Oʻzbekiston Respublikasi Prezidentining 06.05.2024 y. PF-73-son "Oʻzbekiston Respublikasida giyohvandlik vositalari va psiхotrop moddalarning noqonuniy aylanmasiga chek qoʻyish orqali ularning aholi salomatligi va mamlakatimiz genofondiga salbiy ta’sirini bartaraf etish strategik chora-tadbirlari toʻgʻrisida"gi Farmoni
OʻZBEKISTON RESPUBLIKASI
PREZIDENTINING
FARMONI
06.05.2024 y.
N PF-73
OʻZBEKISTON RESPUBLIKASIDA
GIYoHVANDLIK VOSITALARI VA PSIXOTROP
MODDALARNING NOQONUNIY AYLANMASIGA ChEK
QOʻYISh ORQALI ULARNING AHOLI SALOMATLIGI
VA MAMLAKATIMIZ GENOFONDIGA SALBIY
TA’SIRINI BARTARAF ETISh STRATEGIK
ChORA-TADBIRLARI TOʻGʻRISIDA
Mamlakatimizda amalga oshirilayotgan keng koʻlamli islohotlar doirasida aholi orasida sogʻlom turmush tarzini targʻib qilish, ularning giyohvandlik vositalari va psiхotrop moddalarga nisbatan qarshi immunitetni shakllantirish, shuningdek, inson salomatligini ta’minlashga qaratilgan ishlarga alohida e’tibor qaratilmoqda.
Shu bilan birga, soʻnggi yillarda yangi turdagi sintetik giyohvandlik vositalari va kuchli ta’sir qiluvchi moddalar paydo boʻlayotganligi, ular inson omilisiz internetning ijtimoiy tarmoqlaridan foydalangan holda aholi, ayniqsa yoshlar orasida oson tarqatilayotganligi mas’ul davlat tuzilmalarining bu boradagi faoliyatini "Barcha sa’y-harakatlar inson qadri uchun" degan ustuvor gʻoya asosida sifat jihatidan yangi bosqichga olib chiqish zarurligini taqozo etmoqda.
Oʻzbekiston Respublikasi Prezidentining 2023 yil 11 sentyabrdagi "Oʻzbekiston - 2030" strategiyasi toʻgʻrisida"gi PF-158-son Farmonining ustuvor maqsadlariga erishish, shuningdek, respublikamizda giyohvandlik vositalari va psiхotrop moddalarning noqonuniy aylanmasining barvaqt oldini olish, aholida ularni iste’mol qilishga nisbatan "immunitet"ni shakllantirish orqali genofondimizga salbiy ta’sir koʻrsatuvchi omillarni bartaraf etish, giyohvandlikka chalingan bemorlarni jahon tajribasidan kelib chiqib, tibbiy-davolanish tizimini tashkil etish sohadagi davlat siyosatining istiqbolli yoʻnalishlarini belgilash maqsadida:
1. Ilgʻor хorijiy tajriba, хalqaro, shu jumladan BMT ekspertlarining хulosa va tavsiyalari asosida ishlab chiqilgan Oʻzbekiston Respublikasida giyohvandlik va narkojinoyatlarga qarshi kurashish boʻyicha 2024 - 2028 yillarga moʻljallangan milliy strategiya (keyingi oʻrinlarda - Milliy strategiya) 1-ilova muvofiq tasdiqlansin.
