Пригодится в работе в апреле:
Янги Меҳнат кодексида иш берувчи меҳнат шартномаси бекор қилинган куни ходимга унинг электрон меҳнат дафтарчасидан кўчирма беришга мажбур эканлиги белгиланган (10.28.2022 й. 798-сонли ЎРҚ янги МК 171-м.). Янги жойга ишга кираётган ходим эса иш берувчига охирги иш жойи бўйича тасдиқланган электрон меҳнат дафтарчасидан кўчирмани тақдим қилиши шарт (10.28.2022 й. 798-сонли ЎРҚ янги МК 124-м.).
Кадрлар бўйича ходим ишдан бўшатилаётган ходимнинг охирги иш жойи бўйича тўлиқ маълумот билан электрон меҳнат дафтарчасининг кўчирмасини қандай шакллантириши ва нусха чоп этиши кераклигини kadrovik.uz илтимосига кўра ЯММТ ИДАК бошқарув дирекцияси бўлим бошлиғи Зарнигор Абдураҳмонова тушунтирди:
– Кўчирмада охирги иш жойи бўйича меҳнат шартномасининг бекор қилиниши акс эттирилиши учун ушбу ташкилотнинг кадрлар бўйича ходими қуйидагиларни амалга ошириши керак:
1. Юридик шахснинг ЭРИси ёрдамида иш берувчининг my.mehnat.uz кабинетига киринг.
2. «Ташкилот кабинети» тугмасини босинг.
3. «Онлайн хизматлар» бўлимидаги ўнг вертикал менюда «Меҳнат дафтарчасидан кўчирма» тугмасини босинг.
4. Очилган саҳифада ишдан бўшатилган ходимнинг ЖШШИРини киритинг ва «Қидириш» тугмасини босинг.
5. Меҳнат дафтарчасидан кўчирманинг электрон версияси остида «Меҳнат дафтарчасидан кўчирмани юклаб олиш» тугмаси мавжуд. Унинг устига босинг.
Натижада pdf форматидаги файл юклаб олиш, кейинчалик сақлаш, чоп этиш ва фойдаланиш учун очилади.
Белгиланган шаклдаги ҳужжат қуйидагиларни ўз ичига олади:
- тақдим этувчининг (ишдан бўшатилган ходимнинг) шахсий маълумотлари;
- QR-код, уни сканерлаш орқали тақдим этилган кўчирманинг электрон версиясига ўтиш мумкин;
- ЯММТ жорий этилганидан бери олдинги иш берувчилар томонидан киритилган иш даврлари (ишга қабул қилиш ва ишдан бўшатиш саналари) ҳақида маълумот. Агар тақдим этувчининг ўзи ёки унинг олдинги иш берувчиси аввалги иш жойлари ҳақидаги маълумотларни киритган бўлса, у ҳолда – улар ҳақида.
