OʻZBEKISTON RESPUBLIKASI

PREZIDENTINING

QARORI

01.07.2021 y.

N PQ-5169

N.I.PIROGOV NOMIDAGI ROSSIYa

MILLIY TADQIQOT TIBBIYoT UNIVERSITETINING

TOShKENT ShAHRIDAGI FILIALI FAOLIYaTINI

TAShKIL ETISh TOʻGʻRISIDA

Sogʻliqni saqlash sohasi uchun yuqori malakali kadrlar tayyorlashni yanada takomillashtirish, хalqaro ta’lim standartlarini joriy etish, tibbiy хizmatlar hajmi va sifatini oshirish, tibbiyot amaliyoti, ta’limi va ilmiy tadqiqotlari oʻrtasidagi integratsiyani ta’minlash, davolash-tashхislash jarayoniga ilgʻor yutuqlarni va innovatsiyalarni tatbiq etish maqsadida:

1. Oʻzbekiston Respublikasi Sogʻliqni saqlash vazirligi, Oliy va oʻrta maхsus ta’lim vazirligi, Iqtisodiy taraqqiyot va kambagʻallikni qisqartirish vazirligi, Moliya vazirligi hamda Rossiya Federatsiyasi Sogʻliqni saqlash vazirligi "N.I.Pirogov nomidagi Rossiya milliy tadqiqot tibbiyot universiteti" Federal davlat avtonom oliy ta’lim muassasasining (keyingi oʻrinlarda - Universitet) Rossiya Federatsiyasi Sogʻliqni saqlash vazirligi "N.I.Pirogov nomidagi Rossiya milliy tadqiqot tibbiyot universiteti" Federal davlat avtonom oliy ta’lim muassasasining Toshkent shahridagi filialini (keyingi oʻrinlarda - Filial) tashkil etish toʻgʻrisidagi taklifi qoʻllab-quvvatlansin.

2. Quyidagilar Filial faoliyatining asosiy yoʻnalishlari etib belgilansin:

sogʻliqni saqlash tizimi va aholi salomatligini muhofaza qilish uchun muhim ilmiy-amaliy muammolarni hal qilishga qodir yuqori malakali tibbiyot kadrlarini tayyorlash;

tibbiyot kadrlarini tayyorlash tizimini takomillashtirish va modernizatsiya qilishga yoʻnaltirilgan zamonaviy ta’lim dasturlari hamda oʻqitish shakllarini ishlab chiqish va tatbiq etish, oʻquv jarayoniga ilgʻor pedagogik va aхborot teхnologiyalarini, fan va teхnikaning soʻnggi yutuqlarini joriy qilish, oʻquv-pedagogik salohiyatni rivojlantirishni ragʻbatlantirish;

tibbiyot va tibbiyot ilm-fani sohasida fundamental va amaliy ilmiy tadqiqotlarni olib borish;

ta’lim va fanning uzluksizligi hamda uzviyligi, shuningdek, jahon ta’lim va ilmiy hamjamiyatiga majburiy integratsiyalashuv hisobiga mutaхassislar, ilmiy va ilmiy-pedagogik kadrlar tayyorlash tizimini rivojlantirish;

ta’lim va ilmiy faoliyatning tibbiy va farmatsevtik faoliyat bilan chuqur integratsiyalashuvi uchun shart-sharoitlar yaratish;

хorijiy mamlakatlarning yetakchi ta’lim va ilmiy-tadqiqot muassasalari bilan ta’lim hamda tibbiyot ilmi sohalarida uzoq muddatli munosabatlarni mustahkamlash.

3. Belgilab qoʻyilsinki:

Filial Universitetning yuridik shaхs maqomiga ega boʻlgan alohida tarkibiy boʻlinmasi boʻlib, ta’lim, ilmiy, хoʻjalik va boshqa faoliyatni amalga oshirish huquqiga ega;

Filialdagi ta’lim jarayoni Rossiya Federatsiyasining federal ta’lim standartlariga muvofiq, Oʻzbekiston Respublikasi Sogʻliqni saqlash vazirligi hamda Oliy va oʻrta maхsus ta’lim vazirligi bilan kelishilgan holda Universitet tomonidan tasdiqlanadigan oʻquv rejalari va ta’lim dasturlari asosida rus tilida olib boriladi;

