Тавсияда:

– бошқа ишга ўтказиш деганда нима тушунилади;

– бошқа ишга ўтказишнинг қандай турлари мавжуд;

– ўтказишни расмийлаштиришда нималарни инобатга олиш муҳим;

– ғайриқонуний равишда ўтказиш учун жавобгарлик қандай

Бошқа ишга ўтказиш нима

Бошқа ишга ўтказиш – ходим айнан ўша иш берувчида ишни давом эттирганда унинг меҳнат вазифаларини ўзгартиришдир. Меҳнат вазифалари – муайян касб, мутахассислик, малака ёхуд лавозим бўйича иш, шунингдек, ходимга топшириладиган ишнинг аниқ бир туридир.

Шу тариқа, бошқа ишга ўтказиш ходимнинг бошқа касб, мутахассислик, лавозим, малака бўйича ишлашини ёки бошқа ишни бажаришини англатади. Масалан, котиб-референт таржимон лавозимига ўтказилади ёки автомобилларни таъмирлаш бўйича чилангар автомобилларни йиғиш бўйича чилангар бўлади.