Oktyabr oyida har bir хodim uchun foydali boʻladi:
Kasaba uyushmasi qoʻmitasining amaldagi raisi vakolat muddati tugaganligi sababli oʻz nomzodini hisobot-saylov konferensiyasida qayta qoʻymoqchi. U ilgari saylanganligi sababli asosiy ishidan ozod qilingan. Agar u qayta saylanmasa, uni ishdan boʻshatish mumkinmi? Qaysi asosda?
-Vakillik organlaridagi saylab qoʻyiladigan lavozimlarga saylangani munosabati bilan ishlab chiqarishdagi ishidan ozod etilgan хodimlarga ularning saylab qoʻyiladigan lavozimdagi vakolati tugaganidan keyin avvalgi ishi (lavozimi) beriladi. Bunday ish (lavozim) mavjud boʻlmasa, — хodim roziligi bilan oʻsha yoki boshqa tashkilotda avvalgisiga teng boshqa ish (lavozim) beriladi 
.
Agar bunday хodimlarni tegishli ish (lavozim) bilan ta’minlash imkoni boʻlmasa, yangi muddatga saylanmaganligi munosabati bilan MKning 97-moddasi 6-bandi asosida mehnat shartnomasi bekor qilinadi.
Ushbu me’yor belgilangan tartibda oʻtkazilgan saylov natijalariga koʻra, lavozimga talabgor (ariza bergan) boʻlsa-da, oʻz lavozimiga qayta saylanmagan хodimlarga nisbatan qoʻllaniladi. Shu bilan birga ular qonun hujjatlari, jamoa shartnomalari, kelishuvlarda nazarda tutilgan imtiyozlardan foydalanishadi.
Ma’lumot uchun:
Kasaba uyushma organlarida saylanadigan lavozimlarga saylangan хodimlar asosiy ishlaridan, qoida tariqasida, koʻp sonli хodimlarga ega boʻlgan tashkilotlarda ozod qilinadi. Ya’ni, ular faqat kasaba uyushmasi faoliyati bilan shugʻullanadi, ularning asosiy maqsadi korхonada ishchilar manfaatlarini himoya qilish va vakillik qilishdir. Bunday vakillarni asosiy ishlaridan ozod qilish masalasi oliy shoʻ’ba kasaba uyushmasi organi bilan hamkorlikda hal etiladi.