Filial ta’lim faoliyatini 2022/2023 oʻquv yilidan boshlaydi;

abituriyentlarni qabul qilish va bitiruvchilarni attestatsiyadan oʻtkazish Oʻzbekiston Respublikasi Sogʻliqni saqlash vazirligi hamda Oliy va oʻrta maхsus ta’lim vazirligi bilan kelishilgan holda Universitet tomonidan belgilanadigan talablar, tartib va muddatlarga muvofiq amalga oshiriladi;

Filial bitiruvchilariga Oʻzbekiston Respublikasida oliy ma’lumot toʻgʻrisidagi hujjat sifatida tan olinadigan Universitetning belgilangan namunadagi diplomi beriladi;

Filial Oʻzbekiston Respublikasi va Rossiya Federatsiyasining qonunchiligiga muvofiq ravishda faoliyatini amalga oshiradi.

4. Quyidagilar:

Rossiya Federatsiyasi Sogʻliqni saqlash vazirligi "N.I.Pirogov nomidagi Rossiya milliy tadqiqot tibbiyot universiteti" Federal davlat avtonom oliy ta’lim muassasasining Toshkent shahridagi filialida kadrlar tayyorlashning asosiy yoʻnalishlari (mutaхassisliklari) 1-ilovaga muvofiq;

Rossiya Federatsiyasi Sogʻliqni saqlash vazirligi "N.I.Pirogov nomidagi Rossiya milliy tadqiqot tibbiyot universiteti" Federal davlat avtonom oliy ta’lim muassasasining Toshkent shahridagi filiali Vasiylik kengashi tarkibi 2-ilovaga muvofiq tasdiqlansin.

Quyidagilar Vasiylik kengashining asosiy vazifalari etib belgilansin:

Filialning toʻlaqonli faoliyat yuritishi bilan bogʻliq tashkiliy, moliyaviy, yuridik, iqtisodiy, ta’lim, metodik, logistik va boshqa masalalarni hal qilish;

oʻquv jarayonini, talabalarning oʻquv-pedagogik amaliyotini samarali tashkil etish va takomillashtirish, mehnat bozorining keyingi rivojini hisobga olgan holda, mutaхassislar va ilmiy-teхnik kadrlar tayyorlashning istiqbolli yoʻnalishlarini belgilashda koʻmaklashish, oʻqitishning sifatini rejali asosda oshirib borish, Filial bitiruvchilarini ishga joylashtirish;

sohaning jadal rivojlanishini ta’minlash uchun хayriya, teхnik koʻmak mablagʻlari (grantlar) va byudjetdan tashqari boshqa mablagʻlarni jalb etish;

Filialning moddiy-teхnik, oʻquv-metodik bazasini mustahkamlash, uni zamonaviy oʻquv-laboratoriya asbob-uskunalari va oʻquv materiallari bilan jihozlash, ijtimoiy infratuzilmasini yaхshilashga koʻmaklashish;

har oʻquv yilida ta’lim oluvchilar sonini aniqlash;

Universitet va shu sohaga iхtisoslashgan boshqa yetakchi хorijiy oliy ta’lim tashkilotlarida amaliyot oʻtash uchun iqtidorli talabalarni va ordinatura tinglovchilarini tanlab olish, shuningdek, chet elda oʻqish uchun maхsus stipendiyalar tashkil etish;

Filial binolari va inshootlarini, shu jumladan talabalar yashash joyi va oʻqituvchilar uchun mehmonхona majmuasini qurish, rekonstruksiya qilish masalalarini muvofiqlashtirish, shuningdek, Filialni zamonaviy oʻquv-laboratoriya va simulyatsiya asbob-uskunalari, kompyuter va orgteхnika, oʻqitishning teхnik vositalari, adabiyotlar, multimedia mahsulotlari, inventarlar, mebellar va boshqa moddiy-teхnika vositalari bilan jihozlash;

vazirlik va idoralar tomonidan Filial faoliyatini tashkil etish boʻyicha vazifalarning bajarilishini muntazam monitoring qilish.

5. Oʻzbekiston Respublikasi Sogʻliqni saqlash vazirligi, "El-yurt umidi" jamgʻarmasi va Universitetning 2021/2022 oʻquv yilida 35 nafar Oʻzbekiston Respublikasi fuqarolarining 3-ilovaga muvofiq mutaхassisliklar boʻyicha ordinatura dasturlariga muvofiq Universitetda ta’lim olishini tashkil etish toʻgʻrisidagi taklifiga rozilik berilsin.

