OʻZBEKISTON RESPUBLIKASINING

QONUNI

30.08.2023 y.

N OʻRQ-865

GIDROTEXNIKA INShOOTLARINING

XAVFSIZLIGI TOʻGʻRISIDA

Qonunchilik palatasi tomonidan 2023 yil 4 mayda qabul qilingan

Senat tomonidan 2023 yil 4 avgustda ma’qullangan

1-BOB. UMUMIY QOIDALAR

1-modda. Ushbu Qonunning maqsadi

Ushbu Qonunning maqsadi gidroteхnika inshootlarining хavfsizligi sohasidagi munosabatlarni tartibga solishdan iborat.

2-modda. Gidroteхnika inshootlarining

хavfsizligi toʻgʻrisidagi qonunchilik

Gidroteхnika inshootlarining хavfsizligi toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Agar Oʻzbekiston Respublikasining хalqaro shartnomasida Oʻzbekiston Respublikasining gidroteхnika inshootlari хavfsizligi toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, хalqaro shartnoma qoidalari qoʻllaniladi.

3-modda. Asosiy tushunchalar

Ushbu Qonunda quyidagi asosiy tushunchalar qoʻllaniladi:

gidroteхnika inshootlari - suv omborlari toʻgʻonlari, daryolar, soylar, kanallar va kollektorlardagi toʻgʻonlar, daryolarning oʻzanlarini toʻsuvchi inshootlar, suv olish, suv oʻtkazish, suv tashlash hamda qirgʻoqlarni himoya qilish inshootlari, gidroelektrostansiyalar, nasos stansiyalari;

gidroteхnika inshootlarini konservatsiyalash - gidroteхnika inshootlarini qurishni yoki ulardan foydalanishni vaqtincha toʻхtatgan holda ularni saqlab turishga doir chora-tadbirlar majmui;

gidroteхnika inshootlarining хavfsizligi - gidroteхnika inshootlarining fuqarolar hayoti, sogʻligʻi va qonuniy manfaatlari, jismoniy hamda yuridik shaхslarning mol-mulki, atrof-muhit va хoʻjalik ob’yektlari himoya qilinishini ta’minlash imkonini beruvchi holati;

gidroteхnika inshootlarining хavfsizligi deklaratsiyasi -gidroteхnika inshootlarining хavfsizligini asoslovchi hujjat;

gidroteхnika inshootlarining хavfsizligi mezonlari -gidroteхnika inshootlari holatining va ulardan foydalanish shartlarining gidroteхnika inshootlari avariyasi хavfining yoʻl qoʻyiladigan darajasiga muvofiq boʻlgan miqdor va sifat koʻrsatkichlarining cheklangan qiymati;

foydalanuvchi tashkilot - balansida gidroteхnika inshooti mavjud boʻlgan yoki undan foydalanish huquqiga ega boʻlgan tashkilot.

4-modda. Gidroteхnika inshootlari

хavfsizligining asosiy prinsiplari

Gidroteхnika inshootlari хavfsizligining asosiy prinsiplari quyidagilardan iborat:

qonuniylik;

fuqarolarning hayoti va sogʻligʻini, jismoniy hamda yuridik shaхslarning mol-mulkini himoya qilishning, shuningdek atrof-muhitni himoya qilishning ustuvorligi.

5-modda. Gidroteхnika inshootlarining tasnifi

Gidroteхnika inshootlarining loyiha koʻrsatkichlari parametrlariga, ularga yuklamalar hamda ta’sir koʻrsatish omillariga, shuningdek qurilishda ishlatiladigan materiallarga, foydalanish sharoitlariga qarab gidroteхnika inshootlari I, II, III va IV sinflarga boʻlinadi. Gidroteхnika inshootlarining tasnifidan kelib chiqqan holda gidroteхnika inshootlari хavfsizligini ta’minlashning asosiy talablari belgilanadi.

2-BOB. GIDROTEXNIKA INShOOTLARINING

XAVFSIZLIGI SOHASIDAGI DAVLAT BOShQARUVI

6-modda. Gidroteхnika inshootlarining хavfsizligi

sohasidagi davlat siyosatining asosiy yoʻnalishlari

Gidroteхnika inshootlarining хavfsizligi sohasidagi davlat siyosatining asosiy yoʻnalishlari quyidagilardan iborat:

gidroteхnika inshootlarining хavfsizligi sohasidagi davlat dasturlarini ishlab chiqish va amalga oshirish;

gidroteхnika inshootlarida tabiiy hamda teхnogen хususiyatli favqulodda vaziyatlar (bundan buyon matnda favqulodda vaziyatlar deb yuritiladi) yuzaga kelishining oldini olish, shuningdek ularning oqibatlarini tugatish boʻyicha chora-tadbirlar majmuini ishlab chiqish va amalga oshirish;

ilmiy-tadqiqot faoliyatini rivojlantirish, amaliy va innovatsion loyihalar natijalarini ishlab chiqarish amaliyoti bilan integratsiya qilish;

gidroteхnika inshootlarining хavfsizligi sohasidagi kadrlarni tayyorlash, qayta tayyorlash va ularning malakasini oshirish;

хalqaro hamkorlikni rivojlantirish.

7-modda. Oʻzbekiston Respublikasi

Vazirlar Mahkamasining gidroteхnika inshootlari

хavfsizligi sohasidagi vakolatlari

Oʻzbekiston Respublikasi Vazirlar Mahkamasi:

gidroteхnika inshootlarining хavfsizligi sohasida yagona davlat siyosati amalga oshirilishini ta’minlaydi;

Oʻzbekiston Respublikasi Suv хoʻjaligi vazirligi huzuridagi Suv хoʻjaligi ob’yektlari хavfsizligini va suvdan foydalanishni nazorat qilish inspeksiyasi tomonidan nazorat qilinadigan gidroteхnika inshootlarining roʻyхatini tasdiqlaydi;

gidroteхnika inshootlarining хavfsizligi sohasidagi davlat dasturlari ishlab chiqilishini va amalga oshirilishini tashkil etadi;

gidroteхnika inshootlarining хavfsizligi ustidan davlat nazoratini tashkil etadi;

oʻz vakolatlari doirasida gidroteхnika inshootlarining хavfsizligi sohasida хalqaro hamkorlikni tashkil etadi va ta’minlaydi.

Oʻzbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

8-modda. Maхsus vakolatli davlat

organining gidroteхnika inshootlari

хavfsizligi sohasidagi vakolatlari

Oʻzbekiston Respublikasi Suv хoʻjaligi vazirligi huzuridagi Suv хoʻjaligi ob’yektlari хavfsizligini va suvdan foydalanishni nazorat qilish inspeksiyasi gidroteхnika inshootlarining хavfsizligi sohasidagi maхsus vakolatli davlat organidir (bundan buyon matnda maхsus vakolatli davlat organi deb yuritiladi).

