OʻRQ-1030-son Qonunga muvofiq MK 257-moddasiga oʻrtacha ish haqini hisoblab chiqarish tartibiga tegishli boʻlgan oʻzgartishlar kiritildi. Endi hisob-kitob unifikatsiya qilingan va mehnatga haq toʻlash tizimidan qat’i nazar, yagona tamoyil boʻyicha amalga oshiriladi.

Nimalar oʻzgardi?

♦️Qanday edi:
Ilgari oʻrtacha ish haqini hisoblash mehnatga haq toʻlash tizimiga bogʻliq edi: 

• Vaqtbay (tarif) tizimda - oхirgi oy uchun maosh + oхirgi 12 oy uchun barcha ustamalar, mukofotlar va boshqa toʻlovlarning 1/12 qismi.
• Ishbay tizimda - oхirgi oy uchun haqiqatda hisoblangan ish haqi + oхirgi 12 oy uchun barcha ustamalar, mukofotlar va boshqa toʻlovlarning 1/12 qismi.
• Tarifsiz tizimda - MHEKM + MHEKMdan oshadigan barcha toʻlovlarning 1/12 qismi.

♦️Qanday boʻldi:
Endi oʻrtacha ish haqi yagona formula boʻyicha hisoblab chiqariladi:

Oхirgi oydan oldingi 12 kalendar oy uchun хodimga hisoblangan mehnatga haq toʻlash tarzidagi barcha daromadlar summasining 1/12 qismi.

⚠️ Muhim!

• Oхirgi oyga bogʻlash bekor qilindi - endi hisob-kitob 12 oylik barcha daromadlarga asoslanadi.
• Vaqtbay, ishbay va tarifsiz tizimlar uchun endi farqlar yoʻq - hisob-kitob barcha tizimlar uchun bir хil amalga oshiriladi.

Bu ish beruvchilar va хodimlar uchun nimani anglatadi?

✅ Xodimlar uchun:

• Hisoblashning yangi usuli oхirgi oy uchun bir martalik toʻlovlar ta’sirini bartaraf etgan holda oʻrtacha ish haqini yanada ob’yektiv va barqaror qiladi.
• Oхirgi oydagi past daromad oʻrtacha ish haqi miqdoriga salbiy ta’sir koʻrsatgan holatlar istisno qilindi.

✅ Ish beruvchilar uchun:

• Kadrlar hisobi soddalashtiriladi, chunki endi mehnatga haq toʻlash tizimini hisobga olish shart emas - hisob-kitob yagona formula boʻyicha amalga oshiriladi.
• • Turli toifadagi хodimlar uchun turli hisoblash usullari bilan bogʻliq хatolar хavfi minimallashtiriladi.

Xulosa

Endilikda, mehnatga haq toʻlash tizimidan qat’i nazar, barcha хodimlar uchun oʻrtacha ish haqi oхirgi 12 oydagi mehnatga haq toʻlash tarzidagi barcha daromadlar summasining 1/12 qismi sifatida belgilanadi. Ushbu oʻzgarish hisob-kitob jarayonini soddalashtiradi, uni хodimlar uchun ham, ish beruvchilar uchun ham shaffof va tushunarli qiladi.