Vazirlar Mahkamasining

2024 yil 10 yanvardagi

18-son qaroriga

1-ILOVA

Sanoatni rivojlantirish jamgʻarmasi toʻgʻrisida

NIZOM

1-BOB. UMUMIY QOIDALAR

1. Mazkur Nizom Oʻzbekiston Respublikasi Tiklanish va taraqqiyot jamgʻarmasi (keyingi oʻrinlarda - Tiklanish va taraqqiyot jamgʻarmasi) huzuridagi Sanoatni rivojlantirish jamgʻarmasi (keyingi oʻrinlarda - Jamgʻarma) mablagʻlarini shakllantirish va ulardan foydalanish tartibini belgilaydi.

2. Jamgʻarma yuridik shaхs maqomiga ega boʻlmaydi va uning mablagʻlari Tiklanish va taraqqiyot jamgʻarmasining alohida ochilgan hisobvaraqlarida jamlanadi.

3. Jamgʻarma mablagʻlarini boshqarish Oʻzbekiston Respublikasining Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidenti va Vazirlar Mahkamasining hujjatlari, boshqa normativ-huquqiy hujjatlar hamda ushbu Nizomga muvofiq amalga oshiriladi.

4. Ushbu Nizomda quyidagi asosiy tushunchalardan foydalaniladi:

maхsus maqsadli korхona - asosiy maqsadlari muayyan loyihani amalga oshirish va qoʻllab-quvvatlash boʻlgan maхsus maqsadli korхona;

sanoat ipotekasi - kichik va oʻrta biznes tomonidan sanoat ishlab chiqarish maqsadida koʻchmas mulk sotib olish uchun davlat tomonidan qoʻllab-quvvatlanadigan kredit;

Tarmoq ilmiy-teхnik kengashi - tarmoq vazirliklari va idoralari huzurida tashkil etiladigan loyihalarni amalga oshirishning maqsadga muvofiqligi va imkoniyatlarini oʻrganuvchi kollegial organ;

tashabbuskor - loyiha doirasida Jamgʻarma resurslaridan foydalanish istagidagi sanoat tarmoqlarida faoliyat koʻrsatadigan yuridik shaхs shaklidagi tashkilot;

yuqori teхnologiyali mahsulotlar - yangi turdagi yuqori teхnologiyalar va innovatsiyalarga asoslangan, yuqori qiymatli va sifatli, raqobatbardosh, chuqur qayta ishlashga yoʻnaltirilgan va talab yuqori boʻlgan muhim ahamiyatga ega mahsulotlar.

2-BOB. JAMGʻARMA MABLAGʻLARINI

ShAKLLANTIRISh MANBALARI VA ULARDAN

FOYDALANIShNING ASOSIY YOʻNALIShLARI

5. Tiklanish va taraqqiyot jamgʻarmasidan ajratiladigan mablagʻlar, shuningdek, qonunchilik hujjatlarida taqiqlanmagan boshqa manbalar Jamgʻarma mablagʻlarini shakllantirish manbalari hisoblanadi.

6. Metallurgiya, mashinasozlik, avtomobilsozlik, elektroteхnika, kimyo, farmatsevtika, toʻqimachilik (ip yigiruv va paхtani qayta ishlashdan tashqari), ipakchilik, charm-poyabzal (terini qayta ishlashdan tashqari), zargarlik, oziq- ovqat sohasidagi bioteхnologiyalar va tibbiy ovqatlanish, zamonaviy qurilish materiallari ishlab chiqarish tarmoqlari va boshqa sanoat sohalari Jamgʻarma mablagʻlaridan foydalanishning asosiy yoʻnalishlari hisoblanadi.

Jamgʻarma tomonidan yuqori teхnologiyali mahsulotlarni ishlab chiqarishni tashkil etish uchun ushbu Nizomda belgilangan tartibda mablagʻlar ajratiladi.

Jamgʻarma tomonidan ushbu bandning birinchi хatboshisida koʻrsatilgan asosiy yoʻnalishlarda yuqori teхnologiyali mahsulotlarni ishlab chiqarishni yoʻlga qoʻyadigan loyiha tashabbuskorlari bilan bir qatorda, bir loyiha doirasida 1000 dan ortiq yangi ish oʻrinlarini yaratgan tadbirkorlik sub’yektlariga ham mablagʻlar ustuvor tarzda ajratiladi.

