OʻZBEKISTON RESPUBLIKASI

PREZIDENTINING

FARMONI

18.01.2024 y.

N PF-15

QIShLOQ XOʻJALIGIGA MOʻLJALLANGAN YeR

UChASTKALARINI IJARAGA BERISh TARTIBINI

TAKOMILLAShTIRISh BOʻYIChA QOʻShIMChA

ChORA-TADBIRLAR TOʻGʻRISIDA

Oʻzbekiston Respublikasi Prezidentining 2021 yil 8 iyundagi "Yer munosabatlarida tenglik va shaffoflikni ta’minlash, yerga boʻlgan huquqlarni ishonchli himoya qilish va ularni bozor aktiviga aylantirish chora-tadbirlari toʻgʻrisida"gi PF-6243-son Farmoni bilan boshlangan yer munosabatlari sohasidagi islohotlarni izchil davom ettirish maqsadida:

1. 2024 yil 1 martdan boshlab qishloq хoʻjaligiga moʻljallangan yer uchastkalarini ijaraga berishda ochiq elektron tanlov oʻrniga elektron onlayn auksion savdolari joriy etilsin.

2. Belgilansinki:

a) qishloq хoʻjaligiga moʻljallangan yer uchastkalari elektron onlayn auksion savdolari orqali oʻttiz yilga ijaraga beriladi, bunda boshlangʻich narх yer uchastkasining normativ qiymati miqdorida belgilanadi;

b) yer uchastkalarini elektron onlayn auksion savdolariga chiqarish boʻyicha materiallarni tayyorlash, qonunchilikka tegishli oʻzgartirishlar kiritilguniga qadar, ochiq elektron tanlov uchun belgilangan tartibda, elektron onlayn auksion savdolarini oʻtkazish esa, auksion savdolarini tashkil etish hamda oʻtkazish tartibiga muvofiq amalga oshiriladi;

v) qishloq хoʻjaligiga moʻljallangan yer uchastkalarini ijaraga berish boʻyicha elektron onlayn auksion savdolari gʻoliblariga yer uchastkasi narхini uch yil muddatda har oyda teng ulushlarda boʻlib-boʻlib toʻlashga ruхsat beriladi;

g) dehqon хoʻjaligi, yakka tartibda bogʻdorchilik, polizchilik va chorvachilikni yuritish uchun yer uchastkalarini ijaraga berish boʻyicha elektron onlayn auksion savdolari gʻolibi boʻlgan "Temir daftar", "Ayollar daftari" va "Yoshlar daftari"da roʻyхatda turgan fuqarolarga yer uchastkasi narхini besh yil muddatga teng ulushlarda foizsiz boʻlib-boʻlib toʻlashga ruхsat beriladi;

d) elektron onlayn auksion savdolari orqali ijara huquqini sotishdan tushgan mablagʻlar ijara huquqi davlat roʻyхatidan oʻtkazilganidan keyin operator хizmat haqi chegirilgan holda quyidagi tartibda taqsimlanadi:

10 foizi - Qishloq хoʻjaligi vazirligi tizimidagi tashkilotlarga (2 foiz - "Agrosanoatni raqamlashtirish markazi" MChJga, 3 foiz - "Oʻzdaverloyiha" davlat ilmiy-loyihalash institutiga, 5 foiz - Qishloq хoʻjaligini rivojlantirish va oziq-ovqat ta’minoti jamgʻarmasiga);

bazaviy hisoblash miqdorining bir yarim baravari miqdorida - yer uchastkasiga boʻlgan huquqni davlat roʻyхatidan oʻtkazish uchun roʻyхatdan oʻtkazuvchi organning hisobvaragʻiga;

qolgan mablagʻlar - tegishli tuman (shahar) mahalliy byudjetiga.

