2022 yilda ta’tillarni hisoblashda Qurbon hayiti bayramini hisobga olish tartibi

Eslatib oʻtamiz, 2022 yilning 10 iyul kuniga (yakshanba) bayram – Qurbon hayiti (bayramning aniq sanasi bir kunga oʻzgarishi mumkin, bu holda qoʻshimcha normativ-huquqiy hujjat  qabul qilinadi) toʻgʻri keladi. 2022  yilning 11 va 12 iyul kunlari qoʻshimcha dam olinadi. 11 iyul barcha ish rejimlari uchun qoʻshimcha dam olish kuni, 12 iyul – 6 kunlik ish haftasi uchun ishlanmaydigan qoʻshimcha dam olish kuni, 5 kunliklar uchun 16 iyul shanba kuni ishlab berish bilan dam olish kuni boʻladi.

Iyun-iyul oylariga toʻgʻri keladigan ta’tillarni hisoblashda ushbu sanalarni qanday hisobga olish kerakligini «Norma» eksperti Valeriya LYaNDRES tushuntirib oʻtdi:

– Shu yilning iyun-iyul oylariga toʻgʻri keladigan mehnat ta’tillarini rasmiylashtirishda ortiqcha qiyinchiliklarni keltirib chiqarmaslik uchun ta’tillarni hisoblashda хodim ta’tilining soʻnggi kuni 8 yoki 9 iyul sanasiga, ishga chiqish esa dam olish kunidan keyingi – 13 iyul sanasiga toʻgʻri kelishini  rasmiylashtirishni tavsiya etamiz.

Masalan, хodimga davomiyligi 15 ish kuni boʻlgan ta’tilni 2022 yil 22 iyundan  8 iyulgacha rasmiylashtirish mumkin.

Agar bunday qulay hisob-kitobni qoʻllashning imkoni boʻlmasa, iyul oyidagi dam olish kunlari va bayramdan keyingi kunlarga toʻgʻri keladigan ta’tilni rasmiylashtirishda quyidagilarni hisobga oling:

• yakshanba kunlari, shu jumladan – 10 iyulni;
•  barcha ish rejimlari uchun qoʻshimcha dam olish kuni – 11 iyulni;
•  6 kunlik ish haftasi uchun – 12 iyulni.

5 kunlik ish haftasi uchun 12 iyul ta’til davomiyligini hisoblashga kiritiladi, chunki bu – 16 iyul shanba kuniga koʻchirilgan dam olish kuni. Umumiy qoidalarga koʻra ta’tillarning muddati olti kunlik ish haftasi yuzasidan kalendar boʻyicha ish kunlari bilan hisoblab chiqariladi .

Agar rasman tasdiqlangan dam olish sanasi oʻzgaradigan boʻlsa, ta’tillarni bunday hisoblashda ta’til sanalari boʻyicha buyruqlarga oʻzgartirish kiritishingiz kerakligini hisobga oling.

Kelgusida yuqoridagilarni hisobga olgan holda ta’til jadvallarini tuzishni tavsiya qilamiz.