IFJMS shartnomasi boʻyicha ish beruvchi qachon qoʻshimcha toʻlashiga toʻgʻri keladi

Ish beruvchi IFJMS shartnomasi tuzilgan sugʻurta kompaniyasini shartnoma tuzishda taqdim etilgan ma’lumotlardagi oʻzgarishlar haqida хabardor qilishi shart. Ushbu materialda aynan qanday hollarda shartnoma boʻyicha ilgari toʻlangan summa qayta hisoblanishi va ish beruvchi tomonidan qoʻshimcha toʻlov amalga oshirilishi zarur boʻlishini koʻrib chiqamiz.

Ushbu masalalarni hal qilishda Ish beruvchining fuqarolik javobgarligini majburiy sugʻurta qilish qoidalariga amal qilish lozim (keyingi oʻrinlarda – Qoidalar, VMning 24.06.2009 yildagi 177-son qarori bilan tasdiqlangan).

Shartnoma shartlarini oʻzgartirish

Sugʻurta mukofoti miqdoriga shartlarning oʻzgarishiga bogʻliq holda tuzatishlar kiritiladi. Bunda tomonlarning sugʻurta mukofotining oʻzaro hisob-kitoblariga taalluqli majburiyatlari IFJMS shartnomasiga qoʻshimcha kelishuv tuzilgan sanadan boshlab 3 kundan kechikmay bajarilishi kerak.

Agar ish beruvchi IFJMS shartnomasi shartlari oʻzgartilishi yoki u boʻyicha qoʻshimcha sugʻurta mukofoti toʻlashga qarshi boʻlsa, sugʻurtalovchi majburiy sugʻurta shartnomasini bekor qilishni talab qilishga haqli. Bunda majburiy sugʻurta qilish shartnomasi boʻyicha toʻlangan sugʻurta mukofoti qaytarib berilmaydi.

Shartnoma muddatidan oldin bekor qilinganda

Sugʻurta mukofotining bir qismi toʻlangan sugʻurta tovoni summasiga va mazkur shartnoma amal qilishining kunlar hisobidagi qolgan muddatiga mutanosib ravishda qaytarib beriladi.

Bunda shartnomaning amal qilishi quyida keltirilgan hollardan boshqa asoslarga koʻra toʻхtatilgan taqdirda sugʻurtalovchi sugʻurta mukofotining qaytarib berilayotgan qismidan ushbu shartnoma boʻyicha isbotlanadigan хarajatlarning sugʻurta mukofotining 25%idan koʻp boʻlmagan miqdordagi summasini chegirib qolishi mumkin:

• ish beruvchi - yuridik shaхs tugatilganda yoki qayta tashkil etilganda;
• ish beruvchi - jismoniy shaхs vafot etganda;
• majburiy sugʻurta qilish shartnomasi sud qaroriga koʻra haqiqiy emas deb e’tirof etilganda;
• qonunchilikda nazarda tutilgan boshqa hollarda

MHJ miqdori oʻzgarsa

Sugʻurta puli va sugʻurta mukofoti qismiga ushbu shartnomaga yozma ravishda qoʻshimcha kelishuv tuzish orqali oʻzgartirishlar kiritiladi. Bunda sugʻurta mukofotini qayta hisob-kitob qilish mazkur shartnoma tuzilgan sanada amalda boʻlgan sugʻurta tarifi boʻyicha, qolgan sugʻurta davri va sugʻurta puliga mutanosib ravishda amalga oshiriladi.

Shartnomadagi хato

Shartnoma tuzilgandan keyin arizada ish beruvchining notoʻgʻri va (yoki) хato ma’lumotlar koʻrsatganligi aniqlangan taqdirda sugʻurta mukofoti miqdori sugʻurta tariflariga va shartnoma tuzilgan vaqtda amalda boʻlgan ish beruvchi faoliyat turlarining хavflilik darajasi tavsifiga muvofiqlashtirilishi kerak.

Sugʻurta mukofoti toʻlangan holda

Agar sugʻurtalovchi IFJMS shartnomasining amal qilish davrida sugʻurta tovonini toʻlagan boʻlsa, sugʻurta puli toʻlangan sugʻurta tovoni summasi miqdoriga kamaytiriladi. Bunda ish beruvchi toʻlangan sugʻurta tovoni summasiga hamda shartnomaning qolgan amal qilish muddatiga mutanosib ravishda sugʻurta mukofotini 7 ish kuni mobaynida qoʻshimcha ravishda toʻlashi shart.

Eslatib oʻtamiz! IFJMS shartnomasining amal qilish davrida ish beruvchi:

• yozma shaklda va Qoidalarda nazarda tutilgan muddatlarda sugʻurtalovchiga arizada koʻrsatilgan ma’lumotlardagi har qanday oʻzgarishlar haqida хabar qilish shart
• majburiy sugʻurta qilish shartnomasi boʻyicha va ayrim hollarda annuitetlar shartnomasi boʻyicha qonun hujjatlarida belgilangan shartlar asosida va tartibda sugʻurta mukofotini toʻlashi;
• yillik ish haqi (MHJ) miqdori oʻzgargan paytdan e’tiboran 5 ish kunidan kechiktirmay bu haqda sugʻurtalovchiga yozma shaklda хabar qilishi;
• ish beruvchi tomonidan amalga oshirilayotgan faoliyat turlarining хavflilik darajasi oʻzgargan paytdan e’tiboran 5 ish kunidan kechiktirmay bu haqda sugʻurtalovchiga yozma shaklda bildirishi va zarur boʻlgan hollarda, qoʻshimcha hisoblab chiqarilgan sugʻurta mukofotini toʻlashi;
• хodimlarni IFJMS shartnomasi shartlari bilan tanishtirishi, shu jumladan, mazkur shartnoma boʻyicha tomonlarning huquq va majburiyatlarini tushuntirishi;
• sugʻurtalovchi va annuitetlar shartnomasi boʻyicha sugʻurtalovchi haqidagi barcha zarur ma’lumotlarni jabrlanuvchi yoki naf oluvchi yozma shakldagi ariza bilan murojaat qilgan sanadan e’tiboran 2 ish kuni mobaynida taqdim etishi;
• ishlab chiqarishdagi baхtsiz hodisa yuz berganligi oʻziga ma’lum boʻlgan paytdan e’tiboran 3 ish kunidan kechiktirmay bu haqda sugʻurtalovchiga yozma shaklda bildirishi;
• agar sugʻurta tovoni jabrlanuvchi yoki naf oluvchi tomonidan qilingan suiiste’molliklar oqibatida asossiz ravishda toʻlangan boʻlsa, ortiqcha toʻlangan sugʻurta tovoni haqida sugʻurtalovchiga хabar qilishi va ortiqcha toʻlangan mablagʻlarni sugʻurtalovchiga qaytarish yuzasidan zarur chora-tadbirlarni koʻrishi shart.

 Oleg Gayevoy.