ЎЗБЕКИСТОН РЕСПУБЛИКАСИ

АДЛИЯ ВАЗИРЛИГИ ТОМОНИДАН

РЎЙХАТГА ОЛИНГАН

07.06.2022 й.

N 3344-1

ЎЗБЕКИСТОН РЕСПУБЛИКАСИ

АДЛИЯ ВАЗИРИНИНГ

07.06.2022 й.

N 15-мҳ

БУЙРУҒИ

Техник жиҳатдан тартибга солиш соҳасидаги норматив

ҳужжатларни тайёрлаш, ҳуқуқий экспертизадан ўтказиш

ва ҳисобга олиш қоидаларига ўзгартириш ва қўшимчалар

киритиш тўғрисида

Ўзбекистон Республикасининг "Техник жиҳатдан тартибга солиш тўғрисида"ги Қонуни, Ўзбекистон Республикаси Президентининг 2022 йил 17 мартдаги ПФ-89-сон "Фуқароларнинг ҳуқуқ ва эркинликларини таъминлаш ҳамда ҳуқуқий хизмат кўрсатишда адлия органлари ва муассасалари фаолияти самарадорлигини янада ошириш чора-тадбирлари тўғрисида"ги Фармонига мувофиқ БУЮРАМАН:

1. Ўзбекистон Республикаси адлия вазирининг 2021 йил 28 декабрдаги 25-мҳ-сон буйруғи (рўйхат рақами 3344, 2021 йил 28 декабрь) (Қонунчилик маълумотлари миллий базаси, 28.12.2021 й., 10/21/3344/1218-сон) билан тасдиқланган Техник жиҳатдан тартибга солиш соҳасидаги норматив ҳужжатларни тайёрлаш, ҳуқуқий экспертизадан ўтказиш ва ҳисобга олиш қоидаларига иловага мувофиқ ўзгартириш ва қўшимчалар киритилсин.

2. Мазкур буйруқ расмий эълон қилинган кундан эътиборан кучга киради.

Адлия вазири                                                                     Р.К. Давлетов

Буйруққа

ИЛОВА

Техник жиҳатдан тартибга солиш соҳасидаги норматив

ҳужжатларни тайёрлаш, ҳуқуқий экспертизадан ўтказиш

ва ҳисобга олиш қоидаларига киритилаётган ўзгартириш

ва қўшимчалар

1. 1-банднинг олтинчи хатбошиси қуйидаги таҳрирда баён этилсин:

"ҳуқуқий экспертиза - техник жиҳатдан тартибга солиш соҳасидаги норматив ҳужжатларнинг қонунчиликка мувофиқлигини ҳамда уларда ҳуқуқий нормалар мавжудлигини аниқлаш нуқтаи назаридан текшириш.".

2. 17-банд қуйидаги таҳрирда баён этилсин:

"17. Техник жиҳатдан тартибга солиш соҳасидаги норматив ҳужжат қонунчилик ҳужжатларига мувофиқ бўлиши шарт.".

3. 55-банд қуйидаги таҳрирда баён этилсин:

"55. Вазирлик ва идораларнинг юридик хизмати техник жиҳатдан тартибга солиш соҳасидаги норматив ҳужжат лойиҳасининг қонунчиликка мувофиқлигини ҳамда унда ҳуқуқий нормалар мавжудлигини аниқлаш нуқтаи назаридан ҳуқуқий экспертизадан ўтказади.

Техник жиҳатдан тартибга солиш соҳасидаги норматив ҳужжат лойиҳаси қонунчиликка мувофиқ бўлса, шунингдек унда ҳуқуқий нормалар мавжуд бўлмаса, юридик хизмат раҳбари томонидан имзоланади ва хулоса тайёрланади.".

4. 57-бандда:

иккинчи хатбошидан "ёхуд унинг ўринбосари" деган сўзлар чиқариб ташлансин;

қуйидаги мазмундаги учинчи хатбоши билан тўлдирилсин:

"Техник жиҳатдан тартибга солиш соҳасидаги норматив ҳужжат у биринчи келишилаётган вазирлик ва идора билан келишилганидан сўнг, қирқ беш кун ичида қабул қилиниши керак.".

5. 61-банд қуйидаги мазмундаги учинчи хатбоши билан тўлдирилсин:

"Бир нечта вазирлик ва идораларнинг қўшма қабул қилган техник жиҳатдан тартибга солиш соҳасидаги норматив ҳужжати у биринчи бўлиб қабул қилаётган вазирлик ёки идора томонидан имзоланган санадан бошлаб йигирма кун ичида қабул қилиниши лозим.".

6. 70-банднинг "а" кичик банди қуйидаги таҳрирда баён этилсин:

"а) ҳужжат қонунчилик ҳужжатларига зид бўлса;".

Қонун ҳужжатлари маълумотлари миллий базаси (www.lex.uz),

2022 йил 7 июнь