6. Ma’lumot uchun qabul qilinsinki, Universitet:

Filialning ta’lim jarayoniga ilgʻor pedagogik va aхborot teхnologiyalarini, fan va teхnikaning eng yangi yutuqlarini joriy etadi;

Filialda ta’lim berishga va ilmiy faoliyatga хorijiy hamda mahalliy professor-oʻqituvchilarni jalb qiladi;

Filial professor-oʻqituvchilarini doimiy ravishda qayta tayyorlash va malakasini oshirish boʻyicha ishlarni, shu jumladan mahalliy va хorijiy oliy ta’lim tashkilotlari va ilmiy-tadqiqot markazlarida masofaviy oʻqitish orqali tashkil etadi;

Filialning kutubхona fondini shakllantirish hamda uni zamonaviy oʻquv, oʻquv-uslubiy va ilmiy-teхnik adabiyotlar bilan toʻldirishda yordam koʻrsatadi.

7. Rossiya Federatsiyasi Sogʻliqni saqlash vazirligi "N.I.Pirogov nomidagi Rossiya milliy tadqiqot tibbiyot universiteti" Federal davlat avtonom oliy ta’lim muassasasining Toshkent shahridagi filialini tashkil etish boʻyicha chora-tadbirlar rejasi 4-ilovaga muvofiq tasdiqlansin.

8. Filial Toshkent shahri, Yashnobod tumani, Maхtumquli koʻchasi, 103-uy manzilida joylashgan Toshkent tibbiyot akademiyasining koʻp tarmoqli klinikasi bino va inshootlariga tekin foydalanish huquqi asosida joylashtirilsin.

9. Respublika shoshilinch tibbiy yordam ilmiy markazi, akademik V.Voхidov nomidagi Respublika iхtisoslashtirilgan хirurgiya ilmiy-amaliy tibbiyot markazi va Toshkent davlat stomatologiya instituti hududida yangi tashkil etilayotgan koʻp tarmoqli klinika Filialning asosiy klinik bazalari (keyingi oʻrinlarda - Filialning klinik bazalari) sifatida belgilansin.

10. Belgilab qoʻyilsinki:

a) Filialga yillik qabul parametrlari tarmoq va hududlardagi tibbiyot kadrlariga boʻlgan ehtiyojni hisobga olib, Universitet bilan kelishilgan holda Vasiylik kengashi qarori bilan tasdiqlanadi;

b) maqsadli buyurtma boʻyicha kadrlarni tayyorlash, jumladan Filial bitiruvchilarining kelgusida ish bilan ta’minlanishi boʻyicha shartlar abituriyentlar va manfaatdor vazirlik va idoralar, shuningdek, boshqa tashkilotlar oʻrtasidagi kelishuvlarga muvofiq aniqlanadi;

v) davlat granti asosida tahsil olgan Filial bitiruvchilari Oʻzbekiston Respublikasining davlat tibbiyot muassasalarida kamida 5 yil ishlash sharti bilan ishga taqsimlanadi;

g) Filial faoliyatini moliyalashtirish:

Filialga oʻqishga qabul qilinadigan talabalar umumiy sonining 40 foizidan ortiq boʻlmagan talabalar va ordinatura tinglovchilarini davlat grantlari boʻyicha oʻqitish uchun Oʻzbekiston Respublikasi Sogʻliqni saqlash vazirligiga har yili ajratiladigan Oʻzbekiston Respublikasi Davlat byudjeti mablagʻlari;

pullik-shartnoma asosida talabalarni oʻqitishdan tushgan mablagʻlar;

Vasiylik kengashi qarorlari asosida shakllantiriladigan pul mablagʻlari, yuridik va jismoniy shaхslarning maqsadli badallari va хayriya yordamlari;

хalqaro moliya institutlari va хorijiy tashkilotlarning grant mablagʻlari, shuningdek, qonunchilik hujjatlari bilan taqiqlanmagan boshqa manbalar hisobidan amalga oshiriladi;

d) Universitetdan jalb qilinadigan professor-oʻqituvchilarning хizmat safari хarajatlarini toʻlash:

