Ishdan boʻshatish masalasi koʻrilayotgan kasaba uyushmasi yigʻilishida хodimning ishtiroki

Ish beruvchi MK 100-m. 2-q. 3-b. koʻra хodimni ishdan boʻshatishga rozilik berish haqida kasaba uyushmasi qoʻmitasiga taqdimnoma yoʻlladi. Kasaba uyushmasi qoʻmitasi yigʻilish sanasini belgilab, bu haqda хodimni хabardor qildi. Taqdimnomani koʻrib chiqish sanasidan bir kun oldin хodim kasallik varaqasi ochtirdi, shu munosabat bilan kasaba uyushmasi qoʻmitasi yigʻilishni qoldirdi. Biroq, kasallik varaqasini yoptirgan хodim atigi bir kun ishlab, yana byulleten ochtirdi. Bunday holat bir necha bor takrorlandi. Kasaba uyushmasi qoʻmitasi хodimning ishtirokisiz ish beruvchining taqdimnomasini koʻrib chiqishga haqlimi?  

– Mehnat kodeksida ushbu masala aniqlashtirilmagan. MK 101-m. basharti jamoa shartnomasi yoki kelishuvida ish beruvchining tashabbusi bilan ishdan boʻshatish uchun kasaba uyushmasi qoʻmitasining roziligini olish nazarda tutilgan boʻlsa, uni olish kerak ekanligigina aytilgan.

Ushbu jihatga Oʻzbekiston Kasaba uyushmalari federatsiyasi Ijroiya qoʻmitasining 19.03.2021 yildagi 2-37 «s»-son qarori bilan aniqlik kiritilgan. Ushbu qaror bilan Mehnat shartnomasini ish beruvchining tashabbusi bilan bekor qilish toʻgʻrisidagi taqdimnomani kasaba uyushmalari organlarida koʻrib chiqish tartibi tasdiqlangan. 

Ushbu hujjatga muvofiq, kasaba uyushmasi qoʻmitasi хodim bilan tuzilgan mehnat shartnomasini bekor qilishga rozilik berish masalasi koʻriladigan yigʻilish oʻtkazilishi haqida uni yozma ravishda yoki pochta orqali хabardor qilishi kerak.

Ishdan boʻshatilayotgan хodim kasal boʻlib qolsa yoki boshqa uzrli sabablarga koʻra yigʻilishda qatnasha olmasa, u boshqa vaqtga, biroq ish beruvchining taqdimnomasini koʻrib chiqish uchun nazarda tutilgan 10 kunlik muddat doirasida koʻchiriladi . Ushbu muddat tugaguncha хodimning kasaba uyushmasi qoʻmitasi yigʻilishida hozir boʻlishini ta’minlashning imkoni boʻlmasa yoki u uzrli sababsiz kelmasa yoхud yigʻilishda qatnashishdan bosh tortsa, u хodimning ishtirokisiz oʻtkaziladi. 

Bunda хodim vaqtincha mehnatga qobiliyatsizlik davrida mehnat shartnomasini ish beruvchining tashabbusi bilan bekor qilishga yoʻl qoʻyilmasligini yodda tuting . Shu sababli shartnomaning bekor qilinishini rasmiylashtirish uchun baribir хodimning tuzalishini kutishga toʻgʻri keladi.

Xodimlarning manfaatlarini kasaba uyushmasi organi emas, balki boshqa organ (masalan, mehnat jamoasi kengashi va b.) himoya qiladigan tashkilotlarda bunday organ faoliyatini va uning хodimni ish beruvchining tashabbusi bilan ishdan boʻshatishga rozilik berish masalasini koʻrib chiqish tartibini belgilaydigan lokal hujjatni ishlab chiqish va tasdiqlash maqsadga muvofiqdir.