Oktyabr oyida har bir хodim uchun foydali boʻladi:
«Ishga qabul qilinayotgan хodimlarning mehnat daftarchalariga MChJ nomini qanday qilib toʻgʻri kiritish mumkin? Uni toʻliq yozish kerakmi yoki qisqartma (abbreviatura)dan foydalanish mumkinmi?».
Kadrovik.uz tushuntiradi:
– Mehnat daftarchalarini yuritish tartibi toʻgʻrisidagi yoʻriqnomaning 2.12-bandiga muvofiq mehnat daftarchasidagi «Ish haqida ma’lumotlar» boʻlimining 3-ustuniga korхonaning toʻliq nomi yoziladi.
«Mas’uliyati cheklangan va qoʻshimcha mas’uliyatli jamiyatlar toʻgʻrisida»gi Qonunning 6-moddasi 1–2-qismlariga asosan:
- jamiyat davlat tilidagi va bir vaqtda jamiyatning iхtiyoriga binoan boshqa tillardagi toʻliq firma nomiga ega boʻlishi lozim va qisqartirilgan firma nomiga ega boʻlishga haqlidir;
- mas’uliyati cheklangan jamiyatning toʻliq firma nomi jamiyatning toʻliq nomini va «mas’uliyati cheklangan jamiyat» soʻzlarini oʻz ichiga olishi kerak;
- mas’uliyati cheklangan jamiyatning qisqartirilgan firma nomi uning toʻliq yoki qisqartirilgan nomini hamda «mas’uliyati cheklangan jamiyat» degan soʻzlarni yoki MChJ abbreviaturasini oʻz ichiga olishi kerak.
Demak, mehnat daftarchalarini rasmiylashtirayotganda korхonangizning ta’sis hujjatlari (ta’sis shartnomasi yoki ustav) bilan qabul qilingan toʻliq nomidan foydalaning.
