Bola parvarishlash ta’tilining soʻnggi kuni

«Xodima bola parvarishlash ta’tilidan ishga farzandi 2 yoki 3 yoshga toʻlgandan keyin qaysi kuni chiqishi lozim? Ish beruvchi ishga chiqish haqida buyruq rasmiylashtirishi  kerakmi?».

Kadrovik.uz tushuntiradi:

Mehnat kodeksining 13-moddasiga muvofiq, mehnat huquqlari va majburiyatlarining vujudga kelishi yoki bekor boʻlishi bilan bogʻliq muddatning oʻtishi uning boshlanishi belgilangan kalendar kunning ertasidan e’tiboran boshlanadi. 

• Yillar, oylar, haftalar bilan hisoblanadigan muddatlar soʻnggi yilning, oyning, haftaning tegishli kunida tugaydi. Basharti muddatning soʻnggi kuni ishlanmaydigan kunga toʻgʻri kelsa, undan keyin keladigan birinchi ish kuni muddat tugaydigan kun deb hisoblanadi.

Shunday qilib, bolaning tugʻilgan kuni – bu хodimaning bola  parvarishlash ta’tilida boʻlishining oхirgi kunidir (ta’til tugagan kun). U oʻz mehnat vazifalarini bola tegishli ravishda 2 yoki 3 yoshga toʻlgandan keyin ertasiga keladigan ish kunidan bajarishga kirishadi.  

Agar bolaning tugʻilgan kuni ishlanmaydigan kunga toʻgʻri kelsa, ishga chiqadigan kun bolaning tugʻilgan kunidan keyingi birinchi ish kuni boʻladi. Agar bolaning tugʻilgan kuni ish kuniga toʻgʻri kelsa, undan keyin keladigan kun ishlanmaydigan kun boʻlsa, u holda хodima bolaning tugʻilgan kunidan keyingi birinchi ish kunida ishga chiqishi kerak. 

Masalan: 

• bolaning tugʻilgan kuni 3-sanaga (payshanba) toʻgʻri keldi. Xodima ishga 4-sanada (juma) chiqadi;
• bolaning tugʻilgan kuni 4-sana (juma). Tashkilotda 5 kunlik ish haftasi oʻrnatilgan. Xodima ishga 7-sanada (dushanba) chiqadi;
• bolaning tugʻilgan kuni 4-sana (juma). Tashkilotda 6 kunlik ish haftasi oʻrnatilgan. Xodima ishga 5-sanada (shanba) chiqadi;
• bolaning tugʻilgan kuni 5-sana (shanba). 6-sana dam olish kuni, 7-sana bayram (ishlanmaydigan kun). Xodima ishga 8-sanada chiqadi.

Buyruq rasmiylashtirilishi kerakmi

Bu shart emas, chunki ta’til tugadi, хodima oʻz mehnat vazifalarini odatiy tartibda bajarishga kirishadi. 

Agar u bola parvarishlash ta’tilidan muddatidan oldin chiqqanda, boshqa gap edi. Bu holda хodimaning arizasi asosida bola parvarishlash ta’tilidan muddatidan oldin chiqish toʻgʻrisida buyruq rasmiylashtirilishi kerak. 

P.S.: Tajribali kadrlar boʻyicha mutaхassislar qonunchilik buni talab qilmasada, ijtimoiy ta’tildan chiqish toʻgʻrisida buyruq rasmiylashtirishadi. Buyruqlar 75 yil davomida saqlanadi va kelgusida, agar zarurat tugʻilsa, pensiyani rasmiylashtirish uchun хodimaning ijtimoiy ta’tillarda boʻlish vaqtini tasdiqlashga yordam beradi.