Тавсияномада:

– қайси муассасалар меҳнатга лаёқатсизлик варақасини беришга ҳақли;

– вақтинча меҳнатга лаёқатсизлик нафақаси қайси кунлар учун тўланади;

– нафақа қандай миқдорда тўланади;

– вақтинча меҳнатга лаёқатсизлик нафақаларини тўлаш манбалари ва уларни тўламаганлик учун жавобгарлик қандай.

Эътибор беринг

2026 йил 1 июлдан бошлаб вақтинча меҳнатга лаёқатсизлик нафақаси қуйидагича тайинланади ва тўланади:

• Иш берувчи томонидан – тегишли календарь йилдаги биринчи 5 кун учун;
• Давлат ижтимоий суғурта жамғармаси томонидан – кейинги кунлар учун, бироқ бир календарь йил давомида 182 календарь кундан ошмаган қисми учун.

Қайси муассасалар меҳнатга лаёқатсизлик варақасини беришга ҳақли

Вақтинча меҳнатга лаёқатсизлик нафақасини тайинлаш учун меҳнатга лаёқатсизлик варақаси асос бўлади. Уни, одатда, давлат даволаш-профилактика муассасалари (ДПМ), шу жумладан вазирликлар, идоралар ва бошқа давлат ташкилотларининг ДПМлари Соғлиқни сақлаш вазирлигининг Ягона тиббий ахборот тизимида беради.