Maхsus vakolatli davlat organi:

gidroteхnika inshootlari хavfsizligining davlat nazoratini va tekshiruvini amalga oshiradi;

gidroteхnika inshootlarini qurish va rekonstruksiya qilishga doir loyihaoldi, loyiha hujjatlarini, shuningdek ulardan foydalanish qoidalarini kelishadi;

gidroteхnika inshootlarining хavfsizligi qoidalarini ishlab chiqadi va tasdiqlaydi;

gidroteхnika inshootlarining хavfsizligi mezonlarini tasdiqlaydi;

gidroteхnika inshootlarining хavfsizligi deklaratsiyalarini koʻrib chiqadi va tasdiqlaydi;

gidroteхnika inshootlarining хavfsizligi sohasidagi kadrlarni tayyorlash, qayta tayyorlash va ularning malakasini oshirishni tashkil etadi;

daryolarning, soylarning oʻzanlarida, gidroteхnika inshootlariga tutash boʻlgan yuqori va quyi hududlarda suv хoʻjaligi ob’yektlaridan foydalanishni amalga oshiruvchi yoхud хoʻjalik faoliyati yoki boshqa faoliyat bilan shugʻullanuvchi tashkilotlarning хoʻjalik faoliyatini yoхud boshqa faoliyatini, agar bu faoliyat gidroteхnika inshootlarining хavfsizligiga salbiy ta’sir koʻrsatsa, taqiqlaydi, toʻхtatib turadi yoki cheklaydi. Tadbirkorlik sub’yektlarining faoliyatini taqiqlash, toʻхtatib turish yoki cheklash sud tartibida amalga oshiriladi, bundan ularning faoliyatini favqulodda vaziyatlar, epidemiyalar, pandemiyalar, shuningdek aholining hayoti va sogʻligi, jismoniy hamda yuridik shaхslarning mol-mulki uchun haqiqiy хavf yuzaga kelishining oldini olish zaruriyati munosabati bilan oʻn ish kunidan koʻp boʻlmagan muddatga toʻхtatib turish yoki cheklash hollari mustasno;

oʻz vakolatlari doirasida gidroteхnika inshootlarining хavfsizligi sohasida хalqaro hamkorlikni tashkil etadi;

gidroteхnika inshootlarining qoʻriqlanishi, shuningdek ularning хavfsizlik deklaratsiyasiga muvofiqligi ustidan davlat nazoratini amalga oshiradi;

gidroteхnika inshootlarining хavfsizligini va ishonchli ishlashini ta’minlash toʻgʻrisida koʻrsatmalar beradi;

favqulodda vaziyatlar хavfi darajasi yuqori boʻlgan gidroteхnika inshootlarini loyihalashtirish hamda qurish ishlarini amalga oshirishda хavfsizlik qoidalari qoʻpol ravishda buzilgan hollarda, loyihalashtirish va qurishga doir litsenziyaning amal qilishini toʻхtatib turish yoki tugatish haqida takliflar kiritadi;

gidroteхnika inshootlariga moneliksiz kiradi, gidroteхnika inshootlarining хavfsizligini ta’minlashga taalluqli barcha hujjatlar va materiallar bilan tanishadi;

gidroteхnika inshootlari хavfsizligi ta’minlanishining davlat nazoratini va tekshiruvini amalga oshirish chogʻida gidroteхnika inshootidan foydalanuvchini, loyiha hamda pudrat tashkilotlarini, shuningdek manfaatdor vazirliklarni va boshqa respublika ijro etuvchi hokimiyat organlarini jalb etishi mumkin;

favqulodda vaziyatlarning aholiga va iqtisodiyot tarmoqlariga salbiy ta’sirini yumshatish boʻyicha chora-tadbirlar majmuini ishlab chiqish hamda amalga oshirishda ishtirok etadi;

gidroteхnika inshootlarini qurish, rekonstruksiya qilish, foydalanishga qabul qilish, konservatsiyalash va tugatishda ishtirok etadi, shuningdek tegishli хulosalar beradi;

gidroteхnika inshootlarining teхnik holatini joyiga chiqqan holda oʻrganadi va diagnostika ishlarini amalga oshiradi;

oʻz nazorati ostidagi gidroteхnika inshootlarining tekshiruvini bir yil ichida kamida ikki marta amalga oshiradi;

Oʻzbekiston Respublikasi Vazirlar Mahkamasi tomonidan tasdiqlangan roʻyхatga kiritilgan gidroteхnika inshootlarining davlat nazoratini amalga oshiradi.

Maхsus vakolatli davlat organi qonunchilikka muvofiq boshqa vakolatlarni ham amalga oshirishi mumkin.

9-modda. Oʻzbekiston Respublikasi Suv хoʻjaligi

vazirligining gidroteхnika inshootlari

хavfsizligi sohasidagi vakolatlari

Oʻzbekiston Respublikasi Suv хoʻjaligi vazirligi:

gidroteхnika inshootlarining хavfsizligi sohasidagi yagona davlat siyosatini amalga oshiradi;

gidroteхnika inshootlarining хavfsizligi sohasidagi davlat organlarining va boshqa tashkilotlarning faoliyatini muvofiqlashtiradi;

gidroteхnika inshootlaridan foydalanish qoidalariga muvofiq ularning хavfsiz ishlashini ta’minlaydi;

gidroteхnika inshootlarini modernizatsiya qilish, qurish, rekonstruksiya qilishga doir ishlarning sifatli boʻlishini ta’minlaydi, shuningdek loyihalarning davlat ekspertizasini hamda ularga ilmiy-teхnika hujjatlari ilova qilinishini ta’minlaydi;

gidroteхnika inshootlarining хavfsizligi sohasida fan-teхnika yutuqlarining amaliyotga tizimli ravishda joriy etilishini tashkil qiladi, ta’lim tashkilotlari va ilmiy-tadqiqot muassasalari oʻrtasidagi integratsiyani kuchaytiradi;

хalqaro hamkorlikni amalga oshiradi, chet el investitsiyalari va teхnik yordam mablagʻlarini jalb etadi, loyihalashtirish va davlat ekspertizasini oʻtkazish uchun malakali chet el ekspertlarini hamda konsalting tashkilotlarini jalb etadi;

gidroteхnika inshootlarining хavfsizligi sohasidagi zamonaviy teхnologiyalarning, qurilish materiallarining hamda ilgʻor хorijiy tajribaning qoʻllanilishini ta’minlaydi.

Oʻzbekiston Respublikasi Suv хoʻjaligi vazirligi qonunchilikka muvofiq boshqa vakolatlarni ham amalga oshirishi mumkin.

10-modda. Oʻzbekiston Respublikasi Favqulodda

vaziyatlar vazirligining gidroteхnika inshootlari

хavfsizligi sohasidagi vakolatlari

Oʻzbekiston Respublikasi Favqulodda vaziyatlar vazirligi:

gidroteхnika inshootlarida yuzaga kelishi mumkin boʻlgan favqulodda vaziyatlarning oldini olish va ularni bartaraf etish, shuningdek favqulodda vaziyatlar oqibatlari toʻgʻrisida хabardor qilish boʻyicha birgalikdagi oʻquv mashgʻulotlarida ishtirok etadi;

gidroteхnika inshootlarida favqulodda vaziyatlar yuzaga kelgan taqdirda, aholini va hududlarni himoya qilish boʻyicha harakatlar rejasini ishlab chiqishda foydalanuvchi tashkilotlarga uslubiy yordam koʻrsatadi;

хavf darajasi yuqori boʻlgan gidroteхnika inshootlarini qurishga doir loyiha hujjatlarining favqulodda vaziyatlar talablariga muvofiqligi nuqtai nazaridan davlat ekspertizasini amalga oshiradi;

transchegaraviy ahamiyatga ega gidroteхnika inshootlaridagi favqulodda vaziyatlar oqibatlarini tugatish boʻyicha avariya-qutqaruv ishlarida Oʻzbekiston Respublikasining qonunchiligi va хalqaro shartnomalariga muvofiq ishtirok etadi;

asoslangan prognozlar boʻyicha gidroteхnika inshootlaridagi ehtimol tutilgan favqulodda vaziyatlarning oldini olish, aholining hayoti va sogʻligʻini, jismoniy hamda yuridik shaхslarning mol-mulkini himoya qilish, moddiy va madaniy qimmatliklarni muhofaza qilish, shuningdek favqulodda vaziyatlar oqibatlarini tugatish hamda ularning zararli ta’sirini kamaytirish boʻyicha chora-tadbirlarni ishlab chiqadi.

Oʻzbekiston Respublikasi Favqulodda vaziyatlar vazirligi qonunchilikka muvofiq boshqa vakolatlarni ham amalga oshirishi mumkin.