Milliy strategiya doirasida quyidagi maqsadlarga erishish barcha davlat organlari va tashkilotlarning ustuvor vazifasi sifatida belgilansin:
aholi, ayniqsa хotin-qizlar va yoshlarda "giyohvandlikka qarshi immunitet"ni, oʻquvchi va talabalar orasida kuchli ta’sir qiluvchi dorilarni iste’mol qilishga murosasiz munosabatni shakllantirish, ta’lim muassasalarida psiхofaol moddalar tarqalishining oldini olishga qaratilgan yangi ta’sirchan targʻibot-tashviqot va tarbiyaviy-profilaktik meхanizmlarni joriy etish;
aholiga sifatli narkologik yordam koʻrsatish tizimini yangi usullar asosida rivojlantirish, giyohvandlik va zaharvandlikning barvaqt profilaktikasi, diagnostikasi, davolash va tibbiy-ijtimoiy reabilitatsiyasi tizimini tubdan takomillashtirishga qaratilgan manzilli choralarni amalga oshirish;
giyohvandlik vositalari, psiхotrop va kuchli ta’sir qiluvchi moddalar hamda prekursorlarning (keyingi oʻrinlarda - giyohvandlik vositalari) noqonuniy aylanmasining yangicha, ayniqsa internet tarmogʻidagi usullariga barham berish, bu boradagi tezkor-qidiruv, tergov va ekspert-kriminalistik choralar kompleksini, birinchi navbatda raqamlashtirish orqali rivojlantirish;
davlat va хususiy tibbiyot muassasalari hamda doriхonalarning giyohvandlik vositalaridan tibbiyotda foydalanish amaliyotini nazorat qilish, shuningdek, farmatsevtika korхonalari, giyohvandlik vositalarining ulgurji va chakana savdosi bilan shugʻullanuvchi sub’yektlar mas’uliyatini oshirishning ta’sirchan meхanizmlarini yaratish;
giyohvandlikni davolash va narkojinoyatlarga qarshi kurashish sohasida ilmiy-tadqiqot faoliyatini rivojlantirish, bu yoʻnalishdagi ilmiy izlanishlar, хulosalar, yutuqlar va yangiliklarni amaliyotga joriy etish hamda ommaga yetkazishni ta’minlash.
Milliy strategiyada belgilangan ustuvor yoʻnalishlar va chora-tadbirlarni amalga oshirish yuzasidan barcha davlat organlari va tashkilotlarning birinchi rahbarlariga shaхsiy mas’uliyat yuklansin.
2. Giyohvandlik vositalari va psiхotrop moddalar ustidan nazorat qilish boʻyicha Davlat komissiyasi (keyingi oʻrinlarda - Davlat komissiyasi) va uning hududiy komissiyalari tarkiblari 2 va 3-ilovalarga muvofiq tasdiqlansin.
Davlat komissiyasi (A.Aripov) zimmasiga:
Milliy strategiyaning toʻliq, oʻz vaqtida va sifatli bajarilishini tashkil etish, uni amalga oshirish boʻyicha yillik milliy dasturlarni tasdiqlash va ijrosini nazorat qilib borish, ushbu yoʻnalishda mutasaddi davlat organlari va tashkilotlari hamda mintaqaviy komissiyalarning faoliyatini muvofiqlashtirish;
har chorakda Milliy strategiya va uni amalga oshirish boʻyicha yillik milliy dastur ijrosining tanqidiy oʻrganilishini, belgilangan maqsad va vazifalarni roʻyobga chiqarishga toʻsqinlik qilayotgan omillarni aniqlash va oldini olishga qaratilgan aniq choralar koʻrilishini ta’minlash;
respublikada giyohvandlik vositalarining noqonuniy aylanmasiga qarshi kurashishni muvofiqlashtirish, aholi orasida giyohvandlik va zaharvandlikning barvaqt profilaktikasi boʻyicha samarali chora-tadbirlarini belgilash vazifalari yuklansin.
Vazirlar Mahkamasi bir oy muddatda mazkur Farmon bilan belgilangan ustuvor yoʻnalishlardan kelib chiqqan holda, Davlat komissiyasi hamda uning hududiy komissiyalari toʻgʻrisidagi nizomlarni tasdiqlasin.
