Ўзбекистон Республикаси

Президентининг

2024 йил 4 мартдаги

ПҚ-114-сон қарорига

7-ИЛОВА

Ўзбекистон Республикаси Президенти

ҳузуридаги Статистика агентлигининг

Статистика кенгаши тўғрисида

НИЗОМ

1-БОБ. УМУМИЙ ҚОИДАЛАР

1. Статистика кенгаши расмий статистикани ривожлантириш, фаолият юритиш ва мувофиқлаштириш масалалари бўйича коллегиал маслаҳат органидир.

2. Статистика кенгашининг таркиби давлат бошқаруви органлари, илмий-тадқиқот ташкилотлари, нодавлат нотижорат ташкилотлар вакиллари, шунингдек статистика бўйича миллий экспертлар орасидан шакллантирилади.

2-БОБ. СТАТИСТИКА КЕНГАШИНИНГ ВАЗИФАЛАРИ

3. Статистика кенгашининг асосий вазифалари қуйидагилардан иборат:

расмий статистика соҳасидаги амалдаги қонунчилик ижросини таъминлаш ва илғор халқаро тажрибани ҳисобга олган ҳолда, миллий статистика тизимини самарали ташкил этишда кўмаклашиш;

мамлакат миллий статистика тизимида умумий тушунчалар, таърифлар ва таснифлар изчил қўллаб борилишини таъминлаш;

давлат статистика органлари, статистика маълумотларини юритиш ваколатига эга бўлган давлат ташкилотлари ҳамда бошқа давлат органлари ва ташкилотларининг расмий статистика соҳасидаги фаолиятини мувофиқлаштириш;

миллий статистика тизимини ривожлантиришнинг устувор йўналишларини белгилаш, инновацион ёндашув ва технологияларни жорий қилиш, статистика услубиётларини такомиллаштириш ва статистика фаолиятининг асосий йўналишлари бўйича тавсиялар бериш;

расмий статистиканинг энг муҳим тамойилларига, биринчи навбатда, статистика маълумотларининг ишончлилиги, холислиги, тушунарлилиги ва шаффофлигига риоя этиш бўйича чора-тадбирларни амалга ошириш, статистик ҳисоботларни йиғиш, уларга ишлов бериш ва умумлаштириш тартибига ҳар қандай аралашувни истисно этувчи статистика ишларини ташкил этиш тизимини яратишда кўмаклашиш;

статистика маълумотлари сифатини ошириш, хусусан, миллий ҳисоблар тизими кўрсаткичларини ва уларни ҳисоблаш услубиётини халқаро ташкилотлар тавсияларига мувофиқ такомиллаштиришда иштирок этиш;

расмий статистика маълумотларини ишлаб чиқариш жараёнларининг миллий моделини ва GSBPM халқаро стандарт моделига мувофиқ, сифатни бошқаришнинг замонавий усулларини жорий қилишни мувофиқлаштириш;

статистик маълумотларнинг очиқлиги ва ошкоралигини таъминлаш орқали статистика фаолияти самарадорлиги кўрсаткичи рейтингини оширишга қаратилган чора-тадбирларни белгилаш;

халқаро статистика ташкилотларининг электрон маълумотлар базалари ва махсус нашрларида Ўзбекистон Республикаси тўғрисидаги статистик маълумотларни жойлаштиришга қаратилган халқаро ҳамкорлик ва ахборот алмашинувини ривожлантиришга кўмаклашиш;

давлат статистика органлари, шунингдек, маъмурий маълумотларни юритиш бўйича ваколатли давлат органлари фаолиятининг натижаларини ҳар йили кўриб чиқиш, статистика кузатувларининг респондентларга бўлган юкини камайтириш, уларни унификация қилиш, соддалаштириш ва оптималлаштириш мақсадида статистика ҳисоботлари ва кузатув шаклларини, шунингдек, услубиётлар ва таснифларнинг қайта кўриб чиқилишини таъминлаш;

мамлакатда миллий иқтисодиётни ва ижтимоий соҳани ислоҳ қилиш жараёнларини ҳисобга олишда ишончлилик ва тўлиқликни таъминлашни инобатга олган ҳолда бир йиллик Статистика дастурини кўриб чиқиш ва тасдиқлаш;

статистик тўпламлар ва бюллетенлар нашрини ташкил этиш, уларни оммавий ахборот воситаларида кенг ёритиш орқали статистика маълумотларининг очиқлиги ва ошкоралигини таъминлаш.

