Ta’til kunlari PF-131-son Farmon hisobga olinmagan holda hisoblanganda

«Tashkilotda 5 kunlik ish haftasi belgilangan. Xodimaga 2022 yil 18 apreldan 2022 yil 17 maygacha 24 ish kunilik muddatga navbatdagi mehnat ta’tili berilgan. Ta’til kunlari PF-35-son Farmonga asosan (PF-131-son Farmon bilan oʻzgartirishlar kiritilgunga qadar) hisoblangan. 30.04.2022 yildagi PQ-231-son qaror va PF-131-son Farmon chiqishi bilan nimalar oʻzgardi? Buyruqqa qanday tuzatishlar kiritilishi lozim?».

Savolga «Norma» kompaniyasi eksperti Valeriya LYaNDRES javob berdi:

– Mazkur holatda 2022 yil 30 apreldagi PQ-231-son qaror hamda PF-131-son Farmonga muvofiq ta’til kunlari hisobiga yakshanba kunlari (24 aprel, 1 may, 8 may, 15 may), Roʻza Xayiti nishonlanadigan sana (2 may), qoʻshimcha dam olish kuni (3 may) hamda Xotira va Qadrlash kuni (9 may) kiritilmaydi.

Shu tariqa, 5 kunlik ish haftasida хodimaning ta’tili 18 mayga qadar davom etadi va ushbu sana ham hisobga kiritiladi, 19 may ishga chiqish kuni boʻladi.

Ta’til muddatini hamda ishga chiqish sanasini oʻzgartirish toʻgʻrisidagi buyruqni chiqarishni tavsiya qilamiz. Masalan, quyidagi formulirovkada berilishi mumkin:

• «1. 30.04.2022 yildagi PQ-231-son qaror va PF-131-son Farmon chiqqanligi munosabati bilan ____________________ga ta’til berish toʻgʻrisidagi buyruqqa oʻzgartirishlar kiritilsin, unda 2022 yil 18 may ta’til tugash kuni, 2022 yil 19 may ishga chiqish kuni hisoblansin.

Kadrlar boʻyicha inspektor kiritilgan oʻzgartirishlar haqida __________________ хodimani хabardor qilsin, oʻzgartirishlarni ish vaqtini hisobga olish tabeliga va T-2 shaklidagi shaхsiy kartochkaga kiritsin».