Вазирлар Маҳкамасининг

2021 йил 8 январдаги

9-сон қарорига

1-ИЛОВА

Гидрогеологик хулоса бериш бўйича

давлат хизматлари кўрсатишнинг

МАЪМУРИЙ РЕГЛАМЕНТИ

1-БОБ. УМУМИЙ ҚОИДАЛАР

1. Ушбу Регламент жисмоний ва юридик шахсларга (кейинги ўринларда - ариза берувчилар) "Лицензия" ахборот тизими орқали гидрогеологик хулоса бериш бўйича давлат хизматларини кўрсатиш тартибини белгилайди.

2. Регламентнинг асосий мақсади маълум бир ҳудуднинг ер ости сувлари ҳолати юзасидан гидрогеологик хулосалар бериш билан боғлиқ жараёнларни тартибга солиш, берилган гидрогеологик хулосалар ҳисобини юритиш ҳамда тегишлича сувга қудуқ бурғилаш жараёнига методик жиҳатдан кўрсатмалар беришдан иборат.

Гидрогеологик хулоса ахборот ҳужжати бўлиб, сувга қудуқ бурғилаш лойиҳаларини тузиш учун асос ҳисобланади. Бурғилаш лойиҳаларини тузиш белгиланган тартибда шахарсозлик нормалари ва қоидаларининг талабларига асосан тайёрланади.

3. Гидрогеологик хулоса Ўзбекистон Республикаси Тоғ-кон саноати ва геология вазирлиги ҳузуридаги "Ер қаъридан фойдаланиш маркази" ДМ (кейинги ўринларда - Ер қаъридан фойдаланиш маркази) томонидан Ўзбекистон Республикаси Тоғ-кон саноати ва геология вазирлиги тизимидаги гидрогеология корхоналари (кейинги ўринларда - гидрогеология корхоналари) хулосасини инобатга олган ҳолда Давлат хизматлари марказлари ёки Ўзбекистон Республикаси Ягона интерактив давлат хизматлари портали (кейинги ўринларда - ЯИДХП) орқали берилади.

4. Гидрогеологик хулосада қуйидаги асосий маълумотлар акс эттирилади:

кўрсатилган ҳудуднинг геологик-гидрогеологик тузилиши ҳақида маълумот;

ер ости сув қатламининг тавсифи, гидрокимёвий ва гидродинамик хоссалари ҳақида маълумот;

тегишлича лойиҳалаштирилаётган қудуқларнинг конструкциясига тавсиялар.

5. Гидрогеологик хулоса ҳудуднинг геологик-гидрогеологик ва сув хўжалиги шароитлари ўзгаришини инобатга олган ҳолда, икки йилдан ошмайдиган давр учун берилади.

Қонунчилик ҳужжатлари билан тасдиқланган рўйхатга мувофиқ ер ости сувларининг кўп йиллик ўртача сатҳига нисбатан сув сатҳи 5 метрдан ортиқ пасайиб кетган ҳудудларда ерларни суғориш ва ишлаб чиқариш мақсадларига гидрогеологик хулоса берилмайди.

6. Гидрогеологик хулоса бериш бўйича давлат хизматлари мазкур Регламентга 1-иловага мувофиқ схема асосида кўрсатилади.

2-БОБ. ГИДРОГЕОЛОГИК ХУЛОСА БЕРИШ ТАРТИБИ

7. Ариза берувчилар гидрогеологик хулоса олиш учун "Лицензия" ахборот тизимига ўзи келиб мурожаат этади ёки давлат хизматларидан электрон тарзда фойдаланиш учун ЯИДХПда рўйхатдан ўтади.

8. Ариза берувчилар ўзи келиб мурожаат этган тақдирда, "Лицензия" ахборот тизими ходими ариза берувчи номидан, ЯИДХП орқали мурожаат қилинган ҳолларда эса ариза берувчи мустақил равишда ушбу Регламентга 2-иловага мувофиқ шаклда аризани электрон шаклда тўлдиради.

9. Аризада келтирилган барча сўров саволларига маълумотлар тўлиқ тўлдирилган бўлиши шарт. Маълумотларнинг тўғрилиги ва кўрсатилган ҳудуднинг аниқлигига қараб гидрогеологик хулоса аниқ бир майдон учун берилади.

10. Аризага зарур маълумотлар киритилгандан сўнг ариза берувчи маълумотларнинг тўғрилигини текширади ва имзоларни идентификация қилишнинг тегишли воситалари (дактилоскопия, электрон имзо, Мобил-ID ва бошқалар) билан тасдиқлайди.