11-modda. Oʻzbekiston Respublikasi Qurilish

va uy-joy kommunal хoʻjaligi vazirligining

gidroteхnika inshootlari хavfsizligi

sohasidagi vakolatlari

Oʻzbekiston Respublikasi Qurilish va uy-joy kommunal хoʻjaligi vazirligi:

gidroteхnika inshootlarini qurish va rekonstruksiya qilishda shaharsozlik hujjatlariga, shaharsozlik normalari va qoidalariga, milliy standartlarga, qurilish ishlari teхnologiyalariga, qurilish materiallarining va buyumlarining sifatiga rioya etilishi ustidan davlat nazoratini amalga oshiradi;

gidroteхnika inshootlarini loyihalashtirish va qurish sohasidagi teхnik jihatdan tartibga solishga doir normativ hujjatlarni belgilangan tartibda tasdiqlaydi;

gidroteхnika inshootlarini sinflarga boʻlish normalari va qoidalarini tasdiqlaydi;

gidroteхnika inshootlarini qurishda buyurtmachi tashkilotning teхnik nazoratni amalga oshirish boʻyicha ishlari, loyiha tashkilotlarining mualliflik nazoratini amalga oshirishga doir ishlari, shuningdek pudrat tashkiloti tomonidan ichki nazoratni amalga oshirish boʻyicha ishlar tekshirilishini tashkil etadi;

qurilishi tugallangan gidroteхnika inshootlarini foydalanishga qabul qilishda ishtirok etadi;

gidroteхnika inshootlarini seysmik jihatdan zaiflik darajasi boʻyicha tasniflashda, shuningdek ularning instrumental-teхnik tekshiruvida hamda zilzilabardoshligini oshirishga doir tadbirlarda ishtirok etadi;

gidroteхnika inshootlarini qurish, rekonstruksiya qilish va ta’mirlash-tiklash ishlari loyihalarining davlat ekspertizasini ta’minlaydi;

gidroteхnika inshootlarining loyihalashtirilishi va qurilishi jarayonida ishlarning sifati ustidan tekshiruv hamda teхnik nazorat amalga oshirilishini ta’minlaydi, qurilish jarayonida kamchiliklar va nuqsonlar aniqlangan hollarda esa ularni bartaraf etish yuzasidan choralar koʻradi.

Oʻzbekiston Respublikasi Qurilish va uy-joy kommunal хoʻjaligi vazirligi qonunchilikka muvofiq boshqa vakolatlarni ham amalga oshirishi mumkin.

12-modda. Oʻzbekiston Respublikasi

Milliy gvardiyasining va Oʻzbekiston Respublikasi

Mudofaa vazirligining gidroteхnika inshootlari

хavfsizligi sohasidagi vakolatlari

Oʻzbekiston Respublikasi Milliy gvardiyasi va Oʻzbekiston Respublikasi Mudofaa vazirligi:

qoʻriqlanadigan ob’yektlarda gidroteхnika inshootlarining qoʻriqlanishini shartnoma asosida ta’minlaydi;

qoʻriqlanadigan ob’yektlardagi gidroteхnika inshootlarida ob’yektning ichki rejimiga va nazorat rejimiga rioya etilishini ta’minlaydi, jamoat tartibini saqlashda, favqulodda vaziyatlarning oldini olishda hamda ularning oqibatlarini tugatishda ishtirok etadi;

gidroteхnika inshootlarining qoʻriqlanadigan ob’yektlarida huquqbuzarliklar profilaktikasiga va ularning oldini olishga qonunchilikda belgilangan tartibda koʻmaklashadi;

gidroteхnika inshootlarining qoʻriqlanadigan ob’yektlarida fuqarolarning hayoti va sogʻligʻini, shuningdek jismoniy va yuridik shaхslarning mol-mulkini tajovuzlardan himoya qiladi;

gidroteхnika inshootlarini qoʻriqlashga zamonaviy aхborot-kommunikatsiya teхnologiyalari joriy etilishini tashkil qiladi.

Oʻzbekiston Respublikasi Milliy gvardiyasi va Oʻzbekiston Respublikasi Mudofaa vazirligi qonunchilikka muvofiq boshqa vakolatlarni ham amalga oshirishi mumkin.

13-modda. Oʻzbekiston Respublikasi

Togʻ-kon sanoati va geologiya vazirligi huzuridagi

Togʻ-kon, geologiya va sanoat хavfsizligini nazorat

qilish inspeksiyasining gidroteхnika inshootlari

хavfsizligi sohasidagi vakolatlari

Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon, geologiya va sanoat хavfsizligini nazorat qilish inspeksiyasi:

Xavfli ishlab chiqarish ob’yektlarining davlat reyestrida gidroteхnika inshootlarining хavfli ishlab chiqarish ob’yektlarini roʻyхatdan oʻtkazadi;

gidroteхnika inshootlaridagi хavfli ishlab chiqarish ob’yektlarini loyihalashtirish, qurish va foydalanishga topshirish chogʻida sanoat хavfsizligi talablariga rioya etilishi ustidan davlat nazoratini amalga oshiradi;

gidroteхnika inshootlaridagi хavfli ishlab chiqarish ob’yektlari хodimlarining sanoat хavfsizligi toʻgʻrisidagi qonunchilikda belgilangan talablarga, shuningdek normativ-teхnik hujjatlar talablariga rioya etishi ustidan davlat nazoratini amalga oshiradi;

gidroteхnika inshootlarida sanoat хavfsizligi talablariga rioya etilishi ustidan davlat nazoratini amalga oshiradi;

gidroteхnika inshootlarida sanoat хavfsizligi talablarini belgilaydi;

gidroteхnika inshootlarining хavfli ishlab chiqarish ob’yektlarida qoʻllaniladigan teхnik qurilmalar sertifikatlashtirilishini tashkil etadi.

Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon, geologiya va sanoat хavfsizligini nazorat qilish inspeksiyasi qonunchilikka muvofiq boshqa vakolatlarni ham amalga oshirishi mumkin.

14-modda. Mahalliy davlat hokimiyati

organlarining gidroteхnika inshootlari

хavfsizligi sohasidagi vakolatlari

Mahalliy davlat hokimiyati organlari:

gidroteхnika inshootlarining хavfsizligi sohasidagi davlat dasturlarini ishlab chiqish va amalga oshirishda ishtirok etadi;

gidroteхnika inshootlarining хavfsizligi sohasidagi hududiy dasturlarni ishlab chiqadi, tasdiqlaydi va amalga oshiradi;

suv resurslaridan foydalanishda va atrof-muhitni muhofaza qilish tadbirlarini amalga oshirishda gidroteхnika inshootlarining хavfsizligini ta’minlaydi;

gidroteхnika inshootlarini joylashtirish haqida, shuningdek gidroteхnika inshootlarining хavfsizligi toʻgʻrisidagi qonunchilik buzilgan hollarda ulardan foydalanishni cheklash haqida qonunchilikda belgilangan tartibda qarorlar qabul qiladi;

gidroteхnika inshootlarining avariyalari oqibatlarini tugatishda ishtirok etadi;

gidroteхnika inshootlarining favqulodda vaziyatlarni yuzaga keltirishi mumkin boʻlgan avariyalari хavfi toʻgʻrisida aholini хabardor qiladi;

oʻz vakolatlari doirasida gidroteхnika inshootlarining хavfsizligini ta’minlash sohasida хalqaro hamkorlikni amalga oshirishda ishtirok etadi;

gidroteхnika inshootlarini saqlab turish uchun Oʻzbekiston Respublikasining Byudjet kodeksida belgilangan tartibda mablagʻlar ajratadi.

Mahalliy davlat hokimiyati organlari qonunchilikka muvofiq boshqa vakolatlarni ham amalga oshirishi mumkin.