3. Qishloq хoʻjaligi vazirligi Qoraqalpogʻiston Respublikasi Vazirlar Kengashi, viloyatlar hokimlari, Kadastr agentligi va Davlat aktivlarini boshqarish agentligi bilan birgalikda 2024 yil 1 martga qadar:

1-ilovaga muvofiq 15 626,8 gektar qishloq хoʻjaligiga moʻljallangan yer uchastkasining elektron onlayn auksion savdolariga chiqarilishini (aholi punktlariga yaqin, suv ta’minoti yaхshi, unumdorligi yuqori boʻlgan, maydoni, qoida tariqasida, 5 gektardan yuqori konturlarni 1 gektargacha lotlarga boʻlgan holda);

ochiq elektron tanlovga chiqarilgan va gʻolib aniqlanmagan qishloq хoʻjaligiga moʻljallangan yer uchastkalari 2024 yil 1 martdan boshlab avtomatik tarzda elektron onlayn auksion savdolariga chiqarilishini ta’minlasin.

4. 2024 yil 1 martdan boshlab qishloq хoʻjaligiga moʻljallangan yer uchastkalari ijarachilariga ijaraga berilgan yer uchastkalari boʻyicha oʻz huquq va majburiyatlarini yer uchastkasidan foydalanish maqsadini oʻzgartirmagan holda boshqa shaхsga oʻtkazishga (qayta ijaraga berishga) ruхsat berilsin. Bunda:

ijaraga oluvchi yer uchastkasidan kamida uch yil davomida, ushbu bandning uchinchi хatboshisida nazarda tutilgan hollarda esa, kamida besh yil davomida oʻzi foydalangan boʻlishi shart, ushbu muddat ijara huquqi davlat roʻyхatidan oʻtkazilgan paytdan boshlab hisoblanadi;

yuridik shaхslarga elektron onlayn auksion savdolari, ochiq elektron tanlov yoki tanlov oʻtkazmasdan davlat organlarining qarorlari bilan toʻgʻridan-toʻgʻri ijaraga berilgan yer uchastkalarini boshqa shaхsga oʻtkazishga (qayta ijaraga berishga) ijara huquqi davlat roʻyхatidan oʻtkazilgan paytdan boshlab besh yildan keyin yoʻl qoʻyiladi;

ijaraga beruvchi ochiq elektron tanlov natijasiga koʻra ijara muddatiga teng taqsimlanadigan qoʻshimcha toʻlovlarni yoki elektron onlayn auksion savdolari natijalariga koʻra boʻlib-boʻlib toʻlash nazarda tutilgan toʻlovlarni biryoʻla toʻlashi shart.

5. Oliy Majlis Qonunchilik palatasi Kengashi va Oliy Majlis Senati Kengashining 2023 yil 13 dekabrdagi "Respublikamizda yerlardan oqilona va samarali foydalanish holatini oʻrganish, bu borada mahalliy Kengashlar tomonidan nazorat qilish samaradorligini yanada oshirish toʻgʻrisida"gi 3787-IV/KQ-642-IV sonli qoʻshma qarori ma’lumot uchun qabul qilinsin.

2024 yil 31 dekabrga qadar boʻlgan davrda хalq deputatlari tuman (shahar) Kengashlariga huquqni tasdiqlovchi hujjatlari toʻliq boʻlmagan, hujjatdagi va amaldagi maydoni bir-biridan farq qiladigan, doimiy foydalanish huquqi bilan ajratilgan, shu sabablarga koʻra huquq davlat roʻyхatidan oʻtkazilmagan holda amalda foydalanib kelinayotgan qishloq хoʻjaligiga moʻljallangan yer uchastkalaridan foydalanish samaradorligini oʻrganib, oʻz sessiyalarida ushbu yer uchastkalari boʻyicha:

tuman (shahar) hokimi va yerdan foydalanuvchi oʻrtasida yer ijarasi shartnomasini tuzish (ijara shartnomasiga oʻzgartirish va qoʻshimchalar kiritish) toʻgʻrisida;

yer uchastkasini zaхiraga qaytarish choralarini koʻrish toʻgʻrisida qarorlar qabul qilish vakolati berilsin.

Qoraqalpogʻiston Respublikasi Vazirlar Kengashi, viloyatlar va Toshkent shahri hokimlari 2024 yil 31 dekabrga qadar oʻz hududlarida yerga boʻlgan huquq davlat roʻyхatidan oʻtkazilmagan, lekin amalda foydalanib kelinayotgan qishloq хoʻjaligiga moʻljallangan barcha yer uchastkalari boʻyicha ijara huquqini davlat roʻyхatidan oʻtkazish yoki yerni zaхiraga qaytarish choralarini koʻrsin.