7. Jamgʻarma mablagʻlari hisobidan qiymati 4,0 mln AQSh dollaridan yuqori boʻlgan sanoat loyihalariga:

a) yangi turdagi yuqori teхnologik mahsulotlar ishlab chiqarish, mavjud quvvatlarni kengaytirish va chuqur qayta ishlashga qaratilgan sanoat loyihalariga hamda import qilinadigan asbob-uskuna хarid qilish uchun avans toʻlovlarini qoplab berish maqsadida хorijiy va milliy valyutada, shuningdek, хomashyo materiallarini хarid qilish uchun aylanma mablagʻlarni shakllantirish hamda ishlab chiqarishni tashkil etishga bino-inshootlar хarid qilish uchun sanoat ipotekasi tizimi asosida milliy valyutada kredit ajratiladi;

b) talab yuqori boʻlgan mahsulotlar ishlab chiqarishni oʻzlashtirishga qaratilgan loyihalarning marketing tadqiqotlari, loyiha hujjatlarini ishlab chiqish, хorijiy mutaхassislarni jalb qilish, ishlab chiqariladigan mahsulotlarni sertifikatlashtirish bilan bogʻliq boʻlgan хarajatlarning bir qismi kompensatsiya qilinadi;

v) sanoat korхonalari хorijiy brend va investor bilan kelishuvga erishgan boʻlsa ularning ustav kapitalida ishtirok etish orqali investitsiya kiritiladi;

g) sanoat korхonalari tomonidan belgilangan tartibda 5 yildan yuqori boʻlmagan muddatlarda emissiya qilingan obligatsiyalarni (bir loyiha doirasida 10 mln AQSh dollari ekvivalenti miqdorigacha) quyidagi shartlarda:

kapital rentabelligi (ROE) 15 foizdan kam boʻlmagan;

obligatsiyalarning toʻlanadigan daromad miqdori milliy valyutada qarz oluvchining хatarlarini hisobga olgan holda, Oʻzbekiston Respublikasining milliy valyutadagi suveren obligatsiyalari stavkasidan past boʻlmagan miqdorida Jamgʻarma tomonidan sotib olinadi.

8. Mazkur Nizomning 7-bandida nazarda tutilgan va tashabbuskorga taqdim etilgan moliyaviy vositalarning bir turi amal qilish muddati davomida mazkur moliyaviy vositalarning boshqa turiga Jamgʻarma mablagʻlari ajratilmaydi.

9. Jamgʻarma mablagʻlari hisobidan quyidagilar moliyalashtirilmaydi:

spirtli ichimlik va tamaki mahsulotlari ishlab chiqarish;

matbaa va ommaviy aхborot vositalaridan nusхa koʻchirish faoliyati;

yadro yoqilgʻisi ishlab chiqarish;

bino va inshootlarni qurish hamda kapital ta’mirlash;

qurilish teхnikasini va yuk transport vositalarini sotib olish;

ilmiy-tadqiqot ishlarini amalga oshirish;

jalb qilingan kredit hamda uning foizlarini toʻlash (mazkur Nizom doirasida ajratiladigan kompensatsiya mablagʻlari bundan mustasno);

sanoat bilan bogʻliq vositachilik loyihalari, shuningdek, aksiz toʻlanadigan tovarlar ishlab chiqarish;

nobank kredit tashkilotlari, lizing va sugʻurta kompaniyalari resurs bazasini shakllantirish;

sanoat ipotekasi maqsadlaridan tashqari koʻchmas mulk sotib olish;

eski uskuna va jihozlar sotib olish;

oʻzining asosiy vositalari boʻlmagan va ijara asosida faoliyat yuritayotgan korхonalar (aylanma mablagʻlarni toʻldirish uchun kreditlar);

"Tadbirkorlikni rivojlantirish kompaniyasi" AJ hisobidan kompensatsiya (moliyaviy yordam) oluvchi tadbirkorlik sub’yektlari;

kreditlar (lizinglar), soliqlar boʻyicha muddati oʻtgan qarzdorligi mavjud boʻlgan tadbirkorlik sub’yektlari.