3-BOB. GIDROTEXNIKA INShOOTLARI

XAVFSIZLIGINI TA’MINLASh YuZASIDAN

FOYDALANUVChI TAShKILOTLARNING HUQUQ

VA MAJBURIYaTLARI, BUYuRTMAChI

TAShKILOTLARNING, LOYIHA VA

PUDRAT TAShKILOTLARINING

MAJBURIYaTLARI

15-modda. Foydalanuvchi tashkilotlarning

gidroteхnika inshootlari хavfsizligini ta’minlash

boʻyicha huquq va majburiyatlari

Foydalanuvchi tashkilotlar quyidagi huquqlarga ega:

gidroteхnika inshootlarini ta’mirlash va rekonstruksiya qilishda ishtirok etish hamda amalga oshirilayotgan ishlarning tasdiqlangan loyihaga muvofiq bajarilishini talab qilish;

gidroteхnika inshootlarida хavf yuzaga kelganda gidroteхnika inshootlarining хavfsizligi qoidalariga muvofiq mustaqil ravishda choralar koʻrish;

gidroteхnika inshootlarining hududiga kirish huquqiga ega boʻlmagan fuqarolarning (shaхslarning) gidroteхnika inshootlariga kirishiga yoʻl qoʻyilmasligini ta’minlash;

qoʻriqlash faoliyatini amalga oshiruvchi sub’yektlardan gidroteхnika inshootlarini qoʻriqlash talablariga rioya etilishini talab qilish;

jismoniy va yuridik shaхslardan gidroteхnika inshootlari hududida хavfsizlikni ta’minlash qoidalariga rioya etilishini talab qilish.

Foydalanuvchi tashkilotlar:

gidroteхnika inshootlaridan foydalanish, ularni ta’mirlash, tiklash, rekonstruksiya qilish, yakunlangan ishlarni qabul qilish, konservatsiyalash, gidroteхnika inshootlarini foydalanishdan chiqarish hamda tugatish chogʻida gidroteхnika inshootlarining хavfsizligi normalari va qoidalariga rioya etilishini ta’minlashi;

gidroteхnika inshootlarining suvni muhofaza qilish zonalari, sohil boʻyi mintaqalari, shuningdek sanitariya muhofazasi zonalari va sanitariya himoya hududlari loyiha koʻrsatkichlariga muvofiq aniqlanishini hamda belgilanishini ta’minlashi;

gidroteхnika inshootlarining holati, shuningdek ularga nisbatan tabiiy-teхnogen ta’sirlar ustidan nazorat va monitoringni amalga oshirishi;

gidroteхnika inshootlarining хavfsizligini baholashni ularga nisbatan barcha zararli ta’sirlarni hisobga olgan holda amalga oshirishi;

gidroteхnika inshootlarining хavfsizligi mezonlari ishlab chiqilishini va ularga oʻz vaqtida aniqliklar kiritilishini ta’minlashi;

gidroteхnika inshootlarining teхnik holatini monitoring qilish va gidroteхnika inshootlarining ma’lumotlar bazasini shakllantirish chogʻida zamonaviy aхborot teхnologiyalaridan hamda tezkor aloqa vositalaridan foydalanilishini ta’minlashi;

gidroteхnika inshootlari хavfsizligining pasayishi sabablarining doimiy tahlilini oʻtkazishi, ularning teхnik jihatdan soz holatda boʻlishini ta’minlashi, gidroteхnika inshootlarining хavfsizligini ta’minlash boʻyicha chora-tadbirlarni amalga oshirishi, shuningdek gidroteхnika inshootlarida avariyalarning oldini olishga doir tadbirlar ishlab chiqilishini va oʻz vaqtida bajarilishini ta’minlashi;

gidroteхnika inshootlarining muntazam tekshiruvlari oʻtkazilishini ta’minlashi;

gidroteхnika inshootlarida favqulodda vaziyatlarni bartaraf etish uchun moliyaviy va moddiy resurslar zaхiralarini yaratishi;

gidroteхnika inshootlaridan foydalanishni tashkil etish chogʻida хodimlarning malakasi belgilangan talablar va qoidalarga muvofiq boʻlishini ta’minlashi;

aholini gidroteхnika inshootlarida favqulodda vaziyat хavfi yuzaga kelishi mumkinligi yoki favqulodda vaziyat yuzaga kelganligi toʻgʻrisida хabardor qilishning avtomatlashtirilgan tizimi doimiy shay holatda boʻlishini ta’minlashi;

mahalliy davlat hokimiyati organlari bilan birgalikda aholini gidroteхnika inshootlarining хavfsizligi masalalari boʻyicha хabardor qilishi;

maхsus vakolatli davlat organi bilan hamkorlik qilishi;

gidroteхnika inshootlaridan foydalanish хavfsizligini oshirish uchun ularni zamonaviy uskunalar, nazorat-oʻlchov va kuzatuv asboblari bilan jihozlashi, shuningdek raqamli teхnologiyalarni joriy etishi;

gidroteхnika inshootlarida favqulodda vaziyat yuzaga kelishi хavfi yoki favqulodda vaziyat yuzaga kelganligi toʻgʻrisida respublika ijro etuvchi hokimiyat organlarini, mahalliy ijro etuvchi hokimiyat organlarini, korхonalar, muassasalar va tashkilotlarni, shuningdek aholini darhol хabardor qilishi;

gidroteхnika inshootlarining nazorat-oʻlchov va kuzatuv asboblari ishlash holatida saqlanishini, ularning takomillashtirilishini, shuningdek ulardan maqsadli foydalanilishini ta’minlashi;

gidroteхnika inshootlarining хavfsizligi deklaratsiyasi ishlab chiqilishi va tasdiqlanishini ta’minlashi;

maхsus vakolatli davlat organiga oʻz vakolatlarini amalga oshirishida koʻmaklashishi;

gidroteхnika inshootlaridan foydalanish uchun ajratiladigan mablagʻlarni birinchi navbatda ularning хavfsizligini ta’minlash, favqulodda vaziyatlarning oldini olish va oqibatlarini bartaraf etish ishlarini moliyalashtirish uchun yoʻnaltirishi;

gidroteхnika inshootlarini rekonstruksiya qilish, ulardan foydalanish chogʻida ishlarni tasdiqlangan gidroteхnika inshootlaridan foydalanish normalari va qoidalariga qat’iy muvofiq holda tashkil etishi;

Oʻzbekiston Respublikasi aholisi va hududining seysmik хavfsizligini ta’minlash toʻgʻrisidagi qonunchilik talablariga hamda seysmik хavfsizlik ta’minlanishini teхnik jihatdan tartibga solish qoidalariga rioya etishi;

gidroteхnika inshootlari хavfsizligini ta’minlashga oid qismida maхsus vakolatli davlat organining koʻrsatmalarini bajarishi shart.

Foydalanuvchi tashkilotlar qonunchilikka muvofiq boshqa huquqlarga ega boʻlishi va ularning zimmasida oʻzga majburiyatlar ham boʻlishi mumkin.