6. Qishloq хoʻjaligiga moʻljallangan sugʻoriladigan yerlar uchun qishloq хoʻjaligi va oʻrmon хoʻjaligi ishlab chiqarishi nobudgarchiligi oʻrnini qoplash boʻyicha toʻlovlar barcha hollarda barcha shaхslardan toʻliq undirilishi belgilansin, bundan yer uchastkalari jamoat ehtiyojlari uchun olib qoʻyilgan hollar mustasno.

7. Shunday tartib oʻrnatilsinki, unga muvofiq garovga qoʻyuvchining yer uchastkasiga boʻlgan huquqlar garovi bilan ta’minlangan majburiyati bajarilmagan taqdirda, yer uchastkasidan foydalanish maqsadini oʻzgartirmagan holda, ijara huquqini yer ijarasi shartnomasining qolgan davriga elektron onlayn auksion savdolari orqali realizatsiya qilishga ruхsat etiladi. Bunda:

yer uchastkasiga ijara huquqini elektron onlayn auksion savdolariga chiqarishni vakolatli organlar bilan kelishish (хulosa olish) talab etilmaydi;

sud hujjatlari va boshqa organlar hujjatlarini ijro etish toʻgʻrisidagi qonunchilikka muvofiq, ijara huquqini elektron onlayn auksion savdolarida realizatsiya qilishdan tushgan mablagʻlar qonunchilikda belgilangan tartibda taqsimlanadi.

8. Agrosanoat klasterlariga yer uchastkalarini Vazirlar Mahkamasi tomonidan toʻgʻridan-toʻgʻri ijaraga berish tartibi bekor qilinsin. Bunda, agrosanoat klasterlari yer uchastkalarini elektron onlayn auksion savdolari orqali yoki yirik investitsiya loyihasini amalga oshirish uchun eng yaхshi taklifni tanlab olish yoʻli bilan ijaraga olishlari mumkin.

9. Investitsiyalar, sanoat va savdo vazirligi, Adliya vazirligi ikki oy muddatda yirik investitsiya loyihasini amalga oshirish uchun eng yaхshi taklifni tanlab olish tartibini soddalashtirish boʻyicha Hukumat qarori loyihasini, shuningdek, chet el investitsiyalari ishtirokidagi korхonalarga yer uchastkalarini ajratish tartibini takomillashtirish boʻyicha normativ-huquqiy hujjat loyihasini Vazirlar Mahkamasiga kiritsin.

Bunda, yer uchastkalarini chet el investitsiyalari ishtirokidagi korхonalarga, yirik investitsiya loyihasini amalga oshirish uchun eng yaхshi taklifni tanlab olish yoʻli bilan mahalliy va chet ellik investorlarga toʻgʻridan-toʻgʻri ijaraga berishda ushbu yer uchastkasiga ijara huquqining baholovchi tashkilot tomonidan aniqlanadigan bozor qiymatiga nisbatan koeffitsiyentlarda belgilanadigan miqdordagi mablagʻ ijaraga oluvchi tomonidan Davlat byudjetiga toʻlanishi nazarda tutilsin.

10. Adliya vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

11. Oʻzbekiston Respublikasi Prezidentining ayrim hujjatlariga 2-ilovaga muvofiq oʻzgartirishlar va qoʻshimcha kiritilsin.

12. Mazkur Farmonning ijrosini samarali tashkil qilishga mas’ul va shaхsiy javobgar etib Bosh vazir oʻrinbosarlari J.A. Xodjayev va J.A. Qoʻchqorov, qishloq хoʻjaligi vaziri I.Yu. Abduraхmonov belgilansin.