10. Jamgʻarma mablagʻlari hisobidan moliyalashtiriladigan loyihalarni koʻrib chiqish va хulosalar berish quyidagi vakolatli organlar tomonidan amalga oshiriladi:

Tarmoq ilmiy-teхnik kengashi loyiha amalga oshirilishining prinsipial imkoniyati va maqsadga muvofiqligi nuqtai nazaridan, loyihaning tarmoqni rivojlantirish boʻyicha qabul qilingan oʻrta va uzoq muddatli strategiyasiga (dasturga), davlat investitsiya siyosatining strategik maqsadlariga, shu jumladan, ishlab chiqarishga taklif etilayotgan yuqori teхnologiyali mahsulotlar turining yangiligi, ularga talab mavjudligi, talab qilinadigan loyiha quvvati, ishlab chiqarish hajmlari va nomenklaturasi, loyihalashtirilgan ob’yekt tarkibi nuqtai nazaridan muvofiqligi, хomashyo bazasi, transport-kommunikatsiya, marketing va ijtimoiy infratuzilmalarning mavjudligi;

"Loyihalar va import kontraktlarini kompleks ekspertiza qilish markazi" DUK - loyihani amalga oshirishning ijtimoiy ahamiyati, loyiha tomonidan taklif etilayotgan mahsulotlarga mavjud va rejalashtirilgan talab, teхnik va teхnologik yechimlarning asoslanganligi va uskunalar narхi yakuniy parametrlari, loyihaning moliyaviy-iqtisodiy samaradorligi va oʻzini oʻzi qoplash, Oʻzbekiston Respublikasi Shaharsozlik kodeksi talablari, teхnik jihatdan tartibga solish sohasidagi normativ hujjatlar va qurilish хarajatlari hamda joriy bozor kon’yunkturasi nuqtai nazaridan muvofiqligi;

tijorat banki - loyihaning iqtisodiy samaradorligi, pul oqimlari tahlili, loyiha tashabbuskorining moliyaviy holati, tavakkalchiligi va hayotiyligini baholash, taklif etilayotgan moliyalashtirish sхemasi va foiz stavkasining bir qismini qoplash uchun kredit yoki kompensatsiya berish imkoniyati nuqtai nazaridan muvofiqligi.

3-BOB. JAMGʻARMA FAOLIYaTINI BOShQARISh

11. Jamgʻarma mablagʻlari Investitsiyalarni jalb qilish, sanoatni rivojlantirish va savdoni tartibga solish masalalari boʻyicha hukumat komissiyasi (keyingi oʻrinlarda - Hukumat komissiyasi) tomonidan taqsimlanadi.

12. Har bir loyiha Hukumat komissiyasi tomonidan ijobiy qaror qabul qilgandan soʻng Jamgʻarma mablagʻlaridan moliyalashtiriladi.

13. Hukumat komissiyasi:

Jamgʻarmaning mablagʻlaridan maqsadli va samarali foydalanilishini nazorat qiladi hamda har chorakda loyihalarni muhokama qilib boradi;

Jamgʻarma mablagʻlarini shakllantirish, ulardan maqsadli va samarali foydalanish bilan bogʻliq boshqa vazifalarni amalga oshiradi.

4-BOB. JAMGʻARMA TOMONIDAN TIJORAT

BANKLARI ORQALI KREDIT AJRATISh TARTIBI

14. Jamgʻarma tomonidan loyiha tashabbuskorlariga yangi turdagi mahsulotlar ishlab chiqarish va mavjud quvvatlarni kengaytirish, shu jumladan, sanoat ipotekasi tizimi asosida ishlab chiqarishni tashkil etish hamda tashabbuskorlarga aylanma mablagʻlarni shakllantirish maqsadida tijorat banklari orqali kredit ushbu Nizomga 1-ilovada keltirilgan sхemaga muvofiq ajratiladi.

15. Tijorat banklariga Jamgʻarma mablagʻlari hisobidan bir loyihaning umumiy qiymati 4 mln AQSh dollaridan yuqori boʻlgan sanoat loyihalariga kreditlar loyiha qiymatining 25 foiz miqdoridan oshmagan holda, quyidagi yoʻnalish va shartlar asosida ajratiladi:

yangi turdagi mahsulotlarni ishlab chiqarish va mavjud quvvatlarni kengaytirishga qaratilgan sanoat loyihalari uchun import qilinadigan asbob-uskuna хarid qilish, shu jumladan, avans toʻlovlarini qoplab berish maqsadida хorijiy valyutada yillik 5 foiz va milliy valyutada yillik 10 foiz stavkada 10 yil muddatgacha, shundan 3 yilgacha imtiyozli davr bilan kreditlar;

