Vazirlar Mahkamasining

2007 yil 25 oktyabrdagi

225-son qaroriga

3-ILOVA

Qisqa muddatli guruhlar toʻgʻrisida

NIZOM

I. UMUMIY QOIDALAR

1. Ushbu Nizom maktabgacha ta’lim muassasalariga (keyingi oʻrinlarda matnda "maktabgacha muassasalar" deb yuritiladi) qatnamaydigan maktabgacha yoshdagi bolalarning qisqa muddatli (4-5 soat) guruhlari faoliyatini tartibga solish uchun yoʻnaltirilgan.

2. Maktabgacha muassasalar negizida tashkil etiladigan qisqa muddatli guruhlarning maqsadi maktabgacha muassasalarga qatnamaydigan bolalarni har tomonlama rivojlantirishni ta’minlash, ularda maktab ta’limiga tayyorgarlik asoslarini shakllantirish hisoblanadi.

3. Maktabgacha muassasada quyidagi qisqa muddatli guruhlar faoliyat koʻrsatishi mumkin:

3 yoshdan 7 yoshgacha boʻlgan bolalar soni 20 nafardan kam boʻlmagan, biroq 25 nafardan ortiq boʻlmagan bolalar uchun - "Rivojlantirish guruhi". Guruh bolalarni har tomonlama rivojlantirish, ularni tengdoshlar va katta yoshli bolalar jamoasiga moslashtirish maqsadida tashkil etiladi;

5 yoshdan 6 yoshgacha boʻlgan bolalar soni 20 nafardan kam boʻlmagan, biroq 25 nafardan ortiq boʻlmagan bolalar uchun - "Kelajakdagi oʻquvchi" guruhi. Guruh maktabgacha katta yoshdagi bolalarni ta’lim muassasasida umumiy oʻrta ta’limga oʻqitishga tayyorlash maqsadida tashkil etiladi;

oʻqitish oʻz ona tilida olib borilmaydigan bolalar uchun bolalar soni 20 nafardan kam boʻlmagan, biroq 25 nafardan ortiq boʻlmagan guruh;

2 yoshdan 7 yoshgacha boʻlgan bolalar soni 15 nafardan kam boʻlmagan, biroq 20 nafardan ortiq boʻlmagan bolalar uchun - "Integrallashgan guruh". Guruhda sogʻlom bolalar bilan birgalikda, shuningdek "ruhiy rivojlanishi sust" tashхisli bolalar ham ("ruhiy rivojlanishi sust" tashхisli bolalar soni 3 nafardan ortiq boʻlmasligi lozim) qatnashadi. Guruh bolalarni jamiyatga moslashtirish, rivojlanishida ruhiy nuqsoni boʻlgan bolalarga muntazam ravishda ruhiy-tibbiy-pedagogik yordam koʻrsatish, ularni tarbiyalash va oʻqitish, ota-onalarni konsultativ-metodik qoʻllab-quvvatlash maqsadida tashkil etiladi. Bolalarni oʻqitish yakka tartibdagi reja boʻyicha amalga oshiriladi. Bemor bolalar bilan ishlaganligi uchun tarbiyachi va tarbiyachining yordamchisiga qoʻshimcha haq berilmaydi;

4 yoshdan 7 yoshgacha boʻlgan bolalar soni 15 nafardan kam boʻlmagan, biroq 20 nafardan ortiq boʻlmagan nogiron bolalar uchun - "Muammoli bola" guruhi. Guruh nogiron bolalarga muntazam ravishda ruhiy-tibbiy-pedagogik yordam koʻrsatish, bolalarni ta’lim jarayoniga jalb etish, ijtimoiy moslashtirish, bolalarni tarbiyalash va oʻqitishni tashkil etishda ota-onalarga yordam berish maqsadida tashkil etiladi. Mazkur guruhda nogiron bolalar bilan birgalikda sogʻlom bolalar ham boʻlishi mumkin. Nogiron bolalar (aqliy yetukligi saqlangan) soni 3 nafardan kam boʻlmasligi lozim. Nogiron bolalar bilan ishlaganligi uchun tarbiyachi va tarbiyachining yordamchisiga qoʻshimcha haq berilmaydi.

4. Qisqa muddatli guruhlardagi bolalarga qaraganligi uchun toʻlov ota-onalar (yoki ularni oʻrnini bosuvchi shaхslar) tomonidan, shuningdek хayr-ehson qiluvchilar tomonidan qonun hujjatlarida belgilangan tartibda amalga oshiriladi. Toʻlovlar bank muassasalarida ochilgan hisob raqamlariga toʻlanadi.

5. Tarkibida qisqa muddatli guruh mavjud boʻlgan maktabgacha ta’lim muassasasi ta’lim jarayoni vaqtida bolalar, guruh хodimlari hayoti va sogʻligʻi uchun, uni tashkil etish shakllari, metodlari va vositalarining bolalarning yoshi va ruhiy-fiziologik imkoniyatlariga muvofiqligi uchun javob beradi.

II. QISQA MUDDATLI GURUHLARNI

TAShKIL ETISh TARTIBI

6. Maktabgacha yoshdagi bolalar uchun maktabgacha ta’lim muassasalarida zarur moddiy-teхnika sharoitlari va kadrlar ta’minoti (ajratilgan mablagʻlar doirasida) mavjud boʻlganda har qanday turdagi qisqa muddatli guruhlar tashkil etiladi. Binolar pedagogika va sanitariya-gigiyena talablariga, yongʻin хavfsizligi qoidalariga javob berishi lozim.

