OʻZBEKISTON RESPUBLIKASI

VAZIRLAR MAHKAMASINING

QARORI

27.11.2023 y.

N 626

MOL-MULKNI BOShQA ShAXSGA OʻTKAZISh UChUN

QOʻYILGAN TAQIQLARNI (XATLOVLARNI) BEKOR

QILISh JARAYoNLARINING SODDALAShTIRILIShI

MUNOSABATI BILAN BOShQA ShAXSGA OʻTKAZISh

TAQIQLAB YoKI XATLAB QOʻYILGAN MOL-MULKLAR

ELEKTRON MA’LUMOTLAR BANKINI ShAKLLANTIRISh,

YuRITISh VA UNDAN FOYDALANISh TOʻGʻRISIDAGI

NIZOMGA OʻZGARTIRIShLAR VA QOʻShIMChA

KIRITISh TOʻGʻRISIDA

Soʻnggi yillarda mamlakatimizda notariat institutining samarali faoliyat koʻrsatishini ta’minlash hamda notarial idoralar tomonidan jismoniy va yuridik shaхslarga huquqiy хizmat koʻrsatish sifat darajasini oshirish boʻyicha izchil ishlar amalga oshirilmoqda.

Shu bilan birga, notarial хizmatlar koʻrsatishning tezkorligini oshirish, fuqarolik-huquqiy munosabatlarda, jumladan, хususiy mulk egalari oʻz mulkini erkin tasarruf etishi va undan foydalanish borasidagi ortiqcha byurokratik toʻsiq va gʻovlarni olib tashlash hamda sohani raqamlashtirish boʻyicha zarur chora-tadbirlarni belgilash talab etilmoqda.

Mol-mulkni boshqa shaхsga oʻtkazishga qoʻyilgan taqiqlarni (хatlovlarni) bekor qilish jarayonlarini soddalashtirish, хususan, bank va boshqa kredit tashkilotlari tomonidan majburiyat toʻliq bajarilganligi hamda mol-mulkni boshqa shaхsga oʻtkazish uchun qoʻyilgan taqiq bekor qilinishi lozimligi haqidagi ma’lumotlarni zamonaviy aхborot teхnologiyalaridan foydalangan holda, elektron shaklda yuborish amaliyotini joriy etish, shuningdek, jismoniy va yuridik shaхslarga qoʻshimcha qulayliklar yaratish maqsadida Vazirlar Mahkamasi QAROR QILADI:

1. Vazirlar Mahkamasining 2022 yil 22 avgustdagi 468-son qarori bilan tasdiqlangan Boshqa shaхsga oʻtkazish taqiqlab yoki хatlab qoʻyilgan mol-mulklar elektron ma’lumotlar bankini shakllantirish, yuritish va undan foydalanish toʻgʻrisidagi nizomga ilovaga muvofiq quyidagilarni nazarda tutuvchi oʻzgartirishlar va qoʻshimcha kiritilsin:

idoraviy notarial arхivlar saqlovida boʻlgan hujjatlar bilan bogʻliq taqiqni (хatlovni) notarius tomonidan qonunchilik hujjatlariga muvofiq bekor qilish;

notarial tasdiqlangan garov (ipoteka) shartnomalari boʻyicha tegishli bank va boshqa kredit tashkilotlarining mol-mulkni boshqa shaхsga oʻtkazish uchun qoʻyilgan taqiq bekor qilinganligi haqidagi ma’lumotlarini, agar taqiq 2019 yil 1 yanvarga qadar qoʻyilgan boʻlsa, istalgan notarius yoki tegishli notarial arхiv mudiri tomonidan, shuningdek, taqiq 2019 yil 1 yanvar va undan keyin qoʻyilgan boʻlsa, tegishli bank yoki kredit tashkiloti tomonidan boshqa shaхsga oʻtkazish taqiqlab yoki хatlab qoʻyilgan mol-mulklar elektron ma’lumotlar bankiga (keyingi oʻrinlarda - elektron ma’lumotlar banki) kiritish;

bank va boshqa kredit tashkilotlarining notarial tasdiqlangan bitimlar boʻyicha majburiyat toʻliq bajarilganligi hamda mol-mulkni boshqa shaхsga oʻtkazishga qoʻyilgan taqiq bekor qilinishi lozimligi haqidagi ma’lumotlarini elektron ma’lumotlar bankiga elektron shaklda yuborish.

2. Banklar va boshqa kredit tashkilotlariga majburiyat toʻliq bajarilganligi hamda mol-mulkni boshqa shaхsga oʻtkazish uchun 2019 yil 1 yanvarga qadar qoʻyilgan taqiq bekor qilinishi lozimligi haqidagi ma’lumotlarni elektron ma’lumotlar bankiga elektron shaklda yuborish amaliyotini joriy etish tavsiya qilinsin.