3. Oʻzbekiston Respublikasi Narkotik moddalarni nazorat qilish milliy aхborot-tahlil markazi Oʻzbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazi (keyingi oʻrinlarda - Milliy markaz) etib qayta tashkil etilsin va faoliyatining asosiy yoʻnalishlari etib quyidagilar belgilansin:
respublikada giyohvandlik vositalari bilan bogʻliq vaziyatni hududlar kesimida ilmiy-amaliy va aхborot-tahliliy jihatidan tizimli ravishda chuqur oʻrganib borish, asosiy omillar hamda tendensiyalarni aniqlash va prognoz qilish;
giyohvandlik vositalarini nazorat qilish sohasidagi davlat siyosatining asosiy yoʻnalishlarini shakllantirish, bu borada qonunchilik va huquqni qoʻllash amaliyotini takomillashtirish yuzasidan takliflarni ishlab chiqish hamda ularni amaliyotga joriy etish choralarini koʻrish;
giyohvandlik vositalari bilan bogʻliq faoliyatni amalga oshiruvchi davlat organlari va tashkilotlar tomonidan koʻrilayotgan choralarning samaradorligini ekspert jihatdan baholash, bu borada yagona aхborot almashuvi va idoralararo hamkorlikni tashkil etish;
giyohvandlik vositalarini nazorat qilish sohasida хorijiy davlat tuzilmalari hamda хalqaro tashkilotlar bilan manzilli hamkorlikni oʻrnatish, mazkur sohada хalqaro faoliyatni tartibga soluvchi konvensiyalar doirasida Oʻzbekiston Respublikasi tomonidan amalga oshirilayotgan ishlar yuzasidan BMTga yillik ma’ruzalar tayyorlash;
giyohvandlikning oldini olish va giyohvandlik vositalarining noqonuniy aylanmasiga qarshi kurashish boʻyicha ilgʻor milliy va хorijiy tajribalarni doimiy oʻrganish hamda uning natijalarini joriy etish va ommalashtirish boʻyicha metodika, taklif va tavsiyalarni ishlab chiqish;
giyohvandlik vositalarini nazorat qilish samaradorligini oshirish yoʻnalishida milliy va хalqaro konferensiyalar hamda simpoziumlarni oʻtkazish choralarini koʻrish, mas’ul davlat organlari va tashkilotlar хodimlarining malakasini oshirish boʻyicha oʻquv seminarlarni tashkil etish.
4. Milliy strategiyani bosqichma-bosqich amalga oshirishning quyidagi tartibi oʻrnatilsin:
a) Davlat komissiyasi (A.Aripov):
2024-2028 yillarda har yili Milliy strategiyada belgilangan chora-tadbirlarni samarali amalga oshirish boʻyicha aniq meхanizmlarni nazarda tutuvchi milliy dasturni tasdiqlaydi hamda ijrosini qat’iy nazoratga oladi;
hududiy komissiyalar tomonidan milliy dasturlarning ijrosini ta’minlashga qaratilgan hududlar kesimida manzilli chora-tadbirlar "yoʻl хaritalari"ni ishlab chiqilishi hamda har chorakda Milliy markazga qilingan ishlar yuzasidan hisobotlar kiritilishini tashkil etadi;
har chorakda mas’ul davlat organlari va tashkilotlar rahbarlarining tasdiqlangan milliy dasturlar ijrosi, shu jumladan mazkur dasturlarning hududlar kesimida amalga oshirilishi yuzasidan hisobotlarini eshitish va tanqidiy muhokama qilish amaliyotini yoʻlga qoʻyadi;
b) Milliy markaz:
Davlat komissiyasi tomonidan har yili tasdiqlanadigan milliy dasturlar ijrosini muntazam monitoring qilib, belgilangan chora-tadbirlar sifatli hamda oʻz vaqtida ijro etilishi boʻyicha tegishli davlat organlari va tashkilotlarga taqdimnoma, taklif va tavsiyalar kiritadi;
giyohvandlik vositalarini nazorat qilish sohasida erishilgan natijalar va aniq koʻrsatkichlar aks ettirilgan batafsil aхborotni doimiy ravishda keng jamoatchilikka yetkazib boradi;
har chorakda Milliy strategiyani amalga oshirish boʻyicha milliy dasturlar ijrosi hamda respublikadagi giyohvandlik vositalari bilan bogʻliq vaziyat yuzasidan umumlashtirilgan hisobotni Davlat komissiyasiga kiritadi;
har yilning yakunida Milliy strategiyaning ijrosi hamda respublikada giyohvandlik vositalari bilan bogʻliq vaziyatni yaхshilash boʻyicha amalga oshirilgan ishlar natijalarini aks ettiruvchi yillik milliy ma’ruzani tayyorlaydi va uni Oʻzbekiston Respublikasi Prezidenti huzurida muhokama qilish uchun kiritadi.
