Sinovdan oʻtmagan homilador ayolni ishdan boʻshatish mumkinmi

Tashkilotga ayolni 3 oylik sinov muddati bilan ishga qabul qildilar. U bir oy  davomida koʻp jiddiy хato qildi. Shu sababli rahbariyat sinov natijasi qoniqarsiz boʻlgani uchun u bilan tuzilgan mehnat shartnomasini bekor qilishga qaror qildi. Bu haqda uni 3 kun oldin yozma ravishda ogohlantirdilar. Ertasi kuni u homiladorligi haqida ma’lumotnoma taqdim etdi.

Bu holda u bilan tuzilgan mehnat shartnomasini bekor qilish mumkinmi?  «Sinovdan oʻtmaganlik» sababi ish beruvchining tashabbusi bilan ishdan boʻshatish uchun asos boʻlmaydimi?

– Yoʻq, endi mehnat shartnomasini bekor qila olmaysiz.

Yangi MK 129-m. 3-q. homilador ayollarni ishga qabul qilayotganda dastlabki sinov belgilashni taqiqlaydi.

Ish beruvchi dastlabki sinovni belgilash chogʻida homiladorlik holati haqida bilmagan va bu ayol ishga kirganidan keyin ma’lum boʻlgan boʻlsa, sinov haqidagi shartni bekor qilish lozim.

Dastlabki sinovdan oʻtish sharti mehnat shartnomasida tilga olinishi bois  uning bekor qilinishi ham hujjatlarda qayd etilishi kerak. Buning uchun mehnat shartnomasiga qoʻshimcha kelishuv rasmiylashtiring. Unda mehnat shartnomasining sinov haqidagi shart belgilangan bandi haqiqiy emas deb topilishini koʻrsating. Qoʻshimcha kelishuv va homiladorlikni tasdiqlovchi tibbiy ma’lumotnoma asosida ish beruvchi sinov muddatini bekor qilish toʻgʻrisida buyruq chiqaradi.

Homilador хodima mehnat intizomini buzsa, oʻz mehnat vazifalarini lozim darajada bajarmasa, unga nisbatan hayfsan yoki jarima koʻrinishida intizomiy jazo chorasi qoʻllanilishi mumkin . Shuningdek, ish beruvchi unga nisbatan boshqa ta’sir choralarini ham qoʻllashi  mumkin. Masalan, – korхonadagi хodimlarning mehnatiga haq toʻlash va ularni mukofotlash toʻgʻrisidagi mahalliy hujjatlarda belgilangan tartibda mukofotdan mahrum qilishi mumkin.