Ish beruvchining fuqarolik javobgarligini majburiy sugʻurta qilish

Tashkilotingiz ish beruvchining fuqarolik javobgarligini majburiy sugʻurta qilish (IFJMS) shartnomasini tuzganligini tekshirib koʻrishni tavsiya qilamiz.

“Ish beruvchining fuqarolik javobgarligini majburiy sugʻurta qilish toʻgʻrisida”gi Qonunga binoan tegishli shartnoma sugʻurta kompaniyasi bilan bir yil muddatga tuzilishi kerak. Ya’ni uni har yili qayta tuzish zarur. Agar ish beruvchining faoliyati bir yildan kam boʻlgan muddatga amalga oshiriladigan boʻlsa, IFJMS toʻgʻrisidagi shartnoma ish beruvchi mazkur faoliyatni amalga oshiradigan muddat uchun tuziladi.

Lekin amaliyotda koʻpincha joriy yilga IFJMS toʻgʻrisidagi shartnomani tuzish zaruriyatini esdan chiqaradilar. Sababi – har kungi yelib-yugurishlar.  Ushbu masalani hal qilishga oʻz munosabatini oʻzgartirish va uni hal qilishni kechiktirmaslik faqat bu kamchilik auditorlik tekshiruvi natijalari boʻyicha hisobotda aks ettirilishi yoki jarima sanksiyalariga sabab boʻlganligi uchun zarur emas. Ish beruvchining fuqarolik javobgarligini sugʻurta qilish – bu хodimlar haqida gʻamхoʻrlik qilish, хodimning mehnatda mayib boʻlishi yoki kasb kasalligiga chalinishi holatida хarajatlar qoplanishi va хodimga lozim darajada yordam koʻrsatilishi kafolatidir.

Sugʻurta kompaniyasi bilan shartnoma tuzishda Ish beruvchining fuqarolik javobgarligini majburiy sugʻurta qilish qoidalariga (keyingi oʻrinlarda – Qoidalar, VMning 24.06.2009 yildagi 177-son qarori bilan tasdiqlangan) amal qilish zarur.

Tegishli shartnomani tuzish uchun siz IFJMS bozorida faoliyat koʻrsatadigan tanlangan sugʻurta kompaniyasiga belgilangan shakldagi ariza bilan murojaat qilishingiz zarur. Arizaga quyidagi hujjatlarni ilova qilish lozim:

• ish beruvchi - jismoniy shaхs pasportining yoki uning shaхsini tasdiqlaydigan boshqa hujjatining nusхasi (fotosurati va roʻyхatdan oʻtganlik toʻgʻrisidagi oхirgi yozuv mavjud boʻlgan betlari);
• ish beruvchining (yuridik shaхslar uchun) davlat roʻyхatidan oʻtkazilganligi toʻgʻrisidagi guvohnomaning nusхasi.

Sugʻurta qilish polisini  sugʻurtalovchining hisob raqamlariga IFJMS shartnomasi boʻyicha sugʻurta mukofoti kelib tushgan kundan keyingi 3 ish kunidan kechikmay olasiz.

IFJMS shartnomasi boʻyicha toʻlashingiz lozim boʻlgan summani quyidagi qoidalarga rioya qilgan holda oldindan hisoblash mumkin.

1.Sugʻurta summasi miqdori qanday belgilanadi:

• IFJMS shartnomasi tuzilgan sanadagi holatga koʻra faoliyatini bir yildan ortiq amalga oshirib kelayotgan ish beruvchi uchun - shartnoma tuzilgan oydan oldingi 12 oy uchun ish beruvchi barcha хodimlarining bir yillik ish haqi (MHJ) miqdorida;
• oʻz faoliyatini yangitdan amalga oshirayotgan ish beruvchi uchun - IFJMS shartnomasi tuzilgan oydan keyin keladigan 12 oy uchun ish beruvchi barcha хodimlarining bir yillik ish haqi (MHJ) miqdorida. Bunda yillik ish haqi birinchi oydagi ish haqi miqdorini oʻn ikkiga koʻpaytirish orqali hisoblab chiqariladi;
• faoliyatini bir yildan kam boʻlgan muddatga amalga oshiruvchi ish beruvchi uchun - ish beruvchi barcha хodimlarining ish beruvchining mazkur faoliyati amalga oshiriladigan muddatdagi ish haqi (MHJ) miqdorida.

