OʻZBEKISTON RESPUBLIKASI

PREZIDENTINING

FARMONI

20.06.2005 y.

N PF-3620

MIKROFIRMALAR VA KIChIK

KORXONALARNI RIVOJLANTIRIShNI

RAGʻBATLANTIRISh BORASIDAGI QOʻShIMChA

ChORA-TADBIRLAR TOʻGʻRISIDA

Kichik biznes sub’yektlarini jadal rivojlantirishni yanada ragʻbatlantirish hamda uning mamlakat iqtisodiyotidagi ahamiyati va ulushini tubdan oshirish maqsadida:

1. 2005 yilning 1 iyulidan boshlab mikrofirmalar va kichik korхonalar uchun yagona soliq, byudjetdan tashqari Pensiya jamgʻarmasi, Respublika yoʻl jamgʻarmasi va Maktab ta’limi jamgʻarmasiga majburiy ajratmalar toʻlash oʻrniga yagona soliq toʻlovi joriy etilsin.

Belgilansinki, yagona soliq toʻlovi alkogolli mahsulotlar ishlab chiqaruvchi mikrofirmalar va kichik korхonalarga tadbiq etilmaydi.

Yagona soliq toʻlovi hisobot choragidan keyingi oyning 25-kunigacha har chorakda hamda yil yakunlari boʻyicha yillik moliyaviy hisobot taqdim etiladigan muddatda toʻlanishi belgilab qoʻyilsin.

2. 2005 yilning 1 iyulidan boshlab, aksiz soligʻi olinadigan mahsulot ishlab chiqaruvchi mikrofirmalar va kichik korхonalar uchun yagona soliq toʻlovini hisoblash chogʻida soliqqa tortiladigan baza aksiz soligʻi summasiga kamaytiriladigan tartib oʻrnatilsin.

3. Yangi tashkil etilayotgan mikrofirmalar va kichik korхonalarga yagona soliq toʻlovini toʻlash muddatini bir yilga kechiktirish, kechiktirilgan summani imtiyozli davr tugagandan keyin teng ulushlarda 12 oy davomida toʻlash huquqi berilsin.

4. Oʻzbekiston Respublikasi Moliya vazirligi 2005 yilning 1 iyuligacha:

yagona soliq toʻlovini Oʻzbekiston Respublikasi Davlat byudjeti hamda davlat maqsadli jamgʻarmalari oʻrtasida taqsimlash normativlarini tasdiqlasin;

Oʻzbekiston Respublikasi Davlat soliq qoʻmitasi, Markaziy banki bilan birgalikda yagona soliq toʻlovini hisoblash, toʻlash hamda uni davlat byudjeti va byudjetdan tashqari davlat maqsadli jamgʻarmalari oʻrtasida taqsimlash toʻgʻrisidagi Nizomni ishlab chiqib, belgilangan tartibda tasdiqlasin;

Oʻzbekiston Respublikasi Davlat soliq qoʻmitasi va Iqtisodiyot vazirligi bilan birgalikda yagona soliq toʻlovini toʻlash muddatini kechiktirish huquqini berish tartibi toʻgʻrisidagi Nizomni ishlab chiqsin va belgilangan tartibda tasdiqlasin.

5. Quyidagilar belgilansin:

ilgari mikrofirmalar va kichik korхonalarga yagona soliq toʻlash boʻyicha qonun hujjatlarida berilgan soliq imtiyozlari yagona soliq toʻlovini toʻlash chogʻida amal qiladi;

yagona soliq toʻlovini toʻlaydigan mikrofirma va kichik korхonalar qonun hujjatlariga muvofiq ijaraga olingan yer maydonlari uchun byudjetga ijara haqi toʻlashdan ozod qilinadi.

6. Oʻzbekiston Respublikasi Moliya vazirligi, Davlat soliq qoʻmitasi, Adliya vazirligi Oʻzbekiston Respublikasi Savdo-sanoat palatasi va boshqa manfaatdor tuzilmalar bilan birgalikda uch oy muddatda "Soliq maslahatchilari toʻgʻrisida"gi Oʻzbekiston Respublikasi qonuni loyihasini ishlab chiqsin hamda Vazirlar Mahkamasiga kiritsin, loyihada tadbirkorlik sub’yektlarini soliq qonunchiligi sohasida maslahat va huquqiy jihatdan qoʻllab-quvvatlashni ta’minlashning amaliy meхanizmi koʻzda tutilsin.

7. Oʻzbekiston Respublikasi Adliya vazirligi tegishli vazirliklar va idoralar bilan birgalikda bir oy muddatda amaldagi qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisidagi takliflarni Oʻzbekiston Respublikasi Vazirlar Mahkamasiga kiritsin.

8. Mazkur Farmonning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

Oʻzbekiston Respublikasi Prezidenti                                           I.Karimov

"Oʻzbekiston Respublikasi qonun hujjatlari toʻplami", 2005 yil, 25-26-son, 177-modda