3-БОБ. СТАТИСТИКА КЕНГАШИНИНГ ФУНКЦИЯЛАРИ

4. Статистика кенгаши асосий вазифаларидан келиб чиқиб қуйидаги функцияларни амалга оширади:

Ҳукумат, давлат ҳокимияти ва бошқаруви органларига статистика сиёсатининг барча жиҳатлари бўйича маслаҳат бериш;

миллий статистика тизими фаолиятининг ишончлилик, холислик, беғаразлик, тушунарлилик ва шаффофлик каби асосий тамойилларини амалга оширишда кўмаклашиш;

статистик маълумотларни йиғиш, уларга ишлов бериш ва умумлаштириш тартибига ҳар қандай аралашувни истисно қилишни таъминлаш;

кўп йиллик ва бир йиллик статистика дастурларини кўриб чиқиш, бир йиллик статистика дастурини тасдиқлаш ҳамда уни амалга ошириш масалаларини мониторинг қилиш ва ҳал қилишда кўмаклашиш;

статистика услубиётларини такомиллаштириш ва маълумотларни шакллантиришда фойдаланувчилар эҳтиёжларини ҳисобга олиш масалаларини кўриб чиқиш;

статистик ва иқтисодий таҳлилнинг замонавий услубларини, халқаро стандартларга мос ва бозор иқтисодиёти тамойилларига жавоб берадиган кўрсаткичлар тизимини амалиётга жорий этиш бўйича ишларни ташкил этиш;

давлат статистика органлари фаолиятига инновацион ёндашувлар ва замонавий технологияларни самарали жорий этиш;

сифатни бошқаришнинг замонавий халқаро усулларини ҳисобга олган ҳолда расмий статистика маълумотларини ишлаб чиқариш жараёнларининг миллий моделини ишлаб чиқиш ва жорий этишга кўмаклашиш;

Статистика агентлигига юклатилган вазифаларни тўлиқ ва самарали амалга оширишда кўмаклашиш.

4-БОБ. СТАТИСТИКА КЕНГАШИНИНГ ВАКОЛАТЛАРИ

5. Статистика кенгаши юклатилган вазифаларини бажариш учун қуйидаги ҳуқуқларга эга:

давлат ҳокимияти ва бошқаруви органлари, идоралар, корхоналар ва ташкилотлардан расмий статистикани такомиллаштириш бўйича белгиланган тартибда маълумот сўраш ва олиш;

давлат идоралари вакилларининг ахборот йиғиш жараёнларини ташкил этиш масалалари, шунингдек, сўралаётган ахборотлар билан расмий статистика ва (ёки) маъмурий маълумотларда мавжуд маълумотлар ўртасида такрорланиш ҳолатларини аниқлаш ва бартараф этиш борасида амалга оширилаётган ишлар юзасидан маълумотларни ва ҳисоботларни кўриб чиқиш ҳамда бошқа ташкилотлар вакилларининг ахборотларини эшитиш;

Статистика кенгаши ваколатига кирадиган масалалар бўйича ўз йиғилишларида мулкчилик шаклидан қатъий назар, барча расмий статистикани тайёрловчилар ҳамда маъмурий маълумотларни етказиб берувчилар томонидан бажарилиши мажбурий бўлган қарорлар қабул қилиш;

расмий статистиканинг айрим масалаларини кўриб чиқиш учун эксперт комиссияларини тайинлаш.

5-БОБ. СТАТИСТИКА КЕНГАШИ ФАОЛИЯТИНИ

ТАШКИЛ ЭТИШ

6. Статистика кенгашининг таркиби Ўзбекистон Республикаси Президенти томонидан тасдиқланади.

7. Статистика кенгаши аъзолари уларнинг касбий малакаси ва статистика соҳасидаги салоҳияти асосида тайинланади.

8. Статистика кенгашини Статистика кенгаши раиси бошқаради.

Раис бўлмаган тақдирда унинг вазифасини унинг ўринбосари ёки Статистика кенгаши аъзоларидан бири раиснинг фармойишига мувофиқ амалга оширади.

9. Статистика кенгаши мажлислари унинг аъзолари умумий сонининг камида учдан икки қисми миқдорида кворум мавжуд бўлганда ваколатли ҳисобланади.

10. Статистика кенгашининг қарорлари мажлисда иштирок этаётган Статистика кенгаши аъзоларининг кўпчилиги овоз берган тақдирда, қабул қилинган ҳисобланади.

11. Статистика кенгашининг қарорлари Статистика кенгаши раиси томонидан тасдиқланади.

Қарорларнинг ижросини назорат қилиш Статистика кенгаши котиби томонидан амалга оширилади.

Статистика кенгашининг фаолияти ва унинг қарорлари оммавий ахборот воситаларида ёритилади.

12. Статистика агентлигининг тегишли бўлинмаси Статистика кенгашининг ишчи органи ҳисобланади.

Қонун ҳужжатлари маълумотлари миллий базаси (www.lex.uz),

2024 йил 5 март