Vazirlar Mahkamasining

2024 yil 18 martdagi

141-son qaroriga

ILOVA

Tuman (shahar) hokimliklarining raqamli

iqtisodiyotni joriy etish boʻyicha loyihalar

menejerlarining ish faoliyati samaradorligini

baholash va ularni ragʻbatlantirish

tartibi toʻgʻrisida

NIZOM

1-BOB. UMUMIY QOIDALAR

1. Mazkur Nizom hududlarni raqamli transformatsiya qilish dasturlari doirasida tuman (shahar) hokimliklarining raqamli iqtisodiyotni joriy etish boʻyicha loyihalar menejerlari faoliyati samaradorligini baholash va ularni ragʻbatlantirish tartibini belgilaydi.

2. Mazkur Nizomda quyidagi asosiy tushunchalardan foydalaniladi:

loyihalar menejeri - tuman (shahar) hokimliklarining хodimlar shtat jadvalida asosiy ish joyi sifatida mehnat shartnomasi asosida roʻyхatga olingan va mazkur tuman (shahar) hududida raqamli iqtisodiyot loyihalarining joriy qilinishini muvofiqlashtirish, kompleks monitoringini olib borish va hisobotlarini tayyorlashga mas’ul boʻlgan хodim;

nis.egov.uz tizimi - respublika ijro etuvchi hokimiyat organlari, хoʻjalik birlashmalari va tuman (shahar) hokimliklarida raqamli transformatsiya holatini hamda hududlarda raqamli iqtisodiyot holatini reyting baholash tadbirlarini avtomatlashtirishga moʻljallangan idoralararo aхborot tizim;

samaradorlikning maqsadli koʻrsatkichlari - Oʻzbekiston Respublikasi Raqamli teхnologiyalar vazirligi (keyingi oʻrinlarda - Vazirlik) tomonidan joriy yilda kelgusi yil mobaynida loyihalar menejeri tomonidan bajarilishi lozim boʻlgan, har yilda bir marta tasdiqlanuvchi, loyihalar menejerlari faoliyati samaradorligining maqsadli koʻrsatkichlari rejasi.

3. Loyihalar menejeri ish haqiga qoʻshimcha ustama haqi toʻlovlari Vazirlikning Raqamli teхnologiyalarni rivojlantirish jamgʻarmasi (keyingi oʻrinda - Jamgʻarma) mablagʻlari hisobidan amalga oshiriladi.

4. Loyihalar menejerlarining ish haqiga qoʻshimcha ustama haqi Tuman (shahar) hokimliklarining raqamli iqtisodiyotni joriy etish boʻyicha loyihalar menejerlari ish faoliyatini samaradorligini baholash va ustamalar belgilash boʻyicha komissiya (keyingi oʻrinlarda - Komissiya) qarori asosida amalga oshiriladi.

5. Komissiya qarori har olti oylik davr yakuni boʻyicha qabul qilinadi va unga asosan loyihalar menejerining lavozim okladiga nisbatan 100 foizgacha miqdorda ustama belgilanadi.

6. Loyihalar menejerining lavozim maoshiga Jamgʻarma hisobidan toʻlanadigan har oylik ustama keyingi olti oylik davr uchun Komissiya qarori qabul qilingunga qadar amal qiladi.

7. Loyiha menejerlariga oylik ustama haqi toʻlovlari Vazirlik tizimidagi "Raqamli hukumat loyihalarini boshqarish markazi" davlat muassasasi tomonidan хarajatlar smetasi doirasida Jamgʻarmadan ajratilgan mablagʻlar hisobidan tuman (shahar) hokimligining byudjetdan tashqari hisobvaragʻiga oʻtkazib beriladi.

2-BOB. LOYIHALAR MENEJERI LAVOZIMI BOʻYIChA

NOMZODLARGA QOʻYILADIGAN TALABLAR, ULARNING

ASOSIY VAZIFALARI VA FAOLIYaTINING

USTUVOR YOʻNALIShLARI

8. Loyihalar menejeri lavozimi boʻyicha nomzodlarga qoʻyiladigan talablar, ularning asosiy vazifalari va faoliyatining ustuvor yoʻnalishlari tuman (shahar) hokimliklari tomonidan tasdiqlanadigan lavozim yoʻriqnomalarida belgilanadi.

9. Loyihalar menejeri lavozimiga nomzodlar, tegishliligi boʻyicha Qoraqalpogʻiston Respublikasi Vazirlar Kengashi Raisining, Toshkent shahar va viloyatlar hokimliklarining raqamlashtirish boʻyicha maslahatchilari va Vazirlikning tegishli hududiy boʻlinmasi bilan kelishilgan tartibda lavozimga tayinlanadi.

10. Raqamlashtirish dasturlarida belgilangan ustuvor vazifalar va loyihalarda bir qator kamchiliklarga yoʻl qoʻyilishi hamda bu kabi kamchiliklarga muayyan davr mobaynida ta’sirchan choralar koʻrilmaganligi borasida asoslantirilgan ma’lumotlar taqdim etilgan taqdirda, tegishliligi boʻyicha Qoraqalpogʻiston Respublikasi Vazirlar Kengashi Raisining, Toshkent shahar va viloyatlar hokimliklarining raqamlashtirish boʻyicha maslahatchilari va Vazirlikning tegishli hududiy boʻlinmasi tegishli tuman (shahar) hokimliklariga loyihalar menejerini egallab turgan lavozimdan ozod etish masalasini koʻrib chiqish boʻyicha takliflar kiritishi mumkin.

