ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

17.10.2002 й.

N 358

ИЖРО ИШИНИ РИВОЖЛАНТИРИШ

ЖАМҒАРМАСИНИ ТАШКИЛ

ЭТИШ ТЎҒРИСИДА

"Суд ҳужжатлари ва бошқа органлар ҳужжатларини ижро этиш тўғрисида"ги Ўзбекистон Республикаси Қонунига мувофиқ ҳамда ижро ишини янада такомиллаштириш ва суд ижрочилари фаолияти самарадорлигани ошириш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаментининг Ижро ишини ривожлантириш жамғармаси ташкил этилсин.

2. Белгилансинки:

Жамғарманинг даромадлари ижро ҳужжатлари бўйича мажбурий тартибда давлат даромадига ундирилган суммадан 30 фоиз ажратмалар, шунингдек қонун ҳужжатларида тақиқланмаган бошқа манбалар ҳисобига шакллантирилади;

Жамғарманинг маблағларидан Департаментнинг ҳудудий бўлимлари ва суд ижрочилари туман (шаҳар) бўлинмалари биноларини қуриш, таъмирлашда ва уларнинг моддий-техник таъминотини мустаҳкамлашда, шунингдек суд ижрочилари фаолияти самарадорлигини оширишда фойдаланилади.

Жамғарма маблағларидан мақсадли фойдаланилиши учун шахсий жавобгарлик Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаменти директори зиммасига юкланади.

3. Ижро ишини ривожлантириш тўғрисидаги Низом иловага мувофиқ тасдиқлансин.

4. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов ва Ўзбекистон Республикаси Президентининг Давлат маслаҳатчиси Т.А. Ҳудойбергенов зиммасига юклансин.

Вазирлар Маҳкамасининг Раиси                                           И. Каримов

"Ўзбекистон Республикаси қонун ҳужжатлари тўплами" 2002 й. 20-сон