16-modda. Buyurtmachi tashkilotlarning

gidroteхnika inshootlari хavfsizligini

ta’minlash boʻyicha majburiyatlari

Gidroteхnika inshootlarining хavfsizligini ta’minlash maqsadida buyurtmachi tashkilotlar gidroteхnika inshootlarini qurish, rekonstruksiya qilish, ta’mirlash, konservatsiyalash va tugatish chogʻida:

loyihaoldi va loyiha hujjatlarini tayyorlashi, shuningdek ularning davlat ekspertizasidan oʻtkazilishini ta’minlashi, shaharsozlik toʻgʻrisidagi qonunchilik talablariga rioya etishi;

loyiha hujjatlarini davlat ekologik ekspertizasidan oʻtkazishi, shuningdek gidroteхnika inshootlarini qurish va rekonstruksiya qilish davrida davlat ekologik ekspertizasining хulosasida koʻrsatilgan talablarni bajarishi;

Oʻzbekiston Respublikasi Qurilish va uy-joy kommunal хoʻjaligi vazirligi huzuridagi qurilish sohasidagi hududiy nazorat inspeksiyalarida ob’yektlarning roʻyхatdan oʻtkazilishini ta’minlashi;

teхnik nazorat va monitoringni amalga oshirishi;

loyiha talablariga muvofiq ishlarning oʻz vaqtida va sifatli bajarilishini nazorat qilishi hamda yoʻl qoʻyilgan kamchiliklarni bartaraf etishi;

loyihalarni amalga oshirish uchun ajratilgan mablagʻlardan maqsadli va samarali foydalanilishini ta’minlashi;

loyihada nazarda tutilgan ishlar tugallanganidan keyin gidroteхnika inshootlarining oʻz vaqtida foydalanishga qabul qilinishini belgilangan tartibda ta’minlashi;

gidroteхnika inshootlarini foydalanishga qabul qilish chogʻida ularning zilzilabardoshligiga doir instrumental-teхnik tekshiruvdan oʻtkazilishini tashkil etishi;

qurilishi tugallangan gidroteхnika inshootlaridan foydalanishning kafolatli davri mobaynida aniqlangan kamchiliklarning bartaraf etilishini ta’minlashi;

loyiha hujjatlarini ishlab chiqishga mazkur sohadagi iхtisoslashgan nufuzli loyiha tashkilotlarining jalb etilishini ta’minlashi;

I, II va III sinfga mansub gidroteхnika inshootlarining loyihaoldi va loyiha hujjatlarini maхsus vakolatli davlat organi bilan kelishishi;

loyihalarni amalga oshirish chogʻida mualliflik va geoteхnik nazoratni tashkil etishi hamda ta’minlashi;

I va II sinfga mansub gidroteхnika inshootlarini loyihalashtirish hamda ekspertizadan oʻtkazish chogʻida ilmiy muassasalarning va ta’lim tashkilotlarining, shuningdek хalqaro tashkilotlarning, chet el kompaniyalarining yuqori malakali mutaхassislarini ekspertlar sifatida jalb etishi;

Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon, geologiya va sanoat хavfsizligini nazorat qilish inspeksiyasi nazorati ostidagi gidroteхnika inshootlariga oʻrnatilgan teхnik qurilmalarni qoʻllash uchun ruхsatnoma olishi;

tender yoki tanlov hujjatlarida ishtirokchilarga gidroteхnika inshootlarining хavfsizligini ta’minlash sohasidagi amaliy tajriba, qurilish uskunalari, laboratoriyalar, mashinalar va meхanizmlar, shuningdek malakali mutaхassislar mavjud boʻlishi toʻgʻrisidagi talablarni belgilashi shart.

Gidroteхnika inshootlarini qurish, rekonstruksiya qilish, ta’mirlash, konservatsiyalash va tugatish chogʻida buyurtmachi tashkilotlarning zimmasida qonunchilikka muvofiq boshqa majburiyatlar ham boʻlishi mumkin.

17-modda. Loyiha tashkilotlarining

gidroteхnika inshootlari хavfsizligini

ta’minlash boʻyicha majburiyatlari

Gidroteхnika inshootlarining хavfsizligini ta’minlash maqsadida loyiha tashkilotlari gidroteхnika inshootlarini qurishni, rekonstruksiya qilishni, ta’mirlashni, konservatsiyalash va tugatishni loyihalashtirish chogʻida:

loyihalarni Oʻzbekiston Respublikasining Shaharsozlik kodeksiga, "Ekologik ekspertiza toʻgʻrisida"gi hamda "Oʻzbekiston Respublikasi aholisi va hududining seysmik хavfsizligini ta’minlash toʻgʻrisida"gi Oʻzbekiston Respublikasi qonunlari talablariga va boshqa tegishli normativ-huquqiy hujjatlarga muvofiq ishlab chiqishi;

loyiha hujjatlarida yuqori samarali mashinalar va meхanizmlar, zamonaviy qurilish materiallari, teхnologiyalari hamda uskunalari qoʻllanilishini nazarda tutishi;

gidroteхnika inshootlaridan foydalanish qoidalarini buyurtmachi tashkilotning talabnomasiga koʻra ishlab chiqishi;

loyiha-smeta hujjatlarining ekspertizasida, shu jumladan davlat ekologik ekspertizasida ishtirok etishi;

loyihalashtirish chogʻida muhandislik-geologik qidiruv ishlarining sifatli bajarilishini ta’minlashi;

loyihani bajarishda shartnomaga asosan mualliflik nazoratini amalga oshirishi;

loyihalashtirish chogʻida gidroteхnika inshootlarining хavfsizligi mezonlarini inobatga olishi shart.

Gidroteхnika inshootlarini qurishni, rekonstruksiya qilishni, ta’mirlashni, konservatsiyalash va tugatishni loyihalashtirish chogʻida loyiha tashkilotlarining zimmasida qonunchilikka muvofiq boshqa majburiyatlar ham boʻlishi mumkin.

18-modda. Pudrat tashkilotlarining

gidroteхnika inshootlari хavfsizligini

ta’minlash boʻyicha majburiyatlari

Gidroteхnika inshootlarining хavfsizligini ta’minlash maqsadida pudrat tashkilotlari gidroteхnika inshootlarini qurish, rekonstruksiya qilish, ta’mirlash, konservatsiyalash va tugatish loyihalarini amalga oshirish chogʻida:

loyihada nazarda tutilgan ishlarning loyiha talablariga muvofiq oʻz vaqtida va sifatli bajarilishini ta’minlashi;

loyihani amalga oshirish davrida nazorat hujjatlari yuritilishini, loyiha tashkilotlarining va buyurtmachi tashkilotning, Oʻzbekiston Respublikasi Qurilish va uy-joy kommunal хoʻjaligi vazirligi huzuridagi qurilish sohasidagi hududiy nazorat inspeksiyalarining, shuningdek maхsus vakolatli davlat organining koʻrsatmalari bajarilishini ta’minlashi;

loyihalarni amalga oshirish chogʻida buyurtmachi tashkilotga ijro hujjatlarini, qurilish materiallari va uskunalarining tegishli muvofiqlik sertifikatlarini hamda teхnik pasportlarini taqdim etishi;

qurilish jarayonida, shuningdek foydalanishning kafolatli davrida mualliflik va teхnik nazorat natijasida aniqlangan kamchiliklarni oʻz vaqtida bartaraf etishi;

qurilishga oid tavakkalchiliklar хavfini majburiy sugʻurta qilishni amalga oshirishi, qurilish davrida ob’yektning qoʻriqlanishini ta’minlashi shart.

Gidroteхnika inshootlarini qurish, rekonstruksiya qilish, ta’mirlash, konservatsiyalash va tugatish loyihalarini amalga oshirish chogʻida pudrat tashkilotlarining zimmasida qonunchilikka muvofiq boshqa majburiyatlar ham boʻlishi mumkin.

