Кадрлар бўйича мутахассис учун лайфхак: Т-2 шакли билан ишлашни қандай оптималлаштириш мумкин

Кадрлар бўйича мутахассислар ходимларнинг таътиллари ҳисобини Т-2 шаклидаги шахсий варақада, одатда, қоғоз шаклида юритишади. Бу унчалик қулай эмас – ходим корхонада қанча узоқ ишласа, қоғоз ёзувларда чалкашиб кетиш эҳтимоли шунчалик юқори бўлади. Т-2  шаклидаги шахсий варақани электрон шаклда юритиш қулайроқ бўлар эди, аммо бу ҳолда керак бўлганда ходимларнинг имзоларини олиш имконсиз бўлади.

Бундай вазиятда қандай йўл тутиш кераклигини kadrovik.uz илтимосига кўра «Норма» эксперти ва кадрлар хизмати раҳбари Валерия ЛЯНДРЕС тушунтирди:

– Т-2 шаклидаги шахсий варақани электрон  тарзда юритиш – Меҳнат дафтарчаларини юритиш бўйича йўриқнома талабларига тўлиқ мос келмайди. Кўпгина бўлимларда ходимнинг шахсий имзоси талаб қилинади, буни электрон шаклда амалга ошириш имконсиз.

Лекин таътиллар масаласида уларни  Т-2 шаклидаги шахсий варақага илова бўладиган электрон жадвалда ҳисобга олиш мумкин, деб ўйлайман. Меҳнат шартномаси бекор қилинган тақдирдагина  ушбу шаклни чоп этиш ва Т-2 шаклидаги шахсий варақа билан бирга архивда сақлаш керак.

Т-2 шаклидаги шахсий варақага электрон иловани қандай яратиш керак  

1. Кўп саҳифали Excel ҳужжатини яратамиз.

2. Ушбу ҳужжатда ҳар бир ходим учун алоҳида саҳифа очамиз (қуйидаги шаклга қаранг).

3. Ушбу ҳужжатда барча турдаги таътиллар ҳисобини юритамиз:

• меҳнат – барча иш йиллари учун (таътилнинг бир қисмини тақдим этишни белгилаш имконияти билан);
• иш ҳақи сақланмайдиган;
• қўшимча ижтимоий таътиллар (агар берилиши керак бўлса). Масалан – ўн икки ёшга тўлмаган икки ёки ундан ортиқ боласи бўлган ходималар учун;
• ҳомиладорлик ва туғиш таътиллари, болани парвариш қилиш ва ҳ.к.

4. Қуйидагиларни белгилаб қўямиз:

• ҳомиладорлик ва туғиш таътилларидан чиқиш саналари;
• бола парваришлаш таътиллари;
• таътилдан чақириб олиниши муносабати билан қўшимча дам олиш кунларини тақдим қилиш.

5. Таътиллар эвазига компенсация қаерда тўланганлигини белгилаймиз.

6. Таътилларни янгидан ҳисоблаш учун таътил давомийлигидаги ўзгаришларнинг барча далилларини қайд этамиз ва ҳ.к.

Ушбу шаклни узоқ вақт давомида юритиш  мумкин. Бу Т-2 шаклидаги шахсий варақа вазиятида имконсиз бўлганда қулай бўлиб, ишда хато қилмаслик имконини беради.