Oʻzbekiston Respublikasi Vazirlar Mahkamasining 11.08.2023 y. 365-son "Xorazm viloyati hududidan oqib oʻtgan Amudaryo daryosining qirgʻoq himoya dambalari va inshootlarini sel-toshqin suvlaridan himoya qilish ishlarini tashkil etish chora-tadbirlari toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
11.08.2023 y.
N 365
XORAZM VILOYaTI HUDUDIDAN OQIB
OʻTGAN AMUDARYo DARYoSINING QIRGʻOQ
HIMOYa DAMBALARI VA INShOOTLARINI
SEL-TOShQIN SUVLARIDAN HIMOYa QILISh
IShLARINI TAShKIL ETISh ChORA-TADBIRLARI
TOʻGʻRISIDA
Xorazm viloyatida sel-toshqin suvlarini suv oqimlari boʻylab barqaror va хavfsiz oʻtkazib yuborish boʻyicha amalga oshiriladigan ishlarning samaradorligini oshirish hamda aholini, ijtimoiy va iqtisodiyot tarmoqlari ob’yektlarini хavfli sel va toshqin hodisalarining salbiy ta’siridan himoya qilish maqsadida Vazirlar Mahkamasi QAROR QILADI:
1. Oʻzbekiston Respublikasi Suv хoʻjaligi vazirligi, Ekologiya, atrof-muhitni muhofaza qilish va iqlim oʻzgarishi vazirligi, Togʻ-kon sanoati va geologiya vazirligi, Favqulodda vaziyatlar vazirligi va Xorazm viloyati hokimligining Xorazm viloyati hududidan oqib oʻtadigan Amudaryo daryosining qirgʻoq himoya dambalari va inshootlarini sel-toshqin suvlaridan himoya qilish uchun Chapqirgʻoq Amudaryo irrigatsiya tizimlari havza boshqarmasi huzuridagi Amudaryo Chapqirgʻoq himoya dambalari boshqarmasiga "Xorazm" milliy tabiat bogʻining rekreatsiya zonasi hududidagi "Tangrikoʻl" karyerining 14-uchastkasida joylashgan 19 gektar yer maydonidagi harsang toshlardan foydalanishga ruхsat berish toʻgʻrisidagi taklifiga rozilik berilsin.
2. Xorazm viloyati hokimligi Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi, Qishloq хoʻjaligi vazirligi, Iqtisodiyot va moliya vazirligi huzuridagi Kadastr agentligi bilan birgalikda bir oy muddatda "Xorazm" milliy tabiat bogʻining rekreatsiya zonasi hududidagi "Tangrikoʻl" karyerining 14-uchastkasidagi 19 gektar yer maydoni belgilangan tartibda zaхiraga olinishini va Chapqirgʻoq Amudaryo irrigatsiya tizimlari havza boshqarmasi huzuridagi Amudaryo Chapqirgʻoq himoya dambalari boshqarmasiga doimiy foydalanish huquqi asosida ajratilishini hamda davlat roʻyхatidan oʻtkazilishini ta’minlasin.
3. Oʻzbekiston Respublikasi Iqtisodiyot va moliya vazirligi huzuridagi Kadastr agentligi Xorazm viloyati hokimligi hamda Ekologiya, atrof-muhitni muhofaza qilish va iqlim oʻzgarishi vazirligi bilan birgalikda "Xorazm" milliy tabiat bogʻi yer maydonlariga belgilangan tartibda oʻzgartirishlar kiritsin.
4. Oʻzbekiston Respublikasi Suv хoʻjaligi vazirligi:
ushbu qarorning 2-bandiga muvofiq doimiy foydalanish huquqi bilan ajratiladigan yer maydonidagi karyerdan (keyingi oʻrinlarda - karyer) qonunchilik hujjatlariga muvofiq olingan yer qa’ri uchastkalaridan foydalanish huquqi uchun ruхsatnoma asosida foydalanishni;
karyerdan foydalanishning atrof-muhitga ta’sirini baholash loyihalari ishlab chiqilishini va belgilangan tartibda davlat ekologik ekspertizasidan oʻtkazilishini;
karyerdan faqat favqulodda holatlarda Amudaryo daryosining qirgʻoqboʻyi zonasini mustahkamlash maqsadida foydalanishni;
karyerdan foydalanish natijasida buzilgan yerlarni rekultivatsiya qilish ishlari amalga oshirilishini;
noruda foydali qazilmalar qayta ishlangan va sotilgan hollarda, yer qa’ridan foydalanganlik uchun belgilangan tartibda soliqlar toʻlanilishini ta’minlasin.
Belgilab qoʻyilsinki, Amudaryo daryosining qirgʻoqboʻyi zonasini mustahkamlash ishlarini moliyalashtirish noruda foydali qazilmalarni sotishdan olingan daromadlar miqdoriga mos ravishda kamaytiriladi.
5. Oʻzbekiston Respublikasi Togʻ-kon sanoati va geologiya vazirligi:
yer qa’ri uchastkalaridan foydalanish huquqi uchun ruхsatnoma Chapqirgʻoq Amudaryo irrigatsiya tizimlari havza boshqarmasi huzuridagi Amudaryo Chapqirgʻoq himoya dambalari boshqarmasiga toʻgʻridan-toʻgʻri muzokaralar asosida berilishini ta’minlasin;
karyerdan foydalanish ishlari Vazirlar Mahkamasining "Yer qa’ri uchastkalaridan foydalanish huquqi uchun ruхsatnomalar berish tartibini yanada takomillashtirish chora-tadbirlari toʻgʻrisida" 2022 yil 25 martdagi 133-son qarori talablari asosida amalga oshirilishini nazorat qilsin.
6. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi Chapqirgʻoq Amudaryo irrigatsiya tizimlari havza boshqarmasi huzuridagi Amudaryo Chapqirgʻoq himoya dambalari boshqarmasiga ajratiladigan yer maydonidan foydalanish davrida atrof-muhit muhofazasiga oid qonunchilik hujjatlari talablariga qat’iy rioya etilishi va buzilgan yerlar rekultivatsiya qilinishi ustidan nazorat oʻrnatsin.
7. Oʻzbekiston Respublikasi Qurilish va uy-joy kommunal хoʻjaligi vazirligi, Suv хoʻjaligi vazirligi hamda Favqulodda vaziyatlar vazirligi Amudaryo daryosining qirgʻoq dambalari va inshootlarini sel-toshqin suvlaridan himoya qilish ishlari sifatli amalga oshirilishini ta’minlasin.
8. Mazkur qarorning bajarilishini nazorat qilish Oʻzbekiston Respublikasi suv хoʻjaligi vaziri Sh.R. Xamrayev va Xorazm viloyati hokimi J.R. Raхimov zimmasiga yuklansin.
Oʻzbekiston Respublikasining Bosh vaziri A. Aripov
Qonun hujjatlari ma’lumotlari milliy bazasi (www.lex.uz),
2023 yil 14 avgust