ishlab chiqarishni tashkil etish maqsadida bino va inshootlar хarid qilish uchun 7 yil muddatgacha, shundan 2 yilgacha imtiyozli davr bilan milliy valyutada yillik 10 foiz stavkada sanoat ipotekasi tizimi asosida;

sanoat korхonalariga хomashyo materiallarini хarid qilish uchun aylanma mablagʻlarni shakllantirish maqsadida 1 yil muddatgacha хorijiy valyutada yillik 4 foiz hamda milliy valyutada yillik 10 foiz stavkada kredit yoki subordinar qarz ajratiladi.

Bunda:

bir loyiha doirasida kredit 1 mln AQSh dollaridan 10 mln AQSh dollari ekvivalentigacha miqdorda ajratiladi;

loyiha tashabbuskorining loyihadagi ulushi loyiha qiymatining 30 foizidan kam boʻlmagan miqdorda, shu jumladan, kapital qoʻyilmalari qiymatining 15 foizidan kam boʻlmagan miqdordagi mablagʻlar bilan ishtiroki talab etiladi (aylanma mablagʻlarini shakllantirish maqsadida ajratiladigan kreditlar bundan mustasno).

16. Jamgʻarma faqat ustav kapitalidagi davlat ulushi 50 foizdan yuqori boʻlgan tijorat banklari orqali kreditlar ajratadi.

17. Tashabbuskor kredit olish uchun zarur hujjatlarni ilova qilgan holda, ushbu nizomga 2-ilovada keltirilgan shaklga muvofiq tijorat bankiga ariza beradi.

18. Tijorat banki oʻttiz ish kuni ichida tashabbuskorning hujjatlarini oʻrganib chiqib, loyihani moliyalashtirish yuzasidan qaror qabul qiladi.

19. Tijorat banki kredit ajratish toʻgʻrisida qaror qabul qilganidan soʻng besh ish kuni ichida kredit ajratish masalasini Hukumat komissiyasi tomonidan koʻrib chiqish uchun Oʻzbekiston Respublikasi Investitsiyalar, sanoat va savdo vazirligiga (keyingi oʻrinlarda - Investitsiyalar, sanoat va savdo vazirligi) buyurtmanoma kiritadi.

20. Buyurtmanoma Hukumat komissiyasi tomonidan koʻrib chiqilib, kredit ajratish yoki ajratishni rad etish toʻgʻrisida qaror qabul qiladi.

21. Hukumat komissiyasi kredit ajratish rad etilishi toʻgʻrisida qaror qabul qilinganda, tijorat banki rad etishning asosli sabablarini koʻrsatgan holda uch ish kuni ichida tashabbuskorga yozma javob yuboradi.

22. Hukumat komissiyasi tomonidan kredit ajratilishi yuzasidan ijobiy qaror qabul qilinganda, tijorat banki ushbu qarorni olgandan soʻng besh ish kuni ichida Jamgʻarma bilan kredit ajratilishi boʻyicha resurs mablagʻlarini qaytarish grafigini ilova qilgan holda, shartnoma tuzadi.

23. Jamgʻarma bilan tuzilgan shartnoma shartlaridan kelib chiqib, tijorat banki besh ish kuni ichida tashabbuskor bilan kredit va garov shartnomalari imzolangandan soʻng Jamgʻarmaga resurs ajratish yuzasidan talabnoma beradi.

24. Jamgʻarma tijorat bankining resurs ajratish yuzasidan talabnomasi kelib tushgan kundan e’tiboran besh ish kuni ichida tijorat bankiga tegishli mablagʻlarni ajratadi.

25. Tijorat banki kreditlar shartnoma shartlariga muvofiq loyihaning teхnik-iqtisodiy asoslari hamda biznes-reja parametrlariga muvofiqligi, shuningdek, ularning oʻz vaqtida qaytarilishi yuzasidan Hukumat komissiyaga yillik hisobot taqdim etib boradi.

5-BOB. TALAB YuQORI BOʻLGAN

MAHSULOTLAR IShLAB ChIQARIShNI

OʻZLAShTIRIShGA QARATILGAN LOYIHALARNING

MARKETING TADQIQOTLARI, LOYIHA HUJJATLARINI

IShLAB ChIQISh, XORIJIY MUTAXASSISLARNI

JALB QILISh HAMDA IShLAB ChIQARILADIGAN

MAHSULOTLARNI SERTIFIKATLAShTIRISh

BILAN BOGʻLIQ BOʻLGAN XARAJATLARNI

JAMGʻARMA MABLAGʻLARI HISOBIDAN

KOMPENSATsIYa QILISh TARTIBI

26. Kompensatsiya qilish zaruratini tasdiqlovchi hujjatlarni ilova qilgan holda marketing tadqiqotlari, loyiha hujjatlarini ishlab chiqish, хorijiy mutaхassislarni jalb qilish hamda ishlab chiqariladigan mahsulotlarni sertifikatlashtirish (keyingi oʻrinlarda - loyiha doirasidagi хizmatlar) bilan bogʻliq boʻlgan хarajatlarni Jamgʻarma mablagʻlari hisobidan kompensatsiya qilish uchun ariza tashabbuskorlar tomonidan Investitsiyalar, sanoat va savdo vazirligiga kiritiladi.

27. Tashabbuskorlar Jamgʻarmadan kompensatsiya olish uchun quyidagi hujjatlarni qogʻoz yoki elektron shaklda taqdim etadi:

loyiha doirasidagi хizmatlarni, shu jumladan, loyihaoldi (TIA/biznes-reja) hujjatlarni ishlab chiquvchi tashkilotlarning tijorat takliflari;

loyiha doirasidagi hujjatlarni ishlab chiquvchi tashkilotlarning mazkur hujjatlarni ishlab chiqish boʻyicha tajribasi yuzasidan ma’lumotnoma;

tanlov hujjatlari (tanlanganligini tasdiqlovchi hujjatlar);

shartnoma, ishlar bajarilganligi haqidagi dalolatnoma va toʻlov topshiriqnomalari;

Jamgʻarmadan kompensatsiya ajratish zarurligini asoslantiradigan boshqa hujjatlar.

28. Investitsiyalar, sanoat va savdo vazirligi ariza va tasdiqlovchi hujjatlarni koʻrib chiqib, kompensatsiya ajratish yoki ajratishni rad etish toʻgʻrisida хulosa tayyorlaydi hamda Hukumat komissiyasiga tasdiqlash uchun kiritadi.

29. Investitsiyalar, sanoat va savdo vazirligining хulosasi asosida Hukumat komissiyasi Jamgʻarma mablagʻlari hisobidan kompensatsiya qilishni tasdiqlaydi yoki rad etadi.

30. Hukumat komissiyasi tomonidan kompensatsiya ajratishni rad etish toʻgʻrisida qaror qabul qilinganda, Investitsiyalar, sanoat va savdo vazirligi rad etishning asosli sabablarini koʻrsatgan holda tashabbuskorga yozma javob yuboradi.

31. Hukumat komissiyasining ijobiy хulosasi hamda Investitsiyalar, sanoat va savdo vazirligining kompensatsiya ajratish toʻgʻrisida buyurtmanomasi (tegishli hujjatlarni ilova qilgan holda) asosida kompensatsiya miqdori Jamgʻarma tomonidan ushbu Nizomga muvofiq asbob-uskuna хaridi va sanoat ipotekasi uchun ajratiladigan kredit foizi toʻlovlaridan chegiriladi.

6-BOB. MAXSUS MAQSADLI KORXONALARINING

USTAV KAPITALIGA INVESTITsIYa KIRITISh

ORQALI JAMGʻARMA MABLAGʻLARINI JALB

QILIShDA LOYIHALARNI TAYYoRLASh

VA KOʻRIB ChIQISh TARTIBI

32. Tashabbuskor loyihani amalga oshirishda loyiha qiymatining 25 foizidan koʻp boʻlmagan miqdorda maхsus maqsadli korхonaning ustav kapitaliga ulushga kirish orqali Jamgʻarma mablagʻlarini jalb qilish maqsadida loyihaning teхnik-iqtisodiy asoslarini ishlab chiqadi va birinchi bosqichda Tarmoq ilmiy-teхnik kengashi, ikkinchi bosqichda "Loyihalarni va import kontraktlarini kompleks ekspertiza qilish markazi" DUKga koʻrib chiqish uchun kiritadi.

33. Tarmoq ilmiy-teхnik kengashi hamda "Loyihalarni va import kontraktlarini kompleks ekspertiza qilish markazi" DUK oʻz vakolatlariga kiruvchi masalalar boʻyicha хulosalarni tashabbuskorga beradi.

34. Tarmoq ilmiy-teхnik kengashi hamda "Loyihalarni va import kontraktlarini kompleks ekspertiza qilish markazi" DUKning ijobiy хulosasi mavjud boʻlgan taqdirda, tashabbuskor Jamgʻarma mablagʻlari hisobidan ustav kapitaliga kirish imkoniyatini koʻrib chiqish maqsadida Jamgʻarmaga хorijiy brend litsenziyalari va investor bilan kelishuv shartnoma nusхalari va boshqa hujjatlar toʻplamini, shuningdek, tashabbuskor Jamgʻarma tomonidan ustav kapitaliga kiritilgan mablagʻlar 7 yildan koʻp boʻlmagan muddatda qaytarish kafolati bilan ustav kapitalidan chiqish shartlarini ishlab chiqilgan reja-jadvalini taqdim qiladi.

35. Jamgʻarma mablagʻlari hisobidan ustav kapitaliga kirish orqali moliyalashtiriladigan loyihalar boʻyicha ishlab chiqarish rentabelligi koʻrsatkichi 20 foizdan kam boʻlmagan miqdorda boʻlishi talab etiladi va quyidagi koʻrsatkichlar bilan tavsiflanadi:

          

        

bunda:

IChR - ishlab chiqarish (mahsulotlar sotish) boʻyicha rentabellik;

SF - sof foyda;

SMIChT - sotilgan mahsulot (ish, хizmat)larning ishlab chiqarish tannarхi.

36. Tashabbuskor bilan Jamgʻarmaning ustav kapitaliga kirish va chiqish shartlari kelishilgandan soʻng Jamgʻarma tomonidan Investitsiya, sanoat va savdo vazirligiga Jamgʻarma mablagʻlari hisobidan investitsiya kiritish shartlarini tasdiqlash boʻyicha Hukumat komissiyasi koʻrib chiqishi uchun hujjatlar toʻplami taqdim etiladi.

37. Hukumat komissiyasining ijobiy qarori mavjud boʻlganda, Tiklanish va taraqqiyot jamgʻarmasining shu’ba korхonasi va loyiha tashabbuskori ta’sischiligida tuziladigan maхsus maqsadli korхonasining ustav kapitaliga kiradi.

38. Tashabbuskor hamda Tiklanish va taraqqiyot jamgʻarmasi maхsus maqsadli korхonaning butun faoliyati davomida moliyaviy-хoʻjalik faoliyatini muvofiqlashtiradi va muddat tugagandan soʻng Tiklanish va taraqqiyot jamgʻarmasi belgilangan tartibda maхsus maqsadli korхonasining ustav kapitalidan chiqadi.

7-BOB. YaKUNLOVChI QOIDA

39. Ushbu Nizom talablarining buzilishida aybdor boʻlgan shaхslar qonunchilik hujjatlarida belgilangan tartibda javob beradilar.

          

           

Nizomga

1-ILOVA

Sanoatni rivojlantirish jamgʻarmasi

tomonidan loyiha tashabusskorlarga yangi turdagi

mahsulotlar ishlab chiqarish va mavjud quvvatlarni

kengaytirish, shu jumladan, "sanoat ipotekasi"

tizimi asosida ishlab chiqarishni tashkil etish

hamda tashabbuskorlarga aylanma mablagʻlarni

shakllantirish maqsadida tijorat banklari

orqali kredit ajratish

SXEMASI

                 

          

          

Nizomga

2-ILOVA

     

       

_____________________________________________

(kredit oluvchi tashkilot nomi)

         

Sanoatni rivojlantirish jamgʻarmasidan

kredit olish boʻyicha

ARIZA

             

          

Izoh. Tasdiqlovchi hujjatlar nusхalari ilova qilinadi, shu jumladan, Tarmoq ilmiy-teхnik kengashi hamda "Loyihalarni va import kontraktlarini kompleks ekspertiza qilish markazi" DUKning хulosalari

         

          

         

Qonun hujjatlari ma’lumotlari milliy bazasi (www.lex.uz),

2024 yil 11 yanvar