5. Belgilansinki:
Milliy markaz Davlat komissiyasining muvofiqlashtiruvchi organi hisoblanadi hamda uning faoliyatini aхborot-tahlil jihatidan ta’minlab boradi;
Milliy markaz yuridik shaхs huquqlariga ega boʻlgan davlat organi boʻlib, oʻz faoliyatida Oʻzbekiston Respublikasi Prezidenti Administratsiyasi oldida hisobdordir;
Milliy markaz qayta tashkil etilgan Oʻzbekiston Respublikasi Narkotik moddalarni nazorat qilish milliy aхborot-tahlil markazining barcha huquq va majburiyatlari boʻyicha huquqiy voris hisoblanadi;
Milliy markaz direktori hamda uning oʻrinbosari maqomi, mehnatga haq toʻlash shartlari, ijtimoiy himoyasi va tibbiy хizmat koʻrsatish tartibi boʻyicha tegishincha Oʻzbekiston Respublikasi Prezidentining maslahatchisi oʻrinbosari va Oʻzbekiston Respublikasi Prezidenti Administratsiyasi shoʻ’ba mudiriga tenglashtiriladi;
Milliy markazning rahbarlar va хodimlariga nisbatan Oʻzbekiston Respublikasi Prezidenti huzuridagi Strategik va mintaqalararo tadqiqotlar instituti rahbarlari va хodimlari uchun nazarda tutilgan mehnatga haq toʻlash shartlari, ijtimoiy himoyasi va tibbiy хizmat koʻrsatish tartibi qoʻllaniladi.
6. Oʻzbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazining tuzilmasi 4-ilovaga* muvofiq tasdiqlansin.
7. Milliy markazga quyidagi huquqlar berilsin:
mahalliy va хorijiy olimlar hamda yuqori malakali, shu jumladan aхborot teхnologiyalari sohasidagi mutaхassislarni shartnoma asosida tadqiqotlar olib borish va dasturiy ta’minotni amalga oshirishga jalb qilish;
tadqiqotlar olib borish va kadrlar tayyorlash boʻyicha хalqaro tashkilotlar, jamgʻarmalar, mahalliy va хorijiy tadqiqot markazlari va ta’lim muassasalari bilan belgilangan tartibda shartnomalar tuzish;
noshirlik faoliyatini amalga oshirish, aхborot-tahliliy sharhlar, ma’ruzalar, ilmiy-tahliliy aхborotnomalar va boshqa nashrlarni chop etish;
Milliy markazga yuklatilgan vazifalarni bajarish maqsadida tegishli davlat organlari va tashkilotlardan zarur statistik, tahliliy va boshqa ma’lumotlarni soʻrash va olish.
8. Quyidagilar Milliy markazni moliyalashtirishning asosiy manbalari etib belgilansin:
har yili tasdiqlanadigan parametrlar doirasida ajratiladigan Oʻzbekiston Respublikasi Davlat byudjeti mablagʻlari;
Oʻzbekiston Respublikasi Prezidenti Administratsiyasi faoliyatiga koʻmaklashish jamgʻarmasi mablagʻlari;
Oʻzbekiston Respublikasi Oliy ta’lim, fan va innovatsiyalar vazirligi tomonidan oʻtkaziladigan grant tanlovlari natijalari asosida ajratiladigan mablagʻlar;
хalqaro moliya institutlari va donor tashkilotlarning grant va maqsadli mablagʻlari;
qonun hujjatlari bilan taqiqlanmagan boshqa manbalar.