Ариза берувчи ЯИДХП орқали мурожаат этган тақдирда, сўровномани (кейинги ўринларда - ЭРИ) билан тасдиқлаш талаб этилмайди.

11. Гидрогеологик хулосани бериш бўйича давлат хизматлари кўрсатиш учун базавий ҳисоблаш миқдорининг 10 баравари миқдорида йиғим ундирилади.

12. Йиғимлар суммаси қуйидаги тартибда тақсимланади:

а) "Лицензия" ахборот тизимига ўзи келиб мурожаат этганда:

20 фоизи - Ўзбекистон Республикаси Адлия вазирлигининг Давлат хизматларини ривожлантириш жамғармасига;

қолган маблағлар тўлиқ гидрогеология корхоналарининг банк ҳисоб рақамига;

б) ЯИДХП орқали мурожаат этилганда:

10 фоизи - Ўзбекистон Республикаси Адлия вазирлигининг Давлат хизматларини ривожлантириш жамғармасига;

11,25 фоизи - Рақамли технологияларни ривожлантириш жамғармаси очилган электрон ҳукумат ва рақамли иқтисодиётнинг идоралараро лойиҳаларини молиялаштириш бўйича махсус ҳисоб рақамига;

10 фоизи - Ер қаъридан фойдаланиш марказининг банк ҳисоб рақамига;

қолган маблағлар тўлиқ гидрогеология корхоналарининг банк ҳисоб рақамига ўтказилади.

13. Ариза берувчилар давлат хизматларидан фойдаланиш учун ЯИДХП орқали мурожаат этганда, ундириладиган йиғимнинг 90 фоизи миқдори тўланади.

14. Ариза берувчилар томонидан ариза маълумотларининг кўрсатилган ҳудуднинг ёки тегишлича қудуқ географик жойининг тўлиқ бўлмаган, нотўғри ёки бузиб кўрсатилган ҳажмда тақдим этилганлиги, ер ости сувлари сифатининг эҳтиёжга номувофиқлиги ҳамда давлат хизматини кўрсатиш учун йиғимни тўламаслик давлат хизматлари кўрсатишни рад этиш учун асос ҳисобланади.

Аризани қабул қилишни бошқа сабабларга кўра рад этиш қатъиян тақиқланади.

15. Ариза берувчилар давлат хизматларидан фойдаланишда уларни кўрсатишнинг ҳар қандай босқичида бош тортиш ҳуқуқига эга. Ариза берувчи давлат хизматларидан фойдаланишдан бош тортганда, унинг аризаси кўриб чиқилмасдан қолдирилади ва тўланган йиғим суммаси қайтарилмайди.

16. Ариза берувчилар Давлат хизматлари марказига келиб мурожаат этганда, унинг аризаси Давлат хизматлари маркази ходими томонидан тўлдирилиб, ариза берувчилар томонидан тасдиқлангандан сўнг ўн дақиқада электрон шаклда, ЯИДХП орқали мурожаат қилинганда эса ариза автоматик тарзда Ер қаъридан фойдаланиш марказига ва сув олиш мақсадларига қараб Сув хўжалиги вазирлиги ёки Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига юборилади.

17. Ер қаъридан фойдаланиш маркази тегишли гидрогеология корхоналари билан биргаликда ариза тушгандан сўнг уч иш куни мобайнида кўрсатилган ҳудудда ер ости сувлари ҳолатини ва тегишлича қудуқ бурғилашнинг мақсадга мувофиқлигини (ер ости сувлари захираларининг мавжудлиги, сув чиқариш имконияти, сифат кўрсаткичлари кабилар) дастлабки кўриб чиқади ва гидрогеологик хулосани бериш учун аризани қабул қилиш ёки рад этиш бўйича маълумот тайёрлайди.

Қонунчилик ҳужжатлари билан тасдиқланган рўйхатга мувофиқ ер ости сувларининг кўп йиллик ўртача сатҳига нисбатан сув сатҳи 5 метргача пасайган ҳудудларда:

қишлоқ хўжалиги экин майдонларини суғориш мақсадлари учун - сув тежовчи технологияларни жорий этиш шартлари билан Сув хўжалиги вазирлиги;

ишлаб чиқариш эҳтиёжлари учун - ҳудудий ривожлантириш дастурлари ва сувдан тежамли фойдаланиш шартларига асосан Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари ер ости сувларига қудуқларни бурғилашга гидрогеологик хулосани бериш учун аризани қабул қилиш ёки рад этишни келишиб беради.