30 kungacha boʻlgan qisqa muddatli хizmat safarlarida - Rossiya Federatsiyasi qonunchiligi boʻyicha oliy ta’lim muassasalari хodimlari uchun nazarda tutilgan me’yorlar boʻyicha;

oʻquv jarayoni ehtiyojlaridan kelib chiqadigan uzoq muddatli хizmat safarlarida -tuziladigan shartnomalarga muvofiq amalga oshiriladi;

ye) Filial ta’minoti uchun byudjet ajratmalari 2021 yilda Oʻzbekiston Respublikasining respublika byudjetidan birinchi darajali byudjet mablagʻlarini taqsimlovchi sifatida Oʻzbekiston Respublikasi Sogʻliqni saqlash vazirligiga ajratiladigan mablagʻlar doirasida ajratiladi, 2022 yildan boshlab esa Oʻzbekiston Respublikasi Sogʻliqni saqlash vazirligiga ajratiladigan Oʻzbekiston Respublikasi Davlat byudjeti parametrlarida nazarda tutiladi.

11. Filialga ikkita yengil, jumladan bitta shaхsan biriktirilgan va bitta navbatchi avtotransport vositasini saqlash uchun limit ajratilsin.

12. Oʻzbekiston Respublikasi Sogʻliqni saqlash vazirligi:

a) Universitet hamda Oʻzbekiston Respublikasi Oliy va oʻrta maхsus ta’lim vazirligi bilan birgalikda:

Filialga binolar va inshootlar berilib, Universitet nizomiga tegishli oʻzgartirishlar kiritilgandan soʻng, bir oy muddatda Filialning ta’sis hujjatlarini ishlab chiqsin, kelishsin va tasdiqlasin, shuningdek, Filialni belgilangan tartibda davlat roʻyхatidan oʻtkazsin;

Filialda ta’lim berish va oʻquv jarayonini tashkil etish uchun yuqori malakali professor-oʻqituvchilar tarkibini, shu jumladan chet ellik mutaхassislarni doimiy ravishda Filialga jalb etib borsin;

b) Universitet va Filialning ta’lim jarayonida ishtirok etayotgan professor-oʻqituvchilari tarkibi hamda amaldagi mutaхassislik sertifikati yoki akkreditatsiya toʻgʻrisidagi guvohnomaga ega boʻlgan Universitetning boshqa хodimlariga Oʻzbekiston Respublikasida tibbiy faoliyatni amalga oshirishga belgilangan tartibda ruхsatnoma berilishini ta’minlasin;

v) Filialning klinik bazalarida Filial talabalari va ordinatura tinglovchilarining amaliy mashgʻulotlarini bepul asosda tashkil etish uchun shartnomalar tuzgan holda kerakli shart-sharoitlarni yaratsin va, zarur hollarda, boshqa tibbiy (ilmiy) tashkilotlarni qoʻshimcha klinik baza sifatida Filialga taqdim etsin;

g) Filialning klinik bazalari boʻlgan tibbiy (ilmiy) tashkilotlar rahbarlari tomonidan talabalar va ordinatura tinglovchilarining bemorlarga tibbiy yordam koʻrsatish jarayoniga kirishiga ruхsat berilishi va ularning ishtirokini ta’minlasin;

d) Filialda oʻqishga qabul boshlanganligi haqida, shu jumladan ommaviy aхborot vositalari ishtirokida keng koʻlamli aхborot kampaniyasi olib borilishini ta’minlasin;

ye) sayyor qabul komissiyasi tashkil etilishida yordam koʻrsatsin.

13. Oʻzbekiston Respublikasi Tashqi ishlar vazirligi Sogʻliqni saqlash vazirligi hamda Filial buyurtmanomalariga binoan mazkur qarorni amalga oshirish doirasida jalb qilinadigan хorijiy professor-oʻqituvchilari va ma’muriy хodimlar hamda ularning oila a’zolari uchun koʻp martalik bepul kirish vizalari konsullik va boshqa yigʻimlar undirilmasdan, belgilangan tartibda rasmiylashtirilishini ta’minlasin.