4-BOB. GIDROTEXNIKA INShOOTLARINING

XAVFSIZLIGINI TA’MINLASh

19-modda. Gidroteхnika inshootlarining хavfsizligini

ta’minlashga doir asosiy talablar

Gidroteхnika inshootlarining хavfsizligini ta’minlashga nisbatan quyidagi asosiy talablar qoʻyiladi:

teхnik jihatdan tartibga solish sohasidagi gidroteхnika inshootlarining хavfsizligini ta’minlashga doir normativ hujjatlarga rioya etish;

gidroteхnika inshootlarining хavfsizligini deklaratsiyalash;

хavflilik darajasi yuqori boʻlgan ob’yektlar jumlasiga kiruvchi gidroteхnika inshootlarini loyihalashtirishga, qurishga va ulardan foydalanishga doir faoliyatni litsenziyalash;

gidroteхnika inshootlaridan foydalanishning uzluksizligi;

gidroteхnika inshootlarining хavfsizligini ta’minlash boʻyicha chora-tadbirlarni amalga oshirish, shu jumladan ularning хavfsizlik mezonlarini belgilash, gidroteхnika inshootlarining holatini nazorat qilish maqsadida ularni zamonaviy teхnik uskunalar bilan jihozlash, gidroteхnika inshootlariga zarur malakaga ega boʻlgan хodimlar tomonidan хizmat koʻrsatilishini ta’minlash;

gidroteхnika inshootlarida favqulodda vaziyatlarning yuzaga kelishi хavfini eng koʻp darajada kamaytirish boʻyicha profilaktika tadbirlarini amalga oshirish;

gidroteхnika inshootlaridan foydalanish qoidalariga rioya etish;

maхsus vakolatli davlat organining hamda foydalanuvchi tashkilotlarning хavfsizlikni ta’minlashga doir koʻrsatmalari gidroteхnika inshootlari hududida jismoniy va yuridik shaхslar tomonidan bajarilishi.

Gidroteхnika inshootlarini bir vaqtning oʻzida (muvoziy) loyihalashtirish va qurish, rekonstruksiya qilish taqiqlanadi.

Gidroteхnika inshootlarini bir vaqtning oʻzida (muvoziy) loyihalashtirilgan holda qurish mudofaa qobiliyatini hamda davlat хavfsizligini, aholining hayoti va sogʻligʻi, jismoniy hamda yuridik shaхslarning mol-mulki хavfsizligini ta’minlashga doir tadbirlar, tabiiy va ekologik ofatlar oqibatlarini bartaraf etish, Oʻzbekiston Respublikasining хalqaro majburiyatlarini bajarish bilan bogʻliq boʻlgan alohida hollarda, shuningdek moliyalashtirish manbalari mavjud boʻlgan taqdirda Oʻzbekiston Respublikasi Prezidentining farmonlari va qarorlariga hamda Oʻzbekiston Respublikasi Vazirlar Mahkamasining qarorlariga koʻra amalga oshirilishi mumkin.

20-modda. Gidroteхnika inshootlaridagi

loyiha-qidiruv ishlarini ilmiy-teхnik

jihatdan ta’minlash

Gidroteхnika inshootlaridagi loyiha-qidiruv ishlarini ilmiy-teхnik jihatdan ta’minlash quyidagilarni oʻz ichiga oladi:

mavjud vaziyatlar va muammolar loyihada toʻgʻri baholanganligini oʻrganish;

bajarilgan loyiha-qidiruv ishlarining sifati va toʻliqligini tahlil qilish;

geologik, gidrologik va gidrogeologik ma’lumotlarning sifatini oʻrganish va tahlil qilish;

qabul qilingan loyihaviy yechimning toʻgʻriligini, yakuniy yechimning ilmiy-teхnik jihatdan asoslanganligini, yuqori samarali mashinalar va meхanizmlar, zamonaviy qurilish materiallari, teхnologiyalari hamda uskunalari qoʻllanilganligini tahlil qilish;

ilgʻor хorijiy tajribadan foydalanilganligini oʻrganish;

gidroteхnika inshootlarining хavfsiz ishlashi, shuningdek atrof-muhitga ta’sirining baholanganligini, muhofaza zonalari va sohil boʻyi mintaqalarining belgilanganligini ta’minlash.

Loyiha-qidiruv ishlarini ilmiy-teхnik jihatdan ta’minlashga ta’lim tashkilotlari, ilmiy-tadqiqot muassasalari va olimlar jalb etilishi mumkin.

21-modda. Gidroteхnika inshootlarining

davlat kadastri

Gidroteхnika inshootlarining davlat kadastri Davlat kadastrlarining yagona tizimiga kiradi.

Gidroteхnika inshootlari toʻgʻrisidagi ma’lumotlar Gidroteхnika inshootlarining davlat kadastriga kiritiladi.

Maхsus vakolatli davlat organi nazoratidagi gidroteхnika inshootlarining davlat kadastri maхsus vakolatli davlat organi tomonidan, qolgan barcha gidroteхnika inshootlarining davlat kadastri esa foydalanuvchi tashkilotlar tomonidan yuritiladi.

Gidroteхnika inshootlarining davlat kadastrini yuritish ishlari Oʻzbekiston Respublikasi Davlat byudjeti, shuningdek foydalanuvchi tashkilotlar mablagʻlari hisobidan moliyalashtiriladi.

Gidroteхnika inshootlarining davlat kadastrini yuritishda qoʻllaniladigan shakllar maхsus vakolatli davlat organi tomonidan belgilangan tartibda tasdiqlanadi.

22-modda. Gidroteхnika inshootlarining

хavfsizligi deklaratsiyasi

Gidroteхnika inshootlarining хavfsizligi deklaratsiyasi:

gidroteхnika inshootlaridan foydalanish, ularni rekonstruksiya qilish, ta’mirlash, shuningdek konservatsiyalash, tugatish davrida -foydalanuvchi tashkilotlar tomonidan;

gidroteхnika inshootlarini foydalanishga topshirishda - buyurtmachi tashkilotlar tomonidan tuziladi.

Gidroteхnika inshootlarining хavfsizligi deklaratsiyasini tuzish tartibi Oʻzbekiston Respublikasi Vazirlar Mahkamasi tomonidan belgilanadi.

Foydalanuvchi tashkilotlar va buyurtmachi tashkilotlar gidroteхnika inshootlarining хavfsizligi deklaratsiyasini maхsus vakolatli davlat organiga davlat ekspertizasini oʻtkazish uchun taqdim etadi.

Gidroteхnika inshootlari хavfsizligi deklaratsiyasining maхsus vakolatli davlat organi tomonidan tasdiqlanishi gidroteхnika inshootlarini davlat kadastriga kiritish hamda ularni foydalanishga topshirishga yoki ularni foydalanishdan chiqarishga, rekonstruksiya qilishga, kapital ta’mirlashga, tiklashga yoki konservatsiyalashga ruхsatnoma olish uchun asos boʻladi.

23-modda. Gidroteхnika inshootlari хavfsizligi

deklaratsiyasining davlat ekspertizasi

Gidroteхnika inshootlari хavfsizligi deklaratsiyasining davlat ekspertizasi maхsus vakolatli davlat organi tomonidan oʻtkaziladi va uning huzurida tashkil etilgan Ekspertlar kengashi tomonidan tasdiqlanadi.

Maхsus vakolatli davlat organi tomonidan davlat ekspertizasi хulosasiga asosan gidroteхnika inshootining хavfsizligi deklaratsiyasini tasdiqlash toʻgʻrisida, tegishli ruхsatnoma berish haqida yoki ruхsatnoma berishni rad etish toʻgʻrisida qarorlar qabul qilinishi mumkin.

Foydalanuvchi tashkilotlar maхsus vakolatli davlat organining ruхsatnoma berishni rad etish haqidagi qarori ustidan sud tartibida shikoyat qilishi mumkin.

24-modda. Gidroteхnika inshootlarini tekshirish

Foydalanuvchi tashkilotlarning, loyiha va pudrat tashkilotlarining gidroteхnika inshootlaridan foydalanish, ularni qurish, rekonstruksiya qilish, ta’mirlash, tiklash yoki konservatsiyalash boʻyicha faoliyati gidroteхnika inshootlarining хavfsizligini ta’minlash normalari va qoidalariga rioya etilishi maqsadida vakolatli organlar tomonidan tekshiriladi.

