Барча ходимлар тўғрисидаги маълумотларни ЯММТга киритиш шартми ва, агар меҳнат шартномалари ЯММТда рўйхатдан ўтказилмаса, қандайдир санкциялар ёки оқибатлар мавжудми, йўқми? Мehnat.uz да ёзув бўлмаслигининг натижаси нимада кўринади?

Ўзбекистон Республикаси Президентининг 2019 йил 31 октябрдаги ПҚ-4502-сон қарорига кўра, ЯММТда иш берувчилар ва ходимлар ўртасидаги меҳнат муносабатларини электрон рўйхатдан ўтказиш, шунингдек жисмоний шахсларнинг меҳнат фаолияти тўғрисидаги маълумотларни электрон меҳнат дафтарчасида  шакллантириш ва юритиш амалга оширилади.  

Меҳнат муносабатларини ЯММТда рўйхатдан ўтказиш, ташкилий-ҳуқуқий шакли ва идоравий бўйсунишидан қатъи назар, барча иш берувчилар учун мажбурий ҳисобланади. Бундан давлат хавфсизлиги соҳасидаги, шунингдек штат жадвали маҳфий ҳисобланган ташкилотлар мустасно.

Эътибор беринг

Ходимлар ЯММТда ўз вақтида рўйхатдан ўтказилмаган ёки амалдаги ходимлар тўғрисидаги ахборот мавжуд бўлмаган тақдирда, иш берувчининг мансабдор шахси ДМИ томонидан БҲМ 5 бараваридан 10 бараваригача миқдорда жаримага тортилиши мумкин .

ЯММТда рўйхатдан ўтказилган меҳнат шартномасининг бўлмаслиги фуқаролар учун қуйидаги ҳолларда муаммоларга олиб келади:

• пенсия таъминотига бўлган ҳуқуқни расмийлаштиришда, чунки электрон меҳнат дафтарчасида меҳнат стажининг ҳисоби юритилади;
• Давлат хизматлари марказларида ёки Ягона интерактив давлат хизматлари портали (my.gov.uz сайти) орқали давлат хизматларидан фойдаланганда, чунки электрон меҳнат дафтарчаси маълумотлари бошқа давлат идоралари ва ташкилотларининг маълумотлар базаларига идоралараро ўзаро электрон алоқа орқали юборилади.

Демак, меҳнат шартномаларини Тизимда рўйхатдан ўтказиш шарт.

Меҳнат шартномасини my.mehnat.uz сайтида рўйхатдан ўтказиб бўлмаяпти. Паспорт маълумотлари киритилганда тизим жисмоний шахс топилмаганлигини кўрсатмоқда. Нима қилиш керак? 

– Бундай ҳолатларнинг 80 фоизида кадрлар бўйича ходим маълумотларни паспортни янгисига ёки ID картага алмаштиришдан олдин қилинган ҳужжат нусхалари бўйича  киритганлиги маълум бўлади. 

Ходимдан амалдаги паспорт ёки ID карта маълумотларини сўранг ва шартномани қайта рўйхатдан ўтказишга уриниб кўринг.

Агар тўғри маълумотлар киритилаётган бўлишига қарамай,  меҳнат шартномасини рўйхатдан ўтказишнинг ҳали ҳам имкони бўлмаётганлиги аниқланса, қуйидагилар орқали «Ягона миллий меҳнат тизими» ИДАК дирекциясига мурожаат қилинг телеграм канали ёрдамида ёки 71-200-70-30 телефон рақами орқали.

Янги ходимнинг маълумотларини ЯММТ тизимига киритишда «Ходим ҳозирги ёки бошқа ташкилотдаги асосий иши бўйича аллақачон расмийлаштирилган» деган хато чиқмоқда. Ходимнинг ўзи эса ҳеч қаерда ишламаслигини ва ҳеч қандай амалдаги меҳнат шартномаси йўқлигини таъкидламоқда. Ушбу хато туфайли ишга қабул қилишни расмийлаштириб бўлмаяпти. Мазкур вазиятда қандай йўл тутиш керак?

Бундай хато ходим ЯММТда (my.mehnat.uz) бошқа иш берувчида асосий иш жойи бўйича расмийлаштирилган деб ҳисобланишини ёхуд аввалги иш берувчида меҳнат шартномасининг бекор қилиниши қайд этилмаганлигини англатади.

Ишга қабул қилишни расмийлаштиришдан олдин иш берувчи ходимнинг электрон меҳнат дафтарчасини текшириши зарур. Айнан у ходим тизимда бошқа иш берувчида асосий иш жойи бўйича рўйхатдан ўтган ёки ўтмаганлигини аниқлаш имконини беради. Иш берувчи талабгорнинг тузилган меҳнат шартномаси бор-йўқлигини қандай текшириши мумкин, тавсияномада>>

Эслатиб ўтамиз

Ишга қабул қилиш чоғида ходим қоғоз шаклидаги меҳнат дафтарчасини ёки электрон меҳнат дафтарчасидан кўчирмани тақдим этиши шарт. Ходим ишга қабул қилишда яна қандай ҳужжатларни тақдим этиши кераклиги ҳақида батафсил тавсияномада ўқинг

Агар ходим электрон меҳнат дафтарчасидан кўчирма тақдим этмаган бўлса, у ўз меҳнат фаолияти тўғрисидаги долзарб маълумотларни мустақил равишда олиши ва тақдим этиши мумкин. Бунинг учун у my.mehnat.uz ёки my.gov.uz порталига кириши лозим.

• my.mehnat.uz сайтида – «Жисмоний шахс кабинети»га

• my.gov.uz сайтида – «Профиль» бўлимига ўтиш, сўнг «Карьера»ни танлаш