Ходимнинг касаллик даврида лавозимини қандай ўзгартириш мумкин (босқичма-босқич йўриқнома)

«Ходим кўп касал бўлади, унинг вазифасини бошқа ходимлар бажаради. Раҳбарият унинг лавозимига бошқа доимий ходимни қабул қилишга қарор қилди. Телефон орқали суҳбатда ходим ўтказишга розилик билдирди. У касаллик таътилида бўлганида буйруқни расмийлаштириш қонунийми? Қандай қилиб ҳаммасини тўғри расмийлаштириш керак?".

Kadrovik.uz тушунтиради:

– Касаллик ёки тез-тез "касаллик таътили" иш берувчининг ташаббуси билан ходимни доимий равишда бошқа лавозимга ўтказиш учун асос бўла олмайди. Вақтинчалик меҳнатга лаёқатсизлик даврида ходимнинг иш жойи ва эгаллаб турган лавозими сақланади.

Доимий ўтказишга — сабаблари ва вазиятдан қатъи назар – фақат ходимнинг розилиги билан йўл қўйилади .

Тиббий хулосага мувофиқ соғлиғи ҳолатига кўра ишни бажара олмаса  тиббий хулосадаги тавсияларга мувофиқ иш берувчи унга бошқа ишни таклиф қилиши шарт.

Эътибор беринг: таклиф қилиш, ўз ташаббуси бўйича ўтказиш эмас. Ходим бошқа ишга ўтишдан бош тортган ёки корхонада мувофиқ келадиган иш бўлмаган тақдирда, меҳнат шартномаси умумий асосларда бекор қилиниши мумкин .

Агар ходим ўтказишга рози бўлса, буни касаллик пайтида ҳам расмийлаштиришингиз мумкин.

Ўтказиш қандай расмийлаштирилади

1. Ходимнинг лавозими ва меҳнат шароитларини ўзгартириш тўғрисида меҳнат шартномасига қўшимча келишув тузинг. Ушбу келишув иккала томон – ходим ва иш берувчи томонидан имзоланади.

Агар келишувни ходимнинг касаллиги пайтида расмийлаштирсангиз, унда ходим вақтинча меҳнатга лаёқатсизлик даври тугаганидан кейин янги лавозимда иш бошлашини кўрсатиб ўтинг.

2. Қўшимча келишув асосида бошқа доимий ишга ўтказиш тўғрисида буйруқ чиқаринг ва ЯММТга ўзгартиришлар киритинг .

3. Фақат тўлиқ расмийлаштирилган ўтказишдан сўнг аввалги лавозим бўш қолади. Унга янги ходимни қабул қилишингиз ёки ташкилотнинг амалдаги ходимларидан бирини ўтказишингиз мумкин.

 
Агар расмийлаштириш бирон сабабга кўра кечиктирилса

Агар расмийлаштириш ходим йўқлиги сабабли кечикадиган бўлса, ўтказиш расмийлаштирилгунга қадар иш тўхтаб қолмаслиги учун ушбу муддатга муддатли меҳнат шартномаси  бўйича янги ходимни қабул қилишингиз мумкин.

Асосий ходимни бошқа лавозимга ўтказиш масаласи у "касаллик таътили"дан қайтганидан кейин ҳал қилиниши мумкин.

Янги ходим билан шартнома муддатини «Асосий ходим вақтинчалик меҳнатга лаёқатсизлик даври тугагандан сўнг чиққунча» деб кўрсатасиз.

ЯММТда касал ходим лавозимига  меҳнат шартномасини рўйхатдан ўтказиш мумкин эмаслиги сабабли қуйидагиларни амалга оширинг:

1) янги лавозимни буйруқ билан штат жадвали ва ЯММТга киритинг;

2) унга меҳнат шартномаси расмийлаштиринг;

3) асосий ходим эгаллаб турган лавозим бўшагандан кейин  янги ходим билан қўшимча келишув тузиш орқали шартномани номаълум муддатга ўзгартиринг.

Ёки – шартнома муддатли бўлиб қолади, аммо муддат томонларнинг келишуви билан белгиланган муддатга узайтирилади;

4) ЯММТдан асосий ходим ўтказилгандан кейин сиз янги ходим учун яратган бўшаган лавозимни олиб ташланг.