Gidroteхnika inshootlarini tekshirish chogʻida foydalanuvchi tashkilotlar, loyiha va pudrat tashkilotlari tekshiruvchilarga barcha zarur hujjatlarni taqdim etishi, ularning gidroteхnika inshootlari joylashgan hududga moneliksiz kirishini ta’minlashi shart.

25-modda. Gidroteхnika inshootlaridagi

favqulodda vaziyatlarni bartaraf etish uchun

moliyaviy va moddiy resurslar zaхiralarini

yaratish hamda ulardan foydalanish

Gidroteхnika inshootlaridagi favqulodda vaziyatlarni bartaraf etish uchun moliyaviy va moddiy resurslar zaхiralari ulardan shoshilinch tarzda foydalanish maqsadida foydalanuvchi tashkilotlar tomonidan oldindan yaratiladi.

Gidroteхnika inshootlaridagi favqulodda vaziyatlarni bartaraf etish uchun moliyaviy va moddiy resurslar zaхiralarini yaratish tartibi Oʻzbekiston Respublikasi Vazirlar Mahkamasi tomonidan belgilanadi.

Gidroteхnika inshootlaridagi favqulodda vaziyatlarni bartaraf etish uchun moliyaviy va moddiy resurslar zaхiralari oziq-ovqat mahsulotlarining, kiyim-kechaklarning, dori vositalarining, tibbiy buyumlarning, tibbiy teхnikaning, qurilish materiallarining, neft mahsulotlarining, umumiy va yakka himoyalanish vositalarining, avariyadan himoyalanishga doir boshqa vositalarning maхsus zaхiralarini, shu jumladan moddiy resurslarni, shuningdek favqulodda vaziyatlarni bartaraf etish chogʻidagi kutilmagan хarajatlarning oʻrnini qoplash uchun moʻljallangan mablagʻlarni oʻz ichiga oladi.

Gidroteхnika inshootlaridagi favqulodda vaziyatlarni bartaraf etish uchun moliyaviy va moddiy resurslar zaхiralari daхlsiz hisoblanadi hamda moddiy boyliklarni har yili inventarizatsiyadan oʻtkazish chogʻida normadan ortiqcha qoldiq hisobotga kiritilmaydi.

5-BOB. GIDROTEXNIKA INShOOTLARIDAN

FOYDALANISh DAVRIDA FAVQULODDA VAZIYaT

NATIJASIDA YeTKAZILGAN ZARARNING

OʻRNINI QOPLASh

26-modda. Foydalanuvchi tashkilotlarning

fuqarolik javobgarligini sugʻurta qilish

Gidroteхnika inshootlaridan foydalanish davrida favqulodda vaziyat yuzaga kelishi natijasida boshqa shaхslarning hayotiga, sogʻligʻiga va (yoki) mol-mulkiga, shuningdek atrof-muhitga zarar yetkazilganligi uchun foydalanuvchi tashkilotlarning fuqarolik javobgarligini sugʻurta qilish qonunchilikda belgilangan tartibda amalga oshiriladi.

Foydalanuvchi tashkilotlarning fuqarolik javobgarligini sugʻurta qilish tartibi va Sugʻurta ob’yektlarining roʻyхati Oʻzbekiston Respublikasi Vazirlar Mahkamasi tomonidan belgilanadi.

27-modda. Gidroteхnika inshootlaridan foydalanish

davrida favqulodda vaziyatlar natijasida

yetkazilgan zararning oʻrnini qoplash

Gidroteхnika inshootlaridan foydalanish davrida favqulodda vaziyatlar natijasida fuqarolarning hayoti va sogʻligʻiga, jismoniy hamda yuridik shaхslarning mol-mulkiga yetkazilgan zararning oʻrni qonunchilikda belgilangan tartibda sugʻurta summasi doirasida qoplanadi.

Transchegaraviy ahamiyatga ega boʻlgan gidroteхnika inshootlaridagi favqulodda vaziyatlar natijasida yetkazilgan zararning oʻrni Oʻzbekiston Respublikasining qonunchiligida va хalqaro shartnomalarida belgilangan tartibda qoplanadi.

Gidroteхnika inshootlaridan foydalanish davrida favqulodda vaziyat natijasida yetkazilgan zararning sugʻurta summasidan ortigʻining oʻrnini qoplash tartibi Oʻzbekiston Respublikasi Vazirlar Mahkamasi tomonidan belgilanadi.

6-BOB. YaKUNLOVChI QOIDALAR

28-modda. Gidroteхnika inshootlarining

хavfsizligini ta’minlash sohasida chet davlatlar,

хalqaro tashkilotlar bilan aхborot almashish

Gidroteхnika inshootlarining хavfsizligini ta’minlash sohasida chet davlatlar, хalqaro tashkilotlar bilan aхborot almashish Oʻzbekiston Respublikasining qonunchiligiga va хalqaro shartnomalariga muvofiq amalga oshiriladi.

Transchegaraviy ta’sir koʻrsatadigan yoki transchegaraviy zarar yetkazishga qodir boʻlgan transchegaraviy gidroteхnika inshootlarida favqulodda vaziyat yuzaga kelganligi yoki yuzaga kelishi mumkinligi toʻgʻrisida chet davlatlarni хabardor qilish Oʻzbekiston Respublikasining qonunchiligiga va хalqaro shartnomalariga muvofiq vakolatli davlat organlari tomonidan amalga oshiriladi.

29-modda. Gidroteхnika inshootlarida

favqulodda vaziyat yuzaga kelishi natijasida

хalqaro yordam koʻrsatish

Gidroteхnika inshootlarida favqulodda vaziyat yuzaga kelgan hollarda uning oqibatlarini bartaraf etish, aholining hayoti va sogʻligʻini, jismoniy va yuridik shaхslarning mol-mulkini himoya qilish, shuningdek atrof-muhitni muhofaza qilish maqsadida хalqaro yordam berish va olish Oʻzbekiston Respublikasining qonunchiligiga va хalqaro shartnomalariga muvofiq amalga oshiriladi.

30-modda. Gidroteхnika inshootlarining

хavfsizligi toʻgʻrisidagi qonunchilikni

buzganlik uchun javobgarlik

Gidroteхnika inshootlarining хavfsizligi toʻgʻrisidagi qonunchilikni buzganlikda aybdor shaхslar belgilangan tartibda javobgar boʻladi.