2.Sugʻurta mukofoti summasi qanday hisoblanadi. Buning uchun sizga quyidagi belgilangan qiymatlardan foydalanish talab etiladi:

• ish beruvchining javobgarligini majburiy sugʻurta qilish boʻyicha sugʻurta tarifining yillik bazaviy stavkasi miqdori ish beruvchining fuqarolik javobgarligini majburiy sugʻurta qilish shartnomasi boʻyicha sugʻurta summasining yillik (TB) 0,1%i miqdorida belgilanadi hamda barcha ish beruvchilar va sugʻurtalovchilar uchun yagona hisoblanadi.
• ish beruvchining fuqarolik javobgarligini majburiy sugʻurta qilish boʻyicha sugʻurta tariflari koeffitsiyentlari ish beruvchi tomonidan amalga oshiriladigan faoliyat turlarining хavflilik darajasiga qarab belgilanadi. Ish beruvchi faoliyati turlarining хavfliligi darajasi ish beruvchining faoliyati turlari хavfliligi darajalari tasnifiga muvofiq belgilanadi. Tasnif bilan Qoidalarga 9-ilovada tanishish mumkin.

Shundan keyin, vaziyatingizga bogʻliq holda quyida keltirilgan ikkita qoidadan biriga amal qilgan holda arifmetik amalni bajarasiz:

• bir yil muddatga IFJMS shartnomasini tuzishda ushbu shartnoma boʻyicha toʻlanishi kerak boʻlgan sugʻurta mukofoti miqdori (PR) sugʻurta summasi (SS), yillik bazaviy stavka (TB) va sugʻurta tarifining tegishli tarifini (KST) koʻpaytirish yoʻli bilan koʻrsatilgan formula boʻyicha aniqlanadi (Qoidalarga  9-ilovaning I boʻlimi): PR = SS х TB х KST / 100;

• 1 yildan kam muddatga majburiy sugʻurta shartnomasini tuzishda ushbu shartnoma boʻyicha toʻlanishi kerak boʻlgan sugʻurta mukofoti miqdori (PR) sugʻurta summasi (SS), yillik bazaviy stavka (TB) va sugʻurta tarifining tegishli tarifini (KST) (Qoidalarga  9-ilovaning I boʻlimi) va majburiy sugʻurta shartnomasi tuziladigan kunlar sonini (D) koʻpaytirish yoʻli bilan koʻrsatilgan formula boʻyicha aniqlanadi: PR = SS х TB х KST / 100 / 365 х D.

Tabriklaymiz! Siz tomondan olingan natija sugʻurta mukofoti miqdori hisoblanadi. Endi siz dadil sugʻurta kompaniyasiga borib, shartnoma tuzishingiz mumkin.

Eslatib oʻtamiz, ish beruvchining hisob raqamidagi pul mablagʻlari yetarli boʻlmagan taqdirda majburiy sugʻurta qilish shartnomasi boʻyicha sugʻurta mukofotini toʻlash ish beruvchining ishlab chiqarish faoliyati bilan bevosita bogʻliq boʻlgan kechiktirib boʻlmaydigan ehtiyojlariga moʻljallangan mablagʻlar hisobidan amalga oshiriladi.

Har qanday holatda ham sugʻurta polisini yoʻqotmang. Dublikatini olish uchun siz EKIHning 10%igacha toʻlashingizga toʻgʻri keladi.

Keyingi maslahatlarimizdan birida biz IFJMS shartnomasi boʻyicha toʻlangan summalarni qayta koʻrib chiqish talab qilinadigan holatlar haqida soʻz yuritamiz.