18. Ер қаъридан фойдаланиш маркази икки иш куни мобайнида умумлаштирилган маълумотлар асосида гидрогеологик хулосани бериш учун аризани қабул қилиш ёки рад этиш бўйича Давлат хизматлари марказига ёки Ягона интерактив давлат хизматлари портали орқали маълумот юборади. Аризани қабул қилиш рад этилганда, ундирилган йиғим ариза берувчига Давлат хизматлари маркази ёки ЯИДХП орқали тўлиқ қайтарилади.

Агар гидрогеологик хулоса берилиши мақсадга мувофиқ бўлса, махсус дала гидрогеологик тадқиқот ишлари ва фонд маълумотларини ўрганиш натижасида кўрсатилган ҳудудда ер ости сувлари мавжуд (етарли) эмаслиги аниқланса, ҳудудни сув билан таъминлашнинг бошқа манбалари тавсия этилган ҳолда (мавжуд бўлган ҳолларда) гидрогеология корхоналари томонидан гидрогеологик хулоса тайёрланади.

19. Гидрогеологик хулоса электрон шаклда матн кўринишида жадваллар, хариталар ва чизмалар каби қўшимча маълумотлар билан тўлдирилган ҳолда тайёрланади.

Гидрогеологик хулосани тайёрлаш ва "Лицензия" ахборот тизимига ёки ЯИДХП орқали юбориш тўлов амалга оширилганидан сўнг жами саккиз иш кунидан ошмаслиги зарур.

20. Гидрогеология корхоналари тайёрланган гидрогеологик хулосани Ер қаъридан фойдаланиш марказига юборади. Ер қаъридан фойдаланиш маркази гидрогеологик хулосанинг титул варағига ушбу Регламентга 3-иловага мувофиқ QR-код (матрик штрихли код) қўйиб, гидрогеологик хулосанинг қолган қисмларини электрон шаклда бириктириш орқали ўз ЭРИси билан тасдиқлайди ҳамда Давлат хизматлари марказига ёки ЯИДХП орқали юборади.

21. "Лицензия" ахборот тизими гидрогеологик хулоса келиб тушгандан сўнг ўн дақиқа мобайнида уни ариза берувчининг электрон манзилига юборади ва ариза берувчини бу ҳақда ахборот-коммуникация тизими орқали хабардор қилади. Ўзи келиб мурожаат қилган тақдирда, унинг сўровига кўра "Лицензия" ахборот тизими ариза берувчига рухсатномани электрон ёки қоғоз шаклда тақдим этиши мумкин.

Ариза берувчи гидрогеологик хулоса олганидан сўнг ўз ҳудудида ер ости сувларига қудуқ бурғилашдан олдин гидрогеология корхоналарини хабардор қилиши зарур. Гидрогеологик хулоса олмасдан ер ости сувларига қудуқ бурғилаш ноқонуний ҳисобланади.

3-БОБ. ЯКУНЛОВЧИ ҚОИДАЛАР

22. "Лицензия" ахборот тизими ва давлат хизматини кўрсатиш жараёнида иштирок этувчи ваколатли органлар ўз фаолиятини амалга ошириши натижасида олинган маълумотларнинг сир сақланишини таъминлайди.

23. Ўзбекистон Республикаси Адлия вазирлиги, Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ва "Лицензия" ахборот тизими мазкур Регламент талаблари ижроси бўйича давлат органлари ва бошқа ташкилотлар фаолиятини, шу жумладан, ЯИДХП орқали доимий назорат қилади ва мониторинг олиб боради.

24. Ариза берувчилар давлат органлари ва бошқа ташкилотлар ходимларининг ҳаракати (ҳаракатсизлиги) юзасидан қонун ҳужжатларида белгиланган тартибда шикоят қилишлари мумкин.

25. Ушбу Регламент талабларининг бузилишида айбдор бўлган шахслар қонун ҳужжатларида белгиланган тартибда жавоб берадилар.

Маъмурий регламентга

1-ИЛОВА

Гидрогеологик хулоса бериш бўйича

давлат хизматлари кўрсатишнинг

СХЕМАСИ

Маъмурий регламентга

2-ИЛОВА

Гидрогеологик хулоса олиш учун

АРИЗА

Ариза берувчи тўғрисида маълумот:

Маъмурий регламентга

3-ИЛОВА

O`ZBEKISTON RESPUBLIKASI

DAVLAT GEOLOGIYA VA MINERAL

RESURSLAR QO`MITASI

GIDROGEOLOGIK XULOSA

Gidrogeologik xulosaning amal qilish muddati 20___ yil "____" ____________ gacha.

Қонун ҳужжатлари маълумотлари миллий базаси (www.lex.uz),

2021 йил 9 январь