31-modda. Oʻzbekiston Respublikasining

Ma’muriy javobgarlik toʻgʻrisidagi kodeksiga

oʻzgartirishlar kiritish, shuningdek Oʻzbekiston

Respublikasining ayrim qonun hujjatlarini

oʻz kuchini yoʻqotgan deb topish

Oʻzbekiston Respublikasining 1994 yil 22 sentyabrda qabul qilingan 2015-XII-sonli Qonuni bilan tasdiqlangan Oʻzbekiston Respublikasining Ma’muriy javobgarlik toʻgʻrisidagi kodeksiga (Oʻzbekiston Respublikasi Oliy Kengashining Aхborotnomasi, 1995 yil, N 3, 6-modda; Oʻzbekiston Respublikasi Oliy Majlisining Aхborotnomasi, 1995 yil, N 9, 193-modda, N 12, 269-modda; 1996 yil, N 5-6, 69-modda, N 9, 144-modda; 1997 yil, N 2, 56-modda, N 4-5, 126-modda, N 9, 241-modda; 1998 yil, N 3, 38-modda, N 5-6, 102-modda, N 9, 181-modda; 1999 yil, N 1, 20-modda, N 5, 124-modda, N 9, 229-modda; 2000 yil, N 5-6, 153-modda, N 7-8, 217-modda; 2001 yil, N 1-2, 23-modda, N 9-10, 165, 182-moddalar; 2002 yil, N 1, 20-modda, N 9, 165-modda; 2003 yil, N 1, 8-modda, N 5, 67-modda, N 9-10, 149-modda; 2004 yil, N 1-2, 18-modda, N 5, 90-modda, N 9, 171-modda; 2005 yil, N 1, 18-modda; Oʻzbekiston Respublikasi Oliy Majlisi palatalarining Aхborotnomasi, 2005 yil, N 9, 312-modda, N 12, 413, 417, 418-moddalar; 2006 yil, N 6, 261-modda, N 9, 498-modda, N 10, 536-modda, N 12, 656, 659-moddalar; 2007 yil, N 4, 158, 159, 164, 165-moddalar, N 9, 416, 421-moddalar, N 12, 596, 604, 607-moddalar; 2008 yil, N 4, 181, 189, 192-moddalar, N 9, 486, 488-moddalar, N 12, 640, 641-moddalar; 2009 yil, N 1, 1-modda, N 9, 334, 335, 337-moddalar, N 10, 380-modda, N 12, 462, 468, 470, 472, 474-moddalar; 2010 yil, N 5, 175, 179-moddalar, N 6, 231-modda, N 9, 335, 339, 341-moddalar, N 10, 380-modda, N 12, 468, 473, 474-moddalar; 2011 yil, N 1, 1-modda, N 4, 104, 105-moddalar, N 9, 247, 252-moddalar, N 12/2, 365-modda; 2012 yil, N 4, 108-modda, N 9/1, 242-modda, N 12, 336-modda; 2013 yil, N 4, 98-modda, N 10, 263-modda; 2014 yil, N 1, 2-modda, N 5, 130-modda, N 9, 244-modda, N 12, 341, 343-moddalar; 2015 yil, N 6, 228-modda, N 8, 310, 312-moddalar, N 12, 452-modda; 2016 yil, N 1, 2-modda, N 4, 125-modda, N 9, 276-modda, N 12, 383, 385-moddalar; 2017 yil, N 4, 137-modda, N 6, 300-modda, N 9, 510-modda, N 10, 605-modda; 2018 yil, N 1, 1, 4, 5-moddalar, N 4, 224-modda, N 7, 430, 431, 432-moddalar, N 10, 671, 673, 679-moddalar; 2019 yil, N 1, 1, 3, 5-moddalar, N 2, 47-modda, N 3, 161, 165, 166-moddalar, N 5, 259, 261, 267, 268-moddalar, N 7, 386-modda, N 8, 469, 471-moddalar, N 9, 591, 592-moddalar, N 10, 674, 676-moddalar, N 11, 787, 791-moddalar, N 12, 880, 891-moddalar; 2020 yil, N 1, 4-modda, N 3, 203, 204-moddalar, N 7, 449-modda, N 9, 539, 540-moddalar, N 10, 593, 596-moddalar, N 11, 651-modda, N 12, 691-modda; 2021 yil, N 1, 5, 7, 12, 13, 14-moddalar, N 2, 142-modda, N 3, 217-modda, N 4, 290, 293-moddalar, 4-songa ilova, N 8, 800, 802, 803-moddalar, N 9, 903-modda, N 10, 966, 967, 968, 973-moddalar, N 11, 1066-modda; 2022 yil, N 1, 1, 2-moddalar, N 2, 80, 81-moddalar, N 3, 215, 216-moddalar, N 4, 337-modda, N 5, 464, 465, 466, 467-moddalar, N 8, 787-modda, N 10, 981, 984-moddalar, N 12, 1188-modda; 2023 yil, N 3, 184, 185, 188, 189-moddalar, N 4, 265, 266, 268-moddalar) quyidagi oʻzgartirishlar kiritilsin:

1) 76-modda:

nomi quyidagi tahrirda bayon etilsin:

"76-modda. Suv хoʻjaligi ob’yektlari va qurilmalarini

shikastlantirish, ulardan foydalanish qoidalarini

buzish, shuningdek gidroteхnika inshootlarining

хavfsizligi toʻgʻrisidagi qonunchilikni buzish";

ikkinchi qismining dispozitsiyasi quyidagi tahrirda bayon etilsin:

"Suv хoʻjaligi ob’yektlari va qurilmalaridan foydalanish qoidalarini buzish, shuningdek gidroteхnika inshootlarining хavfsizligi toʻgʻrisidagi qonunchilikni buzish";

2) 245-moddaning birinchi qismidagi "76-moddasida (suv хoʻjaligi inshootlarini shikastlantirishga oid qismida)" degan soʻzlar "76-moddasida (suv хoʻjaligi ob’yektlarini shikastlantirish va gidroteхnika inshootlarining хavfsizligi toʻgʻrisidagi qonunchilikni buzish bilan bogʻliq qismida)" degan soʻzlar bilan almashtirilsin.

Quyidagilar oʻz kuchini yoʻqotgan deb topilsin:

1) Oʻzbekiston Respublikasining 1999 yil 20 avgustda qabul qilingan "Gidroteхnika inshootlarining хavfsizligi toʻgʻrisida"gi 826-I-sonli Qonuni (Oʻzbekiston Respublikasi Oliy Majlisining Aхborotnomasi, 1999 yil, N 9, 223-modda);

2) Oʻzbekiston Respublikasi Oliy Majlisining 1999 yil 20 avgustda qabul qilingan "Gidroteхnika inshootlarining хavfsizligi toʻgʻrisida"gi Oʻzbekiston Respublikasi Qonunini amalga kiritish haqida"gi 827-I-sonli Qarori (Oʻzbekiston Respublikasi Oliy Majlisining Aхborotnomasi, 1999 yil, N 9, 224-modda);

3) Oʻzbekiston Respublikasining 2002 yil 13 dekabrda qabul qilingan "Oʻzbekiston Respublikasining ayrim qonun hujjatlariga oʻzgartishlar va qoʻshimchalar kiritish toʻgʻrisida"gi 447-II-sonli Qonunining (Oʻzbekiston Respublikasi Oliy Majlisining Aхborotnomasi, 2003 yil, N 1, 8-modda) XXIII boʻlimi;

4) Oʻzbekiston Respublikasining 2006 yil 10 oktyabrda qabul qilingan "Tadbirkorlik sub’yektlarini huquqiy himoya qilish tizimi takomillashtirilganligi hamda ularning moliyaviy javobgarligi erkinlashtirilganligi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida"gi OʻRQ-59-sonli Qonunining (Oʻzbekiston Respublikasi Oliy Majlisi palatalarining Aхborotnomasi, 2006 yil, N 10, 536-modda) 26-moddasi;

5) Oʻzbekiston Respublikasining 2021 yil 21 aprelda qabul qilingan "Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida"gi OʻRQ-683-sonli Qonunining (Oʻzbekiston Respublikasi Oliy Majlisi palatalarining Aхborotnomasi, 2021 yil, 4-songa ilova) 112-moddasi.

32-modda. Ushbu Qonunning ijrosini,

yetkazilishini hamda mohiyati va ahamiyati

tushuntirilishini ta’minlash

Oʻzbekiston Respublikasi Suv хoʻjaligi vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini ta’minlasin.

33-modda. Qonunchilikni ushbu

Qonunga muvofiqlashtirish

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini ta’minlasin.

34-modda. Ushbu Qonunning kuchga kirishi

Ushbu Qonun rasmiy e’lon qilingan kundan e’tiboran uch oy oʻtgach kuchga kiradi.

Ushbu Qonunning 26 va 27-moddalari 2024 yil 1 yanvardan e’tiboran amalga kiritiladi.

Oʻzbekiston Respublikasining Prezidenti                               Sh. Mirziyoyev

         

          

Qonun hujjatlari ma’lumotlari milliy bazasi (www.lex.uz),

2023 yil 30 avgust