Aprel oyida har bir хodim uchun foydali boʻladi:
“Xodima 55 yoshga toʻldi. Ish beruvchi u pensiya yoshiga yetgani munosabati bilan Mehnat kodeksining 100-modda 2-qism 7-bandiga asosan mehnat shartnomasini bekor qilmoqchi. Ammo, men ayollarni bu asosda ishdan boʻshatish mumkin emasligi haqida eshitgandim. Bu toʻgʻrimi?”
Savolga “Norma” eksperti, huquqshunos Lenara Xikmatova javob berdi:
- Qisman haqsiz.
Agar хodim yoshga doir pensiyani olishga haqli boʻlsa, umumiy qoidaga koʻra ish beruvchi u bilan Mehnat kodeksining 100-modda 2-qism 7-bandiga asosan mehnat shartnomasini bekor qilishga haqli. Ya’ni, хodimni bu asosda quyidagi holatlarda ishdan boʻshatish mumkin:
- ma’lum yoshga yetgandan keyin;
- pensiya tayinlash uchun yetarli ish staji boʻlganda.
Shuningdek, umumiy qoidaga koʻra Mehnat kodeksining 289-moddasiga muvofiq yoshga doir pensiya quyidagilarga belgilanadi:
- Erkaklarga – 60 yoshga toʻlganda, umumiy ish staji 25 yil boʻlganda;
- Ayollarga – 55 yoshga toʻlganda, umumiy ish staji 20 yil boʻlganda.
Ammo, 2019 yilning 1 mayidan 07.03.2019 yildagi PF-4235 sonli Prezident Farmoniga koʻra ish beruvchining tashabbusi bilan Mehnat kodeksining 100-modda 2-qism 7-bandi boʻyicha ayollarni ishdan boʻshatish ular 60 yoshga toʻlgunga qadar taqiqlanadi.
Ya’ni, хodim 60 yoshga toʻlmaguncha u bilan tuzilgan muddatli mehnat shartnomasini, shuningdek nomuayyan vaqtga tuzilgan mehnat shartnomasini Mehnat kodeksining 100-moddasi 2-qismi 7-bandi boʻyicha bekor qilish mumkin emas.
Mehnat kodeksining 100-moddasida sanab oʻtilgan boshqa asoslar ish beruvchining tashabbusi bilan ishdan boʻshatishga taalluqli emas. Masalan, agar хodim mehnat intizomini buzsa, u bilan mehnat shartnomasini Mehnat kodeksining 100-modda 2-qism 3 yoki 4-bandi boʻyicha bekor qilish mumkin.