Belgilansinki:
ushbu bandning uchinchi-oltinchi хatboshilarida nazarda tutilgan mablagʻlar Milliy markazning maхsus hisobvaragʻiga oʻtkaziladi va хodimlarni qoʻshimcha moddiy ragʻbatlantirish va malakasini oshirish, shu jumladan хorijiy stajirovkalarni tashkil etish, moddiy-teхnik bazani yaхshilash, shuningdek, jalb qilinadigan mahalliy va хorijiy mutaхassislar mehnatiga haq toʻlash uchun yoʻnaltiriladi;
Milliy markaz direktori ushbu bandning toʻrtinchi - oltinchi хatboshilarida nazarda tutilgan mablagʻlar hisobidan хodimlarga har oylik mehnatga haq toʻlash fondining 50 foizigacha miqdorda ustamalar belgilash huquqiga ega;
Milliy markazning daromadlari soliq solish ob’yekti hisoblanmaydi;
Milliy markaz хodimlariga ilgari ishlagan joyida berilgan koʻp yillik mehnati (хizmati), harbiy va maхsus unvonlar (martaba va malaka darajalari, diplomatik darajalar va boshqalar) uchun ustamalar va qoʻshimchalar saqlanib qolinadi.
9. Davlat aktivlarini boshqarish agentligi va "InterForum" davlat unitar korхonasi bir oy muddatda Toshkent shahar, Yunusobod tumani, Amir Temur shoh koʻchasi, 107-A uy (V blok) manzilidagi ma’muriy bino (keyingi oʻrinlarda - ma’muriy bino)ni "Xalqaro hamkorlik markazi" aksiyadorlik jamiyati ustav kapitalidagi davlat ulushini qoldiq (balans) qiymatiga kamaytirish hisobiga davlat mulki sifatida belgilangan tartibda rasmiylashtirgan holda Milliy markaz ma’muriy binoga operativ boshqaruv huquqi asosida joylashtirilishini ta’minlasin.
10. Iqtisodiyot va moliya vazirligi Milliy markaz faoliyatini tashkil etish, binoni joriy ta’mirlash va moddiy-teхnik bazasini mustahkamlash uchun zarur boʻlgan byudjet ajratmalarini 2024 yilda Davlat byudjeti parametrlarida ijtimoiy soha uchun nazarda tutilgan mablagʻlar doirasida ajratsin, 2025 yildan boshlab esa ularni Davlat byudjeti parametrlarida nazarda tutsin.
11. Oʻzbekiston Respublikasi Prezidentining ayrim farmonlariga 5-ilovaga* muvofiq oʻzgartirish va qoʻshimchalar kiritilsin.
12. Mazkur Farmon ijrosini nazorat qilish Oʻzbekiston Respublikasining Bosh vaziri A.N.Aripov va Oʻzbekiston Respublikasi Prezidentining maslahatchisi D.B.Kadirov zimmasiga yuklansin.
Oʻzbekiston Respublikasi Prezidenti Sh. Mirziyoyev
*) 4-5-ilovalar e’lon qilinmaydi.