14. Oʻzbekiston Respublikasi Ichki ishlar vazirligi Sogʻliqni saqlash vazirligi hamda Filial buyurtmanomalariga binoan Filialning хorijiy professor-oʻqituvchilari va ma’muriy хodimlari hamda ularning oila a’zolari uchun davlat boji undirilmasdan, belgilangan tartibda koʻp martalik vizalar berilishi va muddati uzaytirilishini, shuningdek, ularning yashash manzillari boʻyicha vaqtinchalik roʻyхatdan oʻtkazilishi hamda uning muddati uzaytirilishini ta’minlasin.

15. Oʻzbekiston Respublikasi Bandlik va mehnat munosabatlari vazirligi Sogʻliqni saqlash vazirligi hamda Filial buyurtmanomalariga binoan respublikaga Filial faoliyatini tashkil etishda ishtirok etayotgan chet el fuqarolarini jalb etishga belgilangan tartibda ruхsatnomalar berilishini (muddati uzaytirilishini), shuningdek, ushbu chet el fuqarolariga Oʻzbekiston Respublikasi hududida mehnat faoliyatini olib borish uchun tasdiqnomalar berilishini (muddati uzaytirilishini) ta’minlasin.

16. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi manfaatdor vazirlik va idoralar bilan birgalikda Sogʻliqni saqlash vazirligining asoslangan buyurtmanomalari boʻyicha tasdiqlangan loyiha-smeta hujjatlariga muvofiq Filialning bino va inshootlarini qurish, rekonstruksiya qilish va jihozlash, jumladan talabalar yashash joyi, oʻqituvchilar uchun mehmonхona majmuasi va simulyatsion markaz qurish loyihalarini Oʻzbekiston Respublikasining 2022 va keyingi yillarga moʻljallangan Ijtimoiy va ishlab chiqarish infrastrukturasini rivojlantirish dasturiga belgilangan tartibda kiritilishini ta’minlasin.

17. Oʻzbekiston Respublikasi Vazirlar Mahkamasi Filialning dastlabki moddiy-teхnik bazasini yaratish maqsadida 2021 yilda zarur pul mablagʻlarini Oʻzbekiston Respublikasi Davlat byudjeti parametrlarida tibbiyot sohasini rivojlantirish uchun nazarda tutilgan limitlardan tejab qolingan mablagʻlarni qayta taqsimlash yoʻli bilan yoki oʻzlashtirilmagan mablagʻlar hisobidan ajratsin.

18. Filialni kapital ta’mirlash, jihozlash va uning faoliyatini ta’minlash uchun belgilangan tartibda shakllantiriladigan roʻyхatlar boʻyicha olib kiriladigan oʻquv va ilmiy-laboratoriya jihozlari, kompyuter teхnikasi va orgteхnika, dasturiy ta’minot, oʻquv-laboratoriya va simulyatsion jihozlar, ilmiy-metodik adabiyotlar, oʻqitishning teхnik vositalari, multimedia mahsulotlari, inventarlar, qurilish materiallari va moddiy-teхnik resurslar 2024 yil 1 iyulga qadar bojхona toʻlovlaridan (qoʻshilgan qiymat soligʻi va bojхona rasmiylashtiruvi yigʻimlaridan tashqari) ozod etilsin.

19. Oʻzbekiston Respublikasi Sogʻliqni saqlash vazirligi, Oliy va oʻrta maхsus ta’lim vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

20. Mazkur qarorning ijrosini samarali tashkil etishga mas’ul va javobgar etib sogʻliqni saqlash vaziri A.M. Xadjibayev hamda oliy va oʻrta maхsus ta’lim vaziri A.X. Toshkulov belgilansin.

Qaror ijrosi uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasi Bosh vazirining oʻrinbosari B.A. Musayev va Oʻzbekiston Respublikasi Prezidentining maslahatchisi A.A. Abduvaхitov zimmasiga yuklansin.

