Iyul oyida har bir хodim uchun foydali boʻladi:
«Kompaniyada oilaviy sabablarga koʻra tez-tez dam olish kuni (otgul) oladigan хodim bor. Bunday otgullarni taqdim qilish qonuniymi? Xodim keyinchalik dam olish kunlaridan birida ishlab berish sharti bilan otgul olishi mumkinmi?».
Savolga «Norma» eksperti, huquqshunos Lenara XIKMATOVA javob berdi:
– Yoʻq, otgulni «boʻnak» sifatida avvaldan taqdim qilib boʻlmaydi.
Mehnat kodeksining 157-moddasiga koʻra, bayram yoki dam olish kunidagi ish uchun хodimning хohishiga qarab kompensatsiya sifatida – хodim ishlab bergandan keyin boshqa dam olish kuni (otgul) beriladi. Shunda dam olish kunidagi ish uchun kamida bir hissa miqdorda mehnat haqi toʻlanadi.
Xodimning iltimosiga binoan ish vaqtidan tashqari ish uchun belgilangan ish vaqtidan tashqari bajarilgan ish soatlariga teng keladigan miqdorda otgul berilishi mumkin.
Agar хodim dam olish va bayram kunlaridagi ish uchun otgul olishni istamasa, ish beruvchi unga kamida ikki hissa miqdorda haq toʻlashi shart.
Toʻlanadigan haqning aniq miqdori jamoa shartnomasida, agar u tuzilmagan boʻlsa, — ish beruvchi tomonidan kasaba uyushmasi qoʻmitasi yoki хodimlarning boshqa vakillik organi bilan kelishib belgilanadi.
Shuning uchun, agar хodim dam olish yoki bayram kunida ishlagan boʻlsa, u keyinchalik ish beruvchiga otgul taqdim qilishlarini soʻrab ariza bilan murojaat qilishi mumkin. Ammo otguldan oldindan foydalanib, keyin uni ishlab berish mumkin emas.
Agar хodim oilaviy sabablarga koʻra ishga borolmasa, хodimning arizasiga koʻra u bu kunlar uchun ish haqi saqlanmagan holda ta’til berilishini soʻrab ish beruvchiga ariza bilan murojaat qilishi mumkin. Uning davomiyligi хodim va ish beruvchi oʻrtasidagi kelishuvga koʻra belgilanadi, lekin u oʻn ikki oylik davr mobaynida jami uch oydan ortiq boʻlmasligi kerak 
.
«Ish haqi saqlanmaydigan» ta’tilning eng koʻp muddati belgilangan, eng kami esa belgilanmagani uchun bunday ta’til хodimga hatto 1 kunga ham berilishi mumkin .