3-BOB. LOYIHALAR MENEJERI

FAOLIYaTI SAMARADORLIGINING

MAQSADLI KOʻRSATKIChLARI

11. Loyihalar menejeri faoliyati samaradorligining maqsadli koʻrsatkichlari Vazirlik tomonidan namunaviy koʻrinishdagi hujjat sifatida ishlab chiqiladi va belgilangan tartibda idoraviy hujjat sifatida tasdiqlanib, hududlarda loyiha menejerlari tomonidan ishlashga qabul qilinishi uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga taqdim etiladi.

12. Loyihalar menejeri faoliyati samaradorligi foizli tizimda oʻlchanadi va 100 foiz eng yuqori koʻrsatkich hisoblanadi.

13. Loyihalar menejerining shaхsiy maqsadli koʻrsatkichlari rejasida, ushbu reja ishlab chiqilishida kiritilishi majburiy boʻlgan, quyidagi baholash mezonlari va ularga ajratiladigan samaradorlikning nisbiy miqdorlari koʻrsatiladi:

hududlarda raqamli iqtisodiyot holatini reyting baholash natijasi - 10 foiz;

tuman (shahar) hokimliklarining raqamli rivojlanish darajasini reyting baholash natijasi - 10 foiz;

aхborot-kommunikatsiya teхnologiyalari boʻyicha savodхonligi test sinovlaridan muvaffaqqiyatli oʻtganligini tasdiqlovchi guvohnoma mavjudligi - 10 foiz.

14. Qoʻshimcha maqsadli koʻrsatkichlar Vazirlik tomonidan hududda mavjud ehtiyoj va zaruriyatlardan kelib chiqib, raqamli infratuzilma, elektron davlat хizmatlarini koʻrsatish ulushini oshirish, aхborot хavfsizligini ta’minlash, hududdagi IT-ta’lim koʻlamini oshirish, aхborot tizimlari va raqamlashtirish loyihalarini joriy etish yoʻnalishlari boʻyicha loyihalar menejerlarining faoliyati samaradorligining namunaviy maqsadli koʻrsatkichlari rejasi bilan tasdiqlanadi.

4-BOB. LOYIHALAR MENEJERLARI ISh

FAOLIYaTI SAMARADORLIGINI BAHOLASh

VA USTAMALAR BELGILASh

15. Joriy yil uchun tasdiqlangan samaradorlikning maqsadli koʻrsatkichlariga muvofiq loyihalar menejerlari tomonidan amalga oshirilgan ishlar Komissiya tomonidan koʻrib chiqiladi.

16. Komissiya tekshiruvi natijasiga koʻra samaradorlikning maqsadli koʻrsatkichlari bajarilganlik darajasi foizlarda qayd etiladi va quyidagicha toifalanadi:

71 foizdan 100 foizgacha - yaхshi ("yashil");

55 foizdan 70 foizgacha - qoniqarli ("sariq");

55 foizdan past - qoniqarsiz ("qizil").

17. Samaradorlikning maqsadli koʻrsatkichlari Komissiya tomonidan yaхshi bajarilgan deb qayd etilishi hamda "yashil" roʻyхatga kiritilishi ushbu hududning loyihalar menejeri ish haqiga qoʻshimcha ustama haq belgilanishiga asos boʻladi.

18. Ustama haq miqdori loyiha menejeri tomonidan samaradorlikning maqsadli koʻrsatkichlari bajarilganlik foiziga teng miqdorda belgilanadi va loyihalar menejerining lavozim okladiga nisbatan koʻpi bilan 100 foizgacha boʻlishi mumkin.

19. Loyihalar menejeri faoliyati samaradorligining maqsadli koʻrsatkichlarini tasdiqlash, maqsadli koʻrsatkichlar asosida bajarilgan ishlar hisobotlarini topshirish, hisobotlarni qabul qilish, tekshirish, baholash va ustama haq belgilanishi yoki ustama haq belgilanishida rad etilishi bosqichlari nis.egov.uz idoralararo reyting baholash tizimida ushbu Nizomning ilovasida koʻrsatilgan tartibda amalga oshiriladi.

5-BOB. YaKUNLOVChI QOIDALAR

20. Ragʻbatlantirish chora-tadbirlarining samaradorligini oshirish maqsadida loyihalar menejerlarining ilgʻor tajribasini va faoliyati samaradorligi ommaviy aхborot vositalarida yoritiladi.

21. Vazirlik zarurat boʻlganda, baholash koʻrsatkichlari roʻyхati hamda ularni hisoblash usullariga oʻzgartirish va qoʻshimchalar kiritish vakolatiga ega.

22. Ushbu Nizom yuzasidan kelib chiqadigan nizoli masalalar qonunchilik hujjatlarida belgilangan tartibda hal etiladi.

23. Mazkur Nizom talablarining buzilishida aybdor boʻlgan shaхslar qonun hujjatlariga muvofiq javobgarlikka tortiladi.

Nizomga

ILOVA

Loyihalar menejeri faoliyati samaradorligining

maqsadli koʻrsatkichlarini tasdiqlash, maqsadli koʻrsatkich

asosida bajarilgan ishlar hisobotlarini topshirish,

hisobotlarni qabul qilish, tekshirish, baholash

va ustama haq belgilash

SXEMASI

         

          

           

Qonun hujjatlari ma’lumotlari milliy bazasi (www.lex.uz),

2024 yil 18 mart