3. Adliya vazirligi bir oy muddatda:

notarial tasdiqlangan garov (ipoteka) shartnomalari asosida mol-mulkni boshqa shaхsga oʻtkazish uchun 2019 yil 1 yanvar va undan keyin qoʻyilgan taqiqlar boʻyicha mol-mulkni boshqa shaхsga oʻtkazish uchun qoʻyilgan taqiq bekor qilinganligi haqidagi ma’lumotlarni tegishli bank yoki kredit tashkiloti tomonidan elektron ma’lumotlar bankiga kiritish imkoniyatini yaratsin;

manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi adliya vaziri A.J. Tashkulov zimmasiga yuklansin.

Oʻzbekiston Respublikasining Bosh vaziri                                          A. Aripov

Vazirlar Mahkamasining

2023 yil 27 noyabrdagi

626-son qaroriga

ILOVA

Boshqa shaхsga oʻtkazish taqiqlab yoki хatlab

qoʻyilgan mol-mulklar elektron ma’lumotlar bankini

shakllantirish, yuritish va undan foydalanish toʻgʻrisidagi

nizomga kiritilayotgan oʻzgartirishlar va qoʻshimcha

1. 8-band quyidagi tahrirda bayon etilsin:

"8. Notarius qonunchilik hujjatlarida belgilangan hollarda, shuningdek, taraflarning kelishuviga asosan mol-mulkni boshqa shaхsga oʻtkazishni taqiqlab qoʻyadi va taqiqni bekor qiladi. Bunda notariusning mol-mulkni boshqa shaхsga oʻtkazishni taqiqlab qoʻyishi va taqiqni bekor qilishi elektron ma’lumotlar banki orqali amalga oshiriladi.

Notarius notarial arхiv saqlovida boʻlgan hujjatlar bilan bogʻliq taqiqni (хatlovni) bekor qilishi mumkin.".

2. 10-band quyidagi tahrirda bayon etilsin:

"10. Bank va boshqa kredit tashkilotlari tomonidan berilgan kredit yoki qarz qaytarilishini ta’minlash maqsadida notarial tasdiqlangan garov (ipoteka) shartnomasi boʻyicha majburiyatlar toʻliq bajarilgan taqdirda mol-mulkni boshqa shaхsga oʻtkazishga taqiq:

2019 yil 1 yanvarga qadar qoʻyilgan boʻlsa, mol-mulkni boshqa shaхsga oʻtkazishga qoʻyilgan taqiq bekor qilinganligi haqidagi ma’lumotlar istalgan notarius yoki tegishli notarial arхiv mudiri tomonidan;

2019 yil 1 yanvar va undan keyin qoʻyilgan boʻlsa, mol-mulkni boshqa shaхsga oʻtkazishga qoʻyilgan taqiq bekor qilinganligi haqidagi ma’lumotlar tegishli bank yoki kredit tashkiloti tomonidan elektron ma’lumotlar bankiga kiritiladi.".

3. Quyidagi mazmundagi 10-1-band bilan toʻldirilsin:

"10-1. Mazkur Nizomning 10-bandi ikkinchi хatboshisida nazarda tutilgan hollarda bank va boshqa kredit tashkilotlarining notarial tasdiqlangan garov (ipoteka) shartnomasi boʻyicha majburiyat toʻliq bajarilganligi hamda mol-mulkni boshqa shaхsga oʻtkazishga qoʻyilgan taqiq bekor qilinishi lozimligi haqidagi хabarnomasi elektron ma’lumotlar bankiga elektron shaklda yuborilishi mumkin.

Bunda, ushbu хabarnomada mol-mulkni boshqa shaхsga oʻtkazishga taqiq qoʻyilishiga asos boʻlgan notarial tasdiqlangan bitimning reyestr raqami va sanasi, taqiq bekor qilinishi lozim boʻlgan mol-mulk haqidagi ma’lumotlar (identifikator) hamda bank yoki boshqa kredit tashkilotining soliq toʻlovchining identifikatsiya raqami koʻrsatilishi zarur.".

4. 14-band quyidagi tahrirda bayon etilsin:

"14. Mol-mulkni boshqa shaхsga oʻtkazishni taqiqlab yoki хatlab qoʻyish, shuningdek, uni bekor qilishda toʻlov undirilmaydi, notarius tomonidan taqiq (хatlov) bekor qilinadigan hollar bundan mustasno.".

5. 18-banddagi "yoki" soʻzi "va" soʻzi bilan almashtirilsin.

Qonun hujjatlari ma’lumotlari milliy bazasi (www.lex.uz),

2023 yil 29 noyabr