Меҳнат шартномаси тузилмасдан туриб ходимга ишга чиқишга ижозат берилиши

Кўп учрайдиган хато шундан иборатки, яъни бунда ишга қабул қилишда директор ходим билан меҳнат шартномасини тузмайди. Иш берувчи буни дастлаб ходимнинг касбий маҳоратини ва жамоада қандай ишлай олиш қобилиятини кўрмоқчи эканлиги билан изоҳлайди. Бу нотўғри, албатта. Жисмоний шахсни ишга жойлаштириш мажбурий тартибда ёзма меҳнат шартномаси билан расмийлаштирилади.

Мазкур хато айбдор мансабдор шахсга нисбатан Маъмурий жавобгарлик тўғрисидаги кодекснинг 49-моддаси бўйича маъмурий жавобгарлик қўлланилишига сабаб бўлиши мумкин.

Ишга қабул қилиш ҳуқуқига эга бўлган мансабдор шахс томонидан ёхуд унинг рухсати билан ходимнинг ҳақиқатда ишга киришига рухсат бериш, ишга қабул қилиш лозим даражада расмийлаштирилганлигидан ёки расмийлаштирилмаганлигидан қатъи назар, меҳнат шартномаси иш бошланган кундан эътиборан тузилган деб ҳисобланади. Лекин, бу иш берувчини ходимнинг ишга қабул қилинишини расмийлаштириш мажбуриятидан озод этмайди. Иш берувчи иш бошланган кундан эътиборан 3 кунлик муддатда меҳнат шартномасини тузиши ва ходимни ишга қабул қилиш тўғрисида буйруқ чиқариши шарт.

Ходимдан барча ҳужжатлар талаб қилиб олинмаганлиги

Кўпинча иш берувчилар у ёки бу сабабларга кўра ходим ишга киришида талаб қилинадиган барча ҳужжатларни олиб келишини кутмасдан туриб, ишга киришни расмийлаштиришга шошиладилар. Бундай иш тутиш ярамайди. Масалан, давлат ташкилоти шахс билан юридик маслаҳатчи лавозимига ишга қабул қилишга меҳнат шартномаси тузади. Президентнинг 19.01.2017 йилдаги ПҚ-2733-сон қарорига асосан, давлат органларидаги ёки ташкилотларидаги юрисконсульт лавозимида олий юридик маълумотга эга бўлган ёки ТДЮУ ҳузуридаги Юридик кадрларни халқаро стандартлар бўйича профессионал ўқитиш марказида юридик мутахассислик бўйича қайта тайёрлаш курсларини тамомлаган ва белгиланган намунадаги дипломни олган шахс ишлаши мумкин. Агар ишга қабул қилинган ходимда бундай диплом мавжуд бўлмаса – ишга қабул қилишнинг белгиланган қоидалари бузилганлиги сабабли, Меҳнат кодексининг 168-моддаси 1-қисми 4-бандига биноан, у билан меҳнат шартномасини бекор қилишга тўғри келади. Шунинг учун ишга номзод барча зарур ҳужжатларни топшириб бўлишини кутинг ва шундан кейингина ишга қабул қилишни расмийлаштиринг.

Қонунчилик талабига кўра мажбурий бўлган тиббий хулосанинг йўқлиги

Тиббий кўрикни ташкил этиш алоҳида тоифадаги ходимларни ишга қабул қилишдаги асосий шартлардан бири ҳисобланади. Бундай ходимларнинг рўйхати Меҳнат кодексининг 360-моддасида келтирилган. Ва иш берувчи ижобий тиббий хулосасиз уларни ишга олишга ҳақли эмас.

Мажбурий тартибдаги дастлабки тиббий кўрикдан ўтмаган шахсга ўз хизмат вазифасини бажаришига рухсат берганлиги учун иш берувчи Маъмурий жавобгарлик тўғрисидаги кодекснинг 49-моддаси бўйича маъмурий жавобгарликка тортилиши мумкин.

Номзодга тиббий текширувдан ўтиши учун даволаш-профилактика муассасасига йўлланма беринг. Фақат ижобий тиббий хулосага асосан ишга қабул қилишни расмийлаштиринг.

Эътибор беринг

Ходимлар мажбурий тиббий кўриклардан ўтиши муносабати билан кўрикдан ўтишда харажат қилмайдилар.