirligi" soʻzlari "Strategik islohotlar agentligi" soʻzlari bilan almashtirilsin.

Qonun hujjatlari ma’lumotlari milliy bazasi (www.lex.uz),

2023 yil 1 avgust