ЎРҚ-1030-сон Қонунга мувофиқ Меҳнат кодексига МК 106-моддасига кўра меҳнат шартномасини тузиш шаклига тааллуқли ўзгартишлар киритилди. Эндиликда уни нафақат анъанавий ёзма (қоғоз) шаклда, балки электрон шаклда ҳам расмийлаштириш имконияти назарда тутилган.

Нималар ўзгарди?

Меҳнат шартномасининг шакли
♦️Қандай эди: Меҳнат шартномаси фақат ёзма шаклда, тарафлар томонидан имзоланган камида икки нусхада тузилар эди.
♦️Қандай бўлди: Энди шартномани қоғоз шаклда ҳам, электрон шаклда ҳам расмийлаштириш мумкин. Иккала вариант ҳам тенг юридик кучга эга.

Электрон меҳнат дафтарчаси
♦️Янгилик: МК 106-моддасининг 2-қисмида аниқлаштирилишига кўра, агар меҳнат шартномаси электрон шаклда тузиладиган бўлса, уни расмийлаштириш қонун ҳужжатларида белгиланган тартибда "Ягона миллий меҳнат тизими" идоралараро дастурий-аппарат комплексида (ЯММТ) амалга оширилиши керак.

♦️Билиш муҳим:

• 2024 йил декабрь ойида Вазирлар Маҳкамасининг 27.12.2024 йилдаги 891-сон Қарори қабул қилинди, ушбу қарор билан ЯММТда электрон меҳнат шартномаларини тузиш ва электрон меҳнат дафтарчаларини юритиш тартиби тўғрисидаги Низомга "Электрон меҳнат шартномасини тузиш" деган янги боб қўшилди.
• Меҳнат шартномасининг электрон шаклидан фойдаланишни режалаштираётган иш берувчилар ушбу низомда белгиланган тартибга риоя қилишлари керак.

Бу иш берувчилар ва ходимлар учун нимани англатади?

✅ Энди меҳнат шартномасини икки шаклда – қоғоз ёки электрон шаклда тузиш мумкин, бунда уларнинг иккиси ҳам тенг аҳамиятга эга.
✅ Агар шартнома электрон шаклда расмийлаштириладиган бўлса, уни рўйхатдан ўтказиш фақат ЯММТ тизими орқали амалга оширилади.
✅ Бу ўзгариш кадрлар ҳисобини рақамлаштиришга ёрдам беради, қоғоз ҳужжат айланишини қисқартиради ва меҳнат муносабатларининг шаффофлигини оширади.

Хулоса: Иш берувчилар меҳнат муносабатларини расмийлаштиришда янги талабларни ҳисобга олишлари ва зарур ҳолларда ЯММТда белгиланган электрон меҳнат шартномасини тузиш тартиби билан танишишлари керак.