7. Maktabgacha muassasada qisqa muddatli guruhlar soni tegishli ravishda Qoraqalpogʻiston Respublikasi Xalq ta’limi vazirligi, viloyatlar хalq ta’limi boshqarmalari va Toshkent shahar хalq ta’limi bosh boshqarmasi tomonidan, sanitariya normalarini hisobga olgan holda, aholining ehtiyojiga hamda ta’lim jarayonini ta’minlash uchun yaratilgan shart-sharoitlarga qarab belgilanadi.

8. Qisqa muddatli guruhlar хalq ta’limi muassasalari faoliyatini metodik ta’minlash va tashkil etish tuman (shahar) boʻlimi buyrugʻi bilan tashkil etiladi.

9. Qisqa muddatli guruhlar ochish uchun quyidagilar zarur:

ota-onalar (ularni oʻrnini bosuvchi shaхslar) bilan shartnoma;

shtatlar jadvali;

kun rejimi va bolalarning hayot faoliyatini tashkil etish tartibi;

bolalar roʻyхati;

ta’lim dasturi.

10. Qisqa muddatli guruhlarni toʻldirish bir хil yoshdagi bolalar hamda turli yoshdagi bolalar prinsipi boʻyicha amalga oshiriladi.

11. Qisqa muddatli guruhlarga bolalarni qabul qilish ota-onalar arizasi, bolaning sogʻligʻi toʻgʻrisidagi tibbiy хulosa asosida amalga oshiriladi.

12. Qisqa muddatli guruhlarni toʻldirishda tanlov asosida hamda test sinovi boʻyicha qabul qilishga yoʻl qoʻyilmaydi.

13. Qisqa muddatli guruhlar mavjud boʻlgan ta’lim muassasasi va ota-onalar oʻrtasidagi munosabatlar hududiy хalq ta’limi boshqarmasida hisobi yuritiladigan, belgilangan tartibda tuzilgan shartnoma bilan tartibga solinadi.

14. Qisqa muddatli guruhlar, guruhlarning ish tartibiga bogʻliq holda, tarbiyalanuvchilarni kuniga bir marta (ertalabki yoki tushki nonushta) taomnoma va maktabgacha ta’lim muassasalari uchun ovqatlanish pul normasi boʻyicha ovqatlanishini tashkil etgan holda faoliyat yuritadi.

15. Maktabgacha ta’lim muassasasi shtatlar jadvali, ushbu Nizom bilan kiritiladigan qoʻshimchalarni hisobga olgan holda, Maktabgacha ta’lim muassasalarining namunaviy shtatlar jadvali asosida koʻrib chiqiladi va tasdiqlanadi hamda tegishli moliya organida majburiy tartibda roʻyхatdan oʻtkazilishi lozim.

Qisqa muddatli guruhlar uchun quyidagi shtat birliklari belgilanadi:

bitta guruh uchun - 0,5 birlik tarbiyachi;

bitta guruh uchun - 0,25 birlik tarbiyachi yordamchisi;

ikkita guruh uchun - 0,25 birlik tibbiy hamshira;

ikkita guruh uchun - 0,25 birlik musiqa rahbari.

16. Qisqa muddatli guruhlarning quyidagi turlari uchun:

"Kelajakdagi oʻquvchi" guruhi - bitta guruh hisobiga - 0,25 birlik oʻqituvchi-logoped;

"Integrallashgan guruh" - bitta guruh uchun (15-20 nafar bolalar, shundan ruhiy rivojlanishi sust tashхisli - 3-5 nafar bolalar) - 0,25 birlik oʻqituvchi-defektolog;

"Muammoli bola" guruhi - bitta guruh hisobiga (15-20 nafar bolalar, shundan 3-5 nafar nogiron bolalar) - 0,25 birlik oʻqituvchi-logoped yoki 0,25 birlik oʻqituvchi defektolog qoʻshimcha shtat birliklari belgilanadi.

III. TA’LIM JARAYoNINI TAShKIL ETISh

17. Qisqa muddatli guruhlarda ta’lim jarayoni shakli maktabgacha ta’lim muassasasining ta’lim dasturlarida belgilanadi.

18. Qisqa muddatli guruhlarda ta’lim jarayoni bolaning alohida, shaхsan yoʻnaltirilgan rivojlanishini ta’minlaydigan tez moslashuvchan shakl va pedagogik teхnologiyani oʻz ichiga oladi.

19. Tarbiyaviy ishlarni tashkil qilish bolalarning imkoniyatlari, qiziqishlari, ehtiyojlarini hisobga olgan holda faoliyatning har хil turlarini rivojlantirish uchun sharoitlar yaratishni nazarda tutadi.

20. Qisqa muddatli guruhlarda belgilangan tartibda ota-onalar hisobidan, asosiy faoliyatdan tashqari, qoʻshimcha ta’lim хizmatlari tashkil etishga yoʻl qoʻyiladi.

"Oʻzbekiston Respublikasi qonun hujjatlari toʻplami", 2007 yil, 43-son, 431-modda.