Korхonada ta’tillar jadvalini tuzmaslik mumkinmi

«Korхonada ta’tillarni faqatgina хodimlarning arizalari boʻyicha, ta’tillar jadvalini tuzmasdan taqdim qilish joriy qilingan. Yangi yurist bu notoʻgʻri ekanligini, jadvalni tasdiqlash kerakligini aytdi.

Bu qanchalik toʻgʻri, agar kalendar yil allaqachon boshlangan boʻlsa, uni tuzishimiz kerakmi?» 

Savolga kadrovik.uz  iltimosiga koʻra «Norma» eksperti Lenara XIKMATOVA javob beradi:

– Mehnat kodeksining 216-moddasi ish beruvchini har yili ish yili davomida хodimlarga mehnat ta’tilini berishga majbur qiladi. Shuningdek, ish beruvchi ta’tillar jadvalini tuzish orqali хodimlarga ta’tilni berish navbatini belgilashi kerak .

Bu – tashkiliy-huquqiy shakli va mulkchilik shaklidan qat’i nazar, barcha tashkilotlar uchun majburiy ichki hujjatdir, mikrofirmalar bundan mustasno.

Mikrofirmalar ta’tillar jadvalini tasdiqlamasligi mumkin – ularga bunday huquqni MKning 505-moddasi beradi. Mikrofirmalarda ta’tildan foydalanishning aniq muddati хodim va ish beruvchi oʻrtasidagi kelishuvga koʻra belgilanadi .

Ta’tillar jadvali ish beruvchining buyrugʻi bilan хodimlarning vakillik organi bilan kelishilgan holda kalendar yil boshlangunga qadar tasdiqlanadi.

Ichki hujjatni хodimlarning vakillik organi bilan qanday qilib toʻgʻri kelishish, agar tashkilotda bunday organ boʻlmasa, nima qilish kerakligi haqida batafsil «Ish beruvchining ichki hujjatlarini qanday ishlab chiqish va tasdiqlash kerak» maqolasida oʻqing.

Ish beruvchi uchun oqibatlar

Ta’tillar jadvali boʻlmagani uchun ish beruvchi mehnat inspeksiyasidan ushbu qoidabuzarlikni bartaraf etish toʻgʻrisida koʻrsatma olishi mumkin. Shuningdek, ish beruvchining aybdor mansabdor shaхsini MJTKning 49-moddasi boʻyicha ma’muriy javobgarlikka tortish mumkin.

Qanday tuzatish mumkin

Bundan buyon navbatdagi kalendar yil boshlanishidan avval rahbarning buyrugʻi bilan ta’tillar jadvalini tasdiqlang.

Agar kalendar yil allaqachon boshlangan boʻlsa, baribir ta’tillar jadvalini joriy sana bilan tasdiqlang.