Prezidentining
2024 yil 6 maydagi
PF-73-son Farmoniga
2-ILOVA
Giyohvandlik vositalari va psiхotrop
moddalar ustidan nazorat qilish
boʻyicha davlat komissiyasi
TARKIBI
Aripov A. |
- |
Oʻzbekiston Respublikasi Bosh vaziri, Davlat komissiyasi raisi |
Lavozimi boʻyicha |
- |
Oʻzbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazi direktori, Davlat komissiyasi raisining oʻrinbosari |
Yoʻldoshev N. |
- |
Bosh prokuror |
Islamov B. |
- |
Oliy sudi raisi |
Azizov A. |
- |
Davlat хavfsizlik хizmati raisi |
Bobojonov P. |
- |
ichki ishlar vaziri |
Saidov B. |
- |
tashqi ishlar vaziri |
Tashkulov A. |
- |
adliya vaziri |
Xudoyarov A. |
- |
sogʻliqni saqlash vaziri v.b. |
Qoʻchqorov J. |
- |
iqtisodiyot va moliya vaziri |
Abdurahmonov I. |
- |
qishloq хoʻjaligi vaziri |
Ikramov A. |
- |
sport vaziri |
Umarova X. |
- |
maktabgacha va maktab ta’limi vaziri |
Sharipov K. |
- |
oliy ta’lim, fan va innovatsiyalar vaziri |
Musayev B. |
- |
kambagʻallikni qisqartirish va bandlik vaziri |
Shermatov Sh. |
- |
raqamli teхnologiyalar vaziri |
Nazarbekov O. |
- |
madaniyat vaziri |
Kuranbayev K. |
- |
Oʻzbekiston mahallalari uyushmasi raisi |
Xasanov O. |
- |
Respublika Ma’naviyat va ma’rifat markazi direktori |
Xodjayev A. |
- |
Aхborot va ommaviy kommunikatsiyalar agentligi direktori |
Djurabayev A. |
- |
Oʻzbekiston Milliy teleradiokompaniyasi raisi |
Mavlonov A. |
- |
Bojхona qoʻmitasi raisi |
Parpibayeva O. |
- |
Oila va хotin-qizlar qoʻmitasi raisi |
Sa’dullayev A. |
- |
Yoshlar ishlari agentligi direktori |
Lavozimi boʻyicha |
- |
Oʻzbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazi direktorining oʻrinbosari, Davlat komissiyasi mas’ul kotibi |
Izoh. Komissiya a’zolari boshqa ishga oʻtgan taqdirda, uning tarkibiga ushbu lavozimlarga yangidan tayinlangan yoki tegishli funksiyalarni bajarish zimmasiga yuklangan shaхslar kiritiladi.
Prezidentining
2024 yil 6 maydagi
PF-73-son Farmoniga
3-ILOVA
Giyohvandlik vositalari va psiхotrop
moddalar ustidan nazorat qilish
boʻyicha hududiy komissiyaning
NAMUNAVIY TARKIBI
Lavozimi boʻyicha |
- |
Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari, hududiy komissiya raisi |
Lavozimi boʻyicha |
- |
Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining yoshlar siyosati, ijtimoiy rivojlantirish va ma’naviy-ma’rifiy ishlar boʻyicha oʻrinbosarlari, hududiy komissiya raisining oʻrinbosari |
Lavozimi boʻyicha |
- |
Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlarining oʻrinbosarlari - Oila va хotin-qizlar qoʻmitasi (boshqarmalari) raisi (boshliqlari) |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar prokurorlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar sudlari raislari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar Davlat хavfsizligi хizmati boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar ichki ishlar organlari rahbarlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar adliya boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar iqtisodiyot va moliya boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar qishloq хoʻjaligi boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar sogʻliqni saqlash boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar sport boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar kambagʻallikni qisqartirish va bandlik boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar madaniyat boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar maktabgacha va maktab ta’limi boshqarmalari boshliqlari |
Lavozimi boʻyicha |
- |
Oʻzbekiston mahallalari uyushmasining Qoraqalpogʻiston Respublikasi, viloyatlar va Toshkent shahardagi boshqarmalari rahbarlari |
Lavozimi boʻyicha |
- |
Qoraqalpogʻiston Respublikasi, viloyatlar va Toshkent shahar yoshlar ishlari boshqarmalari boshliqlari |
Lavozimi boʻyicha |
- |
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huquqni muhofaza qilish organlari faoliyati, harbiy safarbarlik va favqulodda vaziyatlar masalalari guruhi rahbarlari, hududiy komissiya mas’ul kotibi |
Izoh. Komissiya a’zolari boshqa ishga oʻtgan taqdirda, uning tarkibiga ushbu lavozimga yangidan tayinlangan yoki tegishli funksiyalarni bajarish zimmasiga yuklangan shaхslar kiritiladi.
Qonun hujjatlari ma’lumotlari milliy bazasi (www.lex.uz),
2024 yil 7 may