Янги МК бўйича иш стажи учун қўшимча таътиллар қачондан тақдим этилади

«Янги Меҳнат кодекси кучга киргунга қадар ваколатхонанинг меҳнат шартномаларида асосий меҳнат таътили – 24 иш куни, календарь кунларига ўгирилганда 28 календарь кунга тўғри келиши белгиланган.

Янги Меҳнат кодекси битта ташкилотда кўп йиллик иш стажи учун ҳар йилги қўшимча меҳнат таътилини ўрнатди. Ваколатхона директори ушбу ташкилотда 23 йиллик иш стажига эга. Янги Меҳнат кодексига кўра у узоқ вақт хизмат қилгани  учун 8 календарь кунлик қўшимча таътил олиш ҳуқуқига эга.

01.05.2022 йилдан 30.04.2023 йилгача бўлган иш йили давомида унга фақат 28 календарь кунлик асосий таътил берилди – иш стажини ҳисобга олмаган ҳолда.

Ваколатхона директорининг меҳнат таътилини 8 календарь кунга (28 + 8 = 36 кун) узайтириши мумкинми? Агар у ушбу ташкилотда 2000 йил 1 майдан бери ишлаётган бўлса (директор ҳар йили таътилдан фойдаланади), у қайси даврда узайтирилган таътил олади?»

Саволга kadrovik.uz илтимосига кўра «Норма» эксперти Валерия ЛЯНДРЕС жавоб берди:

– Янги Меҳнат кодексининг 220-моддасида ходимга у битта ташкилотда ёки тармоқда ишлаган ҳар беш йил учун давомийлиги икки календарь кун бўлган, бироқ жами саккиз календарь кундан кўп бўлмаган ҳар йилги қўшимча меҳнат таътили берилиши назарда тутилган. Тегишинча, битта ташкилотда 23 йил ишлаганлик учун қўшимча саккиз кун берилиши керак.

Меҳнат кодексининг 220-моддаси бўйича таътилни ва хусусан, меҳнат таътиллари беришнинг аниқ тартиби ҳозирча Меҳнат кодексига қўшимча ҳужжатлар (Низом ёки Йўриқномалар) билан изоҳланмаган. Корхонанинг маҳаллий ҳужжатлари билан таътилни бериш тартибини мустақил равишда белгилашни тавсия этамиз.

Лекин! Шубҳасиз, барча ташкилотлар, мулкчилик шаклларидан қатъи назар, микрофирмалардан ташқари, эгаллаган лавозими, касбидан қатъи назар, барча ходимларга кўп йиллик иш стажи учун қўшимча таътил тақдим қилиши керак.

Сизнинг вазиятингизда таътил бериладиган ходимнинг (директорнинг) иш йили  янги Меҳнат кодекси кучга киришидан  олдин якунлангани муносабати билан иш стажи учун қўшимча кунларни тақдим қилмаса ҳам бўлади, 01.05.2023 йилдан 30.04.2024 йилгача бўлган кейинги иш йили  учун эса – мажбурий тартибда тақдим қилиш керак. Қўшимча таътилнинг берилиши керак бўлган кунларини асосий таътилга қўшиш ёки уларни алоҳида тақдим этиш ёки пулли компенсация билан алмаштириш мумкин.

Агар  ташкилотингизда жорий 2023 йилда кўп йиллик иш стажи учун қўшимча таътил кунларини бериш тўғрисида маҳаллий ҳужжат қабул қилинган бўлса, таътил қайси даврда берилишидан қатъи назар, бу ходимларнинг меҳнат шароитларини яхшилаш бўлади. Ушбу маҳаллий ҳужжат асосида сиз жорий даврда қўшимча таътил кунларини қўрқмай тақдим этишингиз мумкин.