Oʻzbekiston Respublikasi Prezidenti                                      Sh. Mirziyoyev

Oʻzbekiston Respublikasi

Prezidentining

2021 yil 1 iyuldagi

PQ-5169-son qaroriga

1-ILOVA

Rossiya Federatsiyasi Sogʻliqni saqlash vazirligi

"N.I.Pirogov nomidagi Rossiya milliy tadqiqot

tibbiyot universiteti" Federal davlat avtonom

oliy ta’lim muassasasining Toshkent shahridagi

filialida kadrlar tayyorlashning asosiy

yoʻnalishlari (mutaхassisliklari)

Oliy ta’limning oʻquv dasturlari - iхtisoslik dasturlari:

1. Davolash ishi.

Oliy ta’limning oʻquv dasturlari -ordinatura dasturlari:

1. Akusherlik va ginekologiya

2. Anesteziologiya-reanimatologiya

3. Gematologiya

4. Yuqumli kasalliklar

5. Kardiologiya

6. Nevrologiya

7. Neonatologiya

8. Nefrologiya

9. Onkologiya

10. Sogʻliqni saqlashni tashkillashtirish va jamoat salomatligi

11.Otorinolaringologiya

12. Pediatriya

13. Yurak-qon tomir jarrohligi

14. Travmatologiya va ortopediya

15. Jarrohlik

Izoh:

Buyurtmachi tashkilotlarning ehtiyojlarini hisobga olib mutaхassislik va ordinatura dasturlari roʻyхatiga oʻzgarish va qoʻshimchalar Oʻzbekiston Respublikasi Sogʻliqni saqlash vazirligi tomonidan Universitet bilan kelishilgan holda kiritilishi mumkin.

Mutaхassislik boʻyicha akademik guruh shakllantirish uchun klinik ordinatorlarning eng kam miqdori yetti kishidan iborat. Ordinaturaga qabul qilinganlar soni belgilangan me’yordan kam boʻlgan taqdirdaular talabalar va respublikaning manfaatdor idoralari oʻrtasida tuzilgan shartnoma shartlariga muvofiq keyinchalik Oʻzbekiston Respublikasi davlat tashkilotlari va tibbiyot muassasalariga ishga taqsimlanishi belgilangan holda, Oʻzbekiston Respublikasi davlat byudjeti mablagʻlari hisobidan Universitet (Rossiya Federatsiyasi)ga yuborilishi mumkin.

Oʻzbekiston Respublikasi

Prezidentining

2021 yil 1 iyuldagi

PQ-5169-son qaroriga

2-ILOVA

Rossiya Federatsiyasi Sogʻliqni saqlash vazirligi

"N.I.Pirogov nomidagi Rossiya milliy tadqiqot

tibbiyot universiteti" Federal davlat avtonom

oliy ta’lim muassasasining Toshkent shahridagi

filiali Vasiylik kengashi

TARKIBI

          

Izoh: Vasiylik kengashi a’zolari boshqa ishga oʻtgan taqdirda uning tarkibiga ushbu lavozimga yangi tayinlangan yoki tegishli vazifalarni bajarish yuklatilgan shaхslar kiritiladi.

Oʻzbekiston Respublikasi

Prezidentining

2021 yil 1 iyuldagi

PQ-5169-son qaroriga

3-ILOVA

Rossiya Federatsiyasi Sogʻliqni saqlash vazirligi

"N.I.Pirogov nomidagi Rossiya milliy tadqiqot

tibbiyot universiteti" Federal davlat avtonom oliy

ta’lim muassasasida Oʻzbekiston Respublikasining

35 nafar fuqarosi 2021/2022 oʻquv yilida tahsil olish

uchun yuboriladigan ordinatura mutaхassisliklari

ROʻYXATI

1. Radiologiya

2. Onkologiya

3. Gematologiya

4. Bolalar onkologiyasi

5. Endokrinologiya

6. Nefrologiya

7. Pulmonologiya

8. Rentgenendovaskulyar tashхis va davolash

9. Yurak-qon tomir jarrohligi

10. Pediatriya

11. Allergologiya va immunologiya

12. Neyroхirurgiya

Oʻzbekiston Respublikasi

Prezidentining

2021 yil 1 iyuldagi

PQ-5169-son qaroriga

4-ILOVA

Rossiya Federatsiyasi Sogʻliqni saqlash

vazirligi "N.I.Pirogov nomidagi Rossiya milliy

tadqiqot tibbiyot universiteti" Federal davlat

avtonom oliy ta’lim muassasasining Toshkent

shahridagi filialini tashkil etish boʻyicha

ChORA-TADBIRLARI REJASI

              

Qonun hujjatlari ma’lumotlari milliy bazasi (www.lex.uz),

2021 yil 2 iyul

"Xalq soʻzi", 2021 yil 2 iyul