Xodimning kasallik davrida lavozimini qanday oʻzgartirish mumkin (bosqichma-bosqich yoʻriqnoma)

«Xodim koʻp kasal boʻladi, uning vazifasini boshqa xodimlar bajaradi. Rahbariyat uning lavozimiga boshqa doimiy xodimni qabul qilishga qaror qildi. Telefon orqali suhbatda xodim oʻtkazishga rozilik bildirdi. U kasallik ta’tilida boʻlganida buyruqni rasmiylashtirish qonuniymi? Qanday qilib hammasini toʻgʻri rasmiylashtirish kerak?".

Kadrovik.uz tushuntiradi:

– Kasallik yoki tez-tez "kasallik ta’tili" ish beruvchining tashabbusi bilan xodimni doimiy ravishda boshqa lavozimga oʻtkazish uchun asos boʻla olmaydi. Vaqtinchalik mehnatga layoqatsizlik davrida xodimning ish joyi va egallab turgan lavozimi saqlanadi.

Doimiy oʻtkazishga — sabablari va vaziyatdan qat’i nazar – faqat xodimning roziligi bilan yoʻl qoʻyiladi .

Tibbiy xulosaga muvofiq sogʻligʻi holatiga koʻra ishni bajara olmasa  tibbiy xulosadagi tavsiyalarga muvofiq ish beruvchi unga boshqa ishni taklif qilishi shart.

E’tibor bering: taklif qilish, oʻz tashabbusi boʻyicha oʻtkazish emas. Xodim boshqa ishga oʻtishdan bosh tortgan yoki korxonada muvofiq keladigan ish boʻlmagan taqdirda, mehnat shartnomasi umumiy asoslarda bekor qilinishi mumkin .

Agar xodim oʻtkazishga rozi boʻlsa, buni kasallik paytida ham rasmiylashtirishingiz mumkin.

Oʻtkazish qanday rasmiylashtiriladi

1. Xodimning lavozimi va mehnat sharoitlarini oʻzgartirish toʻgʻrisida mehnat shartnomasiga qoʻshimcha kelishuv tuzing. Ushbu kelishuv ikkala tomon – xodim va ish beruvchi tomonidan imzolanadi.

Agar kelishuvni xodimning kasalligi paytida rasmiylashtirsangiz, unda xodim vaqtincha mehnatga layoqatsizlik davri tugaganidan keyin yangi lavozimda ish boshlashini koʻrsatib oʻting.

2. Qoʻshimcha kelishuv asosida boshqa doimiy ishga oʻtkazish toʻgʻrisida buyruq chiqaring va YaMMTga oʻzgartirishlar kiriting .

3. Faqat toʻliq rasmiylashtirilgan oʻtkazishdan soʻng avvalgi lavozim boʻsh qoladi. Unga yangi xodimni qabul qilishingiz yoki tashkilotning amaldagi xodimlaridan birini oʻtkazishingiz mumkin.

 
Agar rasmiylashtirish biron sababga koʻra kechiktirilsa

Agar rasmiylashtirish xodim yoʻqligi sababli kechikadigan boʻlsa, oʻtkazish rasmiylashtirilgunga qadar ish toʻxtab qolmasligi uchun ushbu muddatga muddatli mehnat shartnomasi  boʻyicha yangi xodimni qabul qilishingiz mumkin.

Asosiy xodimni boshqa lavozimga oʻtkazish masalasi u "kasallik ta’tili"dan qaytganidan keyin hal qilinishi mumkin.

Yangi xodim bilan shartnoma muddatini «Asosiy xodim vaqtinchalik mehnatga layoqatsizlik davri tugagandan soʻng chiqquncha» deb koʻrsatasiz.

YaMMTda kasal xodim lavozimiga  mehnat shartnomasini roʻyxatdan oʻtkazish mumkin emasligi sababli quyidagilarni amalga oshiring:

1) yangi lavozimni buyruq bilan shtat jadvali va YaMMTga kiriting;

2) unga mehnat shartnomasi rasmiylashtiring;

3) asosiy xodim egallab turgan lavozim boʻshagandan keyin  yangi xodim bilan qoʻshimcha kelishuv tuzish orqali shartnomani noma’lum muddatga oʻzgartiring.

Yoki – shartnoma muddatli boʻlib qoladi, ammo muddat tomonlarning kelishuvi bilan belgilangan muddatga uzaytiriladi;

4) YaMMTdan asosiy xodim oʻtkazilgandan keyin siz yangi xodim uchun yaratgan boʻshagan lavozimni olib tashlang.