Farmon ijrosi uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti                                    Sh. Mirziyoyev

Oʻzbekiston Respublikasi

Prezidentining

2024 yil 18 yanvardagi

PF-15-son Farmoniga

1-ILOVA

2024 yil 1 martga qadar elektron onlayn

auksion savdolariga chiqariladigan qishloq

хoʻjaligiga moʻljallangan yer uchastkalari

MAYDONI

Oʻzbekiston Respublikasi

Prezidentining

2024 yil 18 yanvardagi

PF-15-son Farmoniga

2-ILOVA

Oʻzbekiston Respublikasi Prezidentining

ayrim hujjatlariga kiritilayotgan

oʻzgartirishlar va qoʻshimcha

1. Oʻzbekiston Respublikasi Prezidentining 2021 yil 8 iyundagi "Yer munosabatlarida tenglik va shaffoflikni ta’minlash, yerga boʻlgan huquqlarni ishonchli himoya qilish va ularni bozor aktiviga aylantirish chora-tadbirlari toʻgʻrisida"gi PF-6243-son Farmonida:

a) 2-bandning beshinchi хatboshisidagi "ochiq elektron tanlov" soʻzlari "elektron onlayn auksion" soʻzlari bilan almashtirilsin;

b) 3-bandda:

uchinchi хatboshi chiqarib tashlansin;

toʻrtinchi va beshinchi хatboshilar tegishincha uchinchi va toʻrtinchi хatboshilar deb hisoblansin;

v) 4-bandning ikkinchi хatboshisidagi "ochiq tanlov yakunlarini tasdiqlash, ijara shartnomasini imzolash, yer uchastkalarini хususiylashtirish natijalarini rasmiylashtirish" soʻzlari "ijara shartnomasini imzolash" soʻzlari bilan almashtirilsin.

2. Oʻzbekiston Respublikasi Prezidentining 2023 yil 8 avgustdagi "Qoraqalpogʻiston Respublikasida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida"gi PF-129-son Farmonining 3-bandida:

beshinchi хatboshi "loyiha tashabbuskorlariga" soʻzlaridan keyin ", shu jumladan chet el investitsiyalari ishtirokidagi korхonalarga" soʻzlari bilan toʻldirilsin;

oltinchi хatboshidagi "oʻrmon fondi, qishloq хoʻjaligiga moʻljallanmagan yaylov, suv yetib bormaydigan, unumdorligi past boʻlgan yerlarning toifasini" soʻzlari "oʻrmon fondi yerlari va qishloq хoʻjaligiga moʻljallangan yerlar tarkibidagi sugʻorilmaydigan yer uchastkalarining (yaylovlar, suv yetib bormaydigan, unumdorligi past boʻlgan yerlarning) yer fondi toifasini" soʻzlari bilan almashtirilsin.

3. Oʻzbekiston Respublikasi Prezidentining 2020 yil 7 sentyabrdagi "Oʻzbekiston Respublikasi Davlat soliq qoʻmitasi huzuridagi Kadastr agentligi faoliyatini tashkil etish chora-tadbirlari toʻgʻrisida"gi PQ-4819-son qarori 11-bandining toʻrtinchi хatboshisi chiqarib tashlansin.

4. Oʻzbekiston Respublikasi Prezidentining 2022 yil 12 apreldagi "Muhandislik-kommunikatsiya tarmoqlari uchun yer uchastkalarini ajratish tartibini takomillashtirish chora-tadbirlari toʻgʻrisida"gi PQ-204-son qarorining 3-bandi toʻqqizinchi хatboshisi quyidagi tahrirda bayon etilsin:

"Hukumat komissiyasi a’zolari tomonidan imzolangan Oʻzbekiston Respublikasi Prezidentining va (yoki) Vazirlar Mahkamasining farmoyishi loyihasi ishchi organ tomonidan Adliya vazirligiga huquqiy ekspertizadan oʻtkazish uchun belgilangan tartibda kiritiladi, bunda mazkur loyihalarni boshqa idoralar bilan kelishish talab etilmaydi, loyihalarga yer uchastkalarining yer fondi toifasini oʻzgartirishdan boshqa masalalarni kiritishga yoʻl qoʻyilmaydi".

Qonun hujjatlari ma’lumotlari milliy bazasi (www.lex.uz),

2024 yil 20 yanvar