OʻZBEKISTON RESPUBLIKASI

ADLIYa VAZIRLIGI TOMONIDAN

ROʻYXATGA OLINGAN

19.02.2024 y.

N 3497

OʻZBEKISTON RESPUBLIKASI

SOGʻLIQNI SAQLASh VAZIRINING

10.01.2024 y.

N 1

BUYRUGʻI

Odamning immunitet tanqisligi virusini

yuqtirib olgan shaхslar ishlashi man etilgan kasbiy

faoliyat turlari roʻyхatini tasdiqlash toʻgʻrisida

Oʻzbekiston Respublikasining "Odamning immunitet tanqisligi virusi keltirib chiqaradigan kasallik (OIV infeksiyasi) tarqalishiga qarshi kurashish toʻgʻrisida"gi Qonuniga muvofiq BUYuRAMAN:

1. Odamning immunitet tanqisligi virusini yuqtirib olgan shaхslar ishlashi man etilgan kasbiy faoliyat turlari roʻyхati ilovaga muvofiq tasdiqlansin.

2. Oʻzbekiston Respublikasi sogʻliqni saqlash vazirining "Odamning immunitet tanqisligi virusini yuqtirib olgan shaхslar ishlashi man etilgan kasbiy faoliyat turlari roʻyхatini tasdiqlash toʻgʻrisida" 2014 yil 23 apreldagi 7-son buyrugʻi (roʻyхat raqami 2581, 2014 yil 7 may) (Oʻzbekiston Respublikasi qonun hujjatlari toʻplami, 2014 y., 19-son, 219-modda) oʻz kuchini yoʻqotgan deb topilsin.

3. Mazkur buyruq Oʻzbekiston Respublikasi Kambagʻallikni qisqartirish va bandlik vazirligi hamda Kasaba uyushmalari Federatsiyasi bilan kelishilgan.

4. Mazkur buyruq rasmiy e’lon qilingan kundan e’tiboran kuchga kiradi.

Vazir                                                                  A.A. Xudayarov

Buyruqqa

ILOVA

Odamning immunitet tanqisligi virusini

yuqtirib olgan shaхslar ishlashi man

etilgan kasbiy faoliyat turlari

ROʻYXATI

1. Odam qoni va (yoki) uning tarkibiy qismlarini tayyorlash, qayta ishlov berish хamda gemotransfuziya bilan bogʻliq kasblar.

2. Barcha turdagi jarrohlik amaliyoti bilan bogʻliq kasblar.

3. Tugʻruq bilan bogʻliq kasblar.

4. Quyidagi tibbiy muolajalar bilan bogʻliq kasblar:

dializ;

veneseksiya;

kateterizatsiya.

Qonun hujjatlari ma’lumotlari milliy bazasi (www.lex.uz),

2024 yil 19 fevral