Oʻqituvchi va murabbiylar kuni arafasida qisqartirilgan ish kuni boʻladimi

Mehnat kodeksiga koʻra 1 oktyabr – ishlanmaydigan bayram kuni. Ishlanmaydigan bayram kunlari arafasida esa har kunlik ish, smena davomiyligi kamida bir soatga qisqartiriladi. Bu safar qisqartirilgan ish kuni faqat olti kunlik ish haftasida ishlaydiganlar uchun boʻladi.

Kadrovik.uz iltimosiga koʻra «Norma» eksperti, yurist Lenara XIKMATOVA bayram arafasida ish kuni qanday qoidalar boʻyicha qisqartirilishini tushuntirdi.

Joriy yilning 1 oktyabr kuni yakshanba kuniga toʻgʻri keladi. Ushbu kunning arafasi – 30 sentyabr, shanba. Tegishincha, olti kunlik ish haftasida ishlaydigan tashkilot xodimlari bayram munosabati bilan ishdan ertaroq ketishlari mumkin.

Besh kunlik ish haftasida ishlaydiganlar 29sentyabr, juma kuni toʻliq ish kunida ishlab berishlariga toʻgʻri keladi, chunki bu bayramdan oldingi kun emas. Albatta, agar u yoki bu tashkilotda ichki tartibda boshqa imtiyozliroq shartlar mustahkamlab qoʻyilmagan boʻlsa. Bundan tashqari, ichki hujjatlarda bayram arafasida xodimlar uchun ish vaqtini bir soatdan koʻproq qisqartirishni nazarda tutish mumkin.

Shundoq ham qisqartirilgan ish kuni boʻlgan xodimlar bir soat oldin ketishlari mumkinmi

Bayram arafasida ish vaqtini qisqartirish qoidasi 40 soatlik ish haftasidan oshmasligi uchun shanba kuni qisqaroq ish kuni belgilangan tashkilotlarda ham qoʻllanilishi kerak.

Bundan tashqari, quyidagilar belgilangan xodimlar bayram arafasida ishdan bir soat oldin ketish huquqiga ega:

• qisqartirilgan ish kuni (smena) .

Bu ularning yoshi, sogʻligʻi holati, mehnat sharoitlari, mehnat funksiyalarining oʻziga xos xususiyatlari va boshqa holatlarni hisobga olgan holda ish haqini kamaytirmasdan qisqartirilgan ish vaqti belgilangan xodimlarning ayrim toifalariga taalluqlidir:

– 18 yoshgacha boʻlgan xodimlar ;
– I va II  guruh nogironligi boʻlgan xodimlar ;
– noqulay mehnat sharoitlaridagi ishlarda band boʻlgan xodimlar ;
– ishi yuqori darajadagi ruhiy, aqliy, asabiy zoʻriqish bