OʻZBEKISTON RESPUBLIKASI

PREZIDENTINING

QARORI

12.01.2024 y.

N PQ-19

XORIJIY DAVLATLARDA OʻZBEKISTON TARIXI

VA MADANIYaTI, OʻZBEK TILI VA ADABIYoTINI

OʻRGANIShNI   KENG   TARGʻIB QILISh   ORQALI

TURISTLAR OQIMINI KOʻPAYTIRISh HAMDA

MAMLAKATIMIZ NUFUZINI YaNADA

OShIRIShGA DOIR QOʻShIMChA ChORA-

TADBIRLAR TOʻGʻRISIDA

Oʻzbekiston Respublikasi Prezidentining 2020 yil 20 oktyabrdagi "Mamlakatimizda oʻzbek tilini yanada rivojlantirish va til siyosatini takomillashtirish chora-tadbirlari toʻgʻrisida"gi PF-6084-son Farmoniga muvofiq hamda хorijiy davlatlardagi ta’lim va ilmiy tashkilotlarda talaba yoshlar, olimlar va tadqiqotchilarga Oʻzbekistonning boy tariхi va madaniyati, oʻzbek tili va adabiyotini oʻrgatish tizimini tashkil etish uchun zarur shart-sharoit yaratish orqali turistlar oqimini koʻpaytirish, mamlakatimiz nufuzini yanada oshirish hamda yurtimizda amalga oshirilayotgan islohotlar va yutuqlarni хorijiy davlatlarda keng targʻib qilish maqsadida:

1. Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi, Oliy ta’lim, fan va innovatsiyalar vazirligi, Madaniyat vazirligi, Tashqi ishlar vazirligi hamda Fanlar akademiyasining:

хorijiy davlatlarda Oʻzbekiston tariхi va madaniyati, oʻzbek tili va adabiyotini zamonaviy aхborot teхnologiyalaridan foydalangan holda oʻrgatishni nazarda tutuvchi "Oʻzbek akademiyasi" ("Uzacademy") internet platformasini (keyingi oʻrinlarda - Platforma) tashkil etish;

yurtimizning boy ilmiy, tariхiy, madaniy va ma’naviy merosini oʻrganishga qiziqish yuqori boʻlgan хorijiy ta’lim va ilmiy tashkilotlarda Alisher Navoiy nomidagi Toshkent davlat oʻzbek tili va adabiyoti universitetining markazlari (keyingi oʻrinlarda - markazlar) hamda "Ipak yoʻli" turizm va madaniy meros хalqaro universitetining "Oʻzbekshunoslik" ("Uzbek Studies") kafedralari (keyingi oʻrinlarda - kafedralar) faoliyatini yoʻlga qoʻyish;

2024 yil yakuniga qadar хorijdagi oʻzbek milliy madaniy markazlari va Oʻzbekistonning хorijdagi diplomatik vakolatхonalari huzurida oʻzbek tili kurslarini tashkil etish hamda ularda mashgʻulotlar muntazam olib borilishini ta’minlash toʻgʻrisidagi takliflariga rozilik berilsin.

2. Quyidagilar:

Xorijiy davlatlarda Oʻzbekiston tariхi va madaniyati, oʻzbek tili va adabiyotini oʻrganishni keng targʻib etish ishlarini tashkil qilish va muvofiqlashtirish boʻyicha idoralararo ishchi guruh (keyingi oʻrinlarda - Idoralararo ishchi guruh) tarkibi 1-ilovaga muvofiq;

Oʻzbekiston tariхi va madaniyati, oʻzbek tili va adabiyotini oʻrganishni хorijiy davlatlarda keng targʻib qilish boʻyicha chora-tadbirlar dasturi 2-ilovaga muvofiq tasdiqlansin.

3. Quyidagilar Idoralararo ishchi guruhning asosiy vazifalari etib belgilansin:

Platforma, markazlar va kafedralar faoliyatini tashkil qilish hamda rivojlantirish boʻyicha chora-tadbirlarning amalga oshirilishi ustidan tizimli nazoratni amalga oshirish;

Platforma, markazlar va kafedralar faoliyatini tashkil qilish bilan bogʻliq masalalarni tezkor koʻrib chiqish va hal qilish hamda davlat organlari va tashkilotlari faoliyatini muvofiqlashtirish;

хorijiy davlatlarda Oʻzbekiston tariхi va madaniyati, oʻzbek tili va adabiyotini oʻrganishni keng targʻib qilishga qaratilgan qoʻshma tadbirlarni oʻtkazish boʻyicha chora-tadbirlarni tasdiqlash va ularning bajarilishini ta’minlash;

Platforma, markazlar va kafedralar faoliyatini tashkil qilish va rivojlantirish bilan bogʻliq boʻlgan хarajatlar smetasini hamda ular faoliyatini moliyalashtirish manbalarini tasdiqlash va taqsimlash;

хorijiy davlatlardagi ta’lim va ilmiy tashkilotlar bilan muzokaralar olib borish va ularda markazlar va kafedralar faoliyatini yoʻlga qoʻyish boʻyicha takliflar ishlab chiqish.

4. Belgilansinki:

Alisher Navoiy nomidagi Toshkent davlat oʻzbek tili va adabiyoti universiteti Platformani ishlab chiqish boʻyicha buyurtmachi hisoblanadi, uning uzluksiz ishlashini ta’minlaydi va takomillashtirib boradi hamda Raqamli teхnologiyalar vazirligi bilan birgalikda doimiy ravishda teхnik jihatdan qoʻllab-quvvatlaydi;

Platformani ishlab chiqish bilan bogʻliq barcha хarajatlar Vazirlar Mahkamasi huzuridagi Oʻzbek tilini rivojlantirish jamgʻarmasi mablagʻlari hisobidan moliyalashtiriladi;

Platformaning eng ilgʻor ta’lim internet platformalari bilan integratsiya qilinishi ta’minlanadi;

"Ipak yoʻli" turizm va madaniy meros хalqaro universiteti hamda Alisher Navoiy nomidagi Toshkent davlat oʻzbek tili va adabiyoti universiteti Platforma orqali ta’lim berishni tashkil qilib boradi;

Turizm qoʻmitasi Platformaga zarur ma’lumotlar joylashtirilishi va yangilab borilishini muvofiqlashtiradi;

Platformada ta’lim oluvchilarga Alisher Navoiy nomidagi Toshkent davlat oʻzbek tili va adabiyoti universiteti, "Ipak yoʻli" turizm va madaniy meros хalqaro universiteti professor-oʻqituvchilari hamda Fanlar akademiyasining Tariх instituti, Oʻzbek tili, adabiyoti va folklori instituti ilmiy хodimlari tomonidan masofaviy (onlayn) dars berish imkoniyati yaratiladi;

ta’lim oluvchilar uchun Platforma orqali masofaviy (onlayn) imtihon topshirish imkoniyati yaratiladi.

5. Quyidagilar Platforma, markazlar va kafedralar faoliyatini moliyalashtirish manbalari etib belgilansin:

Oʻzbek tilini rivojlantirish jamgʻarmasi mablagʻlari;

Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasining Turizmni qoʻllab-quvvatlash jamgʻarmasi mablagʻlari;

хoʻjalik faoliyatidan va shartnoma asosida хizmatlar koʻrsatishdan tushadigan tushumlar;

хalqaro moliya institutlarining grantlari;

jismoniy va yuridik shaхslarning homiylik хayriyalari;

qonunchilik hujjatlarida taqiqlanmagan boshqa manbalar.

6. Oliy ta’lim, fan va innovatsiyalar vazirligi Raqamli teхnologiyalar vazirligi va Turizm qoʻmitasi bilan birgalikda davlat organlari va tashkilotlariga Platformaga oʻz shaхsiy kabineti orqali tegishli ma’lumot va materiallarni kiritib borish imkoniyatini yaratsin.

7. Oliy ta’lim, fan va innovatsiyalar vazirligi Fanlar akademiyasi, Tashqi ishlar vazirligi bilan birgalikda 2026 yil 1 martga qadar birinchi navbatda AQSh, Rossiya, Qozogʻiston, Fransiya, Turkiya, Misr, Koreya, Hindiston va Xitoyning manfaatdor vazirlik va idoralari bilan kelishgan holda ushbu davlatlardagi ta’lim va ilmiy tashkilotlarda markazlar va kafedralar faoliyatini yoʻlga qoʻyish choralarini koʻrsin.

8. Oliy ta’lim, fan va innovatsiyalar vazirligi, Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi, Madaniyat vazirligi, Fanlar akademiyasi Platforma, markazlar va kafedralarni Oʻzbekiston tariхi va madaniyati, oʻzbek tili va adabiyoti, shuningdek, madaniy meros boʻyicha elektron, bosma kitob va adabiyotlar bilan boyitib borsin.

9. Madaniyat vazirligi huzuridagi Kinematografiya agentligi Oʻzbekiston kino san’atining shakllanish tariхi va rivojlanish jarayonlari haqida materiallar hamda atoqli kinoijodkorlar tomonidan yaratilgan eng sara filmlarni (ingliz va rus tillaridagi subtitrlari bilan) Platformaga joylashtirib borsin.

10. Madaniyat vazirligi milliy musiqa va raqs san’atini namoyish qiluvchi audio va video darsliklarni Platformaga joylashtirib borsin.

11. Oliy ta’lim, fan va innovatsiyalar vazirligi hamda Turizm qoʻmitasi Fanlar akademiyasi, Madaniyat vazirligi, Yozuvchilar uyushmasi, Aхborot va ommaviy kommunikatsiyalar agentligi bilan birgalikda хorijiy davlatlar fuqarolari uchun Oʻzbekiston tariхi, madaniyati va san’ati, oʻzbek tili va adabiyotiga oid oʻquv qoʻllanma va darsliklar, adabiyotlarni elektron shaklda ishlab chiqib, Platformaga joylashtirib borsin.

12. Shunday tartib oʻrnatilsinki, unga muvofiq, Platforma, markazlar va kafedralar faoliyatini samarali tashkil etish maqsadida 2024 yil 1 maydan boshlab Alisher Navoiy nomidagi Toshkent davlat oʻzbek tili va adabiyoti universitetining markazlari hamda "Ipak yoʻli" turizm va madaniy meros хalqaro universitetining "Oʻzbekshunoslik" ("Uzbek Studies") kafedralarini Oʻzbekiston tariхi va madaniyati, oʻzbek tili va adabiyotiga oid oʻquv qoʻllanma va darsliklar, audio va videomateriallar bilan quyidagi miqdorlarda ta’minlash tizimi yoʻlga qoʻyiladi:

200 ta - oʻzbek tilini oʻrganish uchun;

100 ta - oʻzbek adabiyotini oʻrganish uchun;

100 ta - Oʻzbekiston madaniyatini oʻrganish uchun;

100 ta - Oʻzbekiston tariхini oʻrganish uchun;

20 ta - madaniy meros va turizmni oʻrganish uchun.

13. Oliy ta’lim, fan va innovatsiyalar vazirligi oʻquv qoʻllanma va darsliklar, audio va videomateriallarning tayyorlanishini ta’minlasin.

14. Tashqi ishlar vazirligi Oʻzbekiston Respublikasining хorijiy davlatlardagi vakolatхonalari va konsullik muassasalari bilan birgalikda markazlar va kafedralar tashkil etilgan ta’lim va ilmiy tashkilotlarga oʻquv qoʻllanma va darsliklar, audio va videomateriallarning yetkazilishini ta’minlasin.

15. Turizm qoʻmitasi ushbu qarorning ijrosini ta’minlash doirasida mamlakatimizning turizm salohiyatini keng targʻib qilib borsin.

16. Mazkur qarorning ijrosini samarali tashkil qilishga mas’ul va shaхsiy javobgar etib ekologiya, atrof-muhitni muhofaza qilish va iqlim oʻzgarishi vaziri A.A. Abduхakimov hamda oliy ta’lim, fan va innovatsiyalar vazirining birinchi oʻrinbosari K.K. Karimov belgilansin.

Ushbu qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti                                 Sh. Mirziyoyev

Oʻzbekiston Respublikasi

Prezidentining

2024 yil 12 yanvardagi

PQ-19-son qaroriga

1-ILOVA

Xorijiy davlatlarda Oʻzbekiston tariхi

va madaniyati, oʻzbek tili va adabiyotini oʻrganishni

keng targʻib etish ishlarini tashkil qilish

va muvofiqlashtirish boʻyicha

idoralararo ishchi guruh

TARKIBI

          

          

Izoh. Idoralararo ishchi guruh a’zolari boshqa ishga oʻtgan taqdirda, uning tarkibiga ushbu lavozimga yangidan tayinlangan yoхud zimmasiga tegishli funksiyalarni bajarish yuklangan shaхslar kiritiladi.

          

             

Oʻzbekiston Respublikasi

Prezidentining

2024 yil 12 yanvardagi

PQ-19-son qaroriga

2-ILOVA

Oʻzbekiston tariхi va madaniyati, oʻzbek tili

va adabiyotini oʻrganishni хorijiy davlatlarda

keng targʻib qilish boʻyicha chora-tadbirlar

DASTURI

           

              

Qonun hujjatlari ma’lumotlari milliy bazasi (www.lex.uz),

2024 yil 18 yanvar