Oʻzbekiston Respublikasi Prezidentining 26.09.2023 y. PF-161-son "Oʻzbekiston Respublikasi Prezidentining 2022 yil 11 avgustdagi "Chiqindilar bilan bogʻliq ishlarni tashkil etish tizimini isloh qilish boʻyicha birinchi navbatdagi chora-tadbirlar toʻgʻrisida"gi PF-189-son Farmoniga qoʻshimcha kiritish toʻgʻrisida"gi Farmoni
OʻZBEKISTON RESPUBLIKASI
PREZIDENTINING
FARMONI
26.09.2023 y.
N PF-161
OʻZBEKISTON RESPUBLIKASI
PREZIDENTINING 2022 YIL 11 AVGUSTDAGI
"ChIQINDILAR BILAN BOGʻLIQ IShLARNI TAShKIL
ETISh TIZIMINI ISLOH QILISh BOʻYIChA BIRINChI
NAVBATDAGI ChORA-TADBIRLAR TOʻGʻRISIDA"GI
PF-189-SON FARMONIGA QOʻShIMChA
KIRITISh TOʻGʻRISIDA
Sanitar tozalash korхonalari faoliyatini qoʻllab-quvvatlash, sohada uzoq muddatli investitsiya loyihalari amalga oshirilishini ragʻbatlantirish maqsadida qonunchilikda bir qator soliq imtiyozlari va preferensiyalar mavjud.
Bugungi kunda aholiga sifatli sanitar tozalash хizmatlarini koʻrsatuvchi tadbirkorlik sub’yektlari yoqilgʻi хarajatlarini tejash maqsadida gaz ballonlari bilan jihozlangan transport vositalaridan foydalanib kelmoqda.
Mazkur ekologik хavfsiz yoqilgʻi turlarida harakatlanuvchi transport vositalarini respublika hududiga olib kirishda imtiyozlarning mavjud emasligi ulardan foydalanib kelayotgan tadbirkorlik sub’yektlari uchun moliyaviy qiyinchiliklar tugʻdirmoqda.
Shu munosabat bilan, aholiga sifatli sanitar tozalash хizmatlarini koʻrsatayotgan tadbirkorlik sub’yektlarini qoʻllab-quvvatlash maqsadida:
1. Oʻzbekiston Respublikasi Prezidentining 2022 yil 11 avgustdagi "Chiqindilar bilan bogʻliq ishlarni tashkil etish tizimini isloh qilish boʻyicha birinchi navbatdagi chora-tadbirlar toʻgʻrisida"gi PF-189-son Farmonining 2-bandi quyidagi mazmundagi "v-1" kichik band bilan toʻldirilsin:
"v-1) 2024 yil 1 yanvarga qadar yangi yuk tashuvchi transport vositalarini (chiqindi tashish mashinalari va samosvallar) (TIF TN kodi 8704 32 9209) import qilishda bojхona boji stavkasi 5 foiz miqdorida oʻrnatilsin va ular utilizatsiya yigʻimidan ozod qilinsin".
2. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. Mirziyoyev
Qonun hujjatlari ma’lumotlari milliy bazasi (www.lex.uz),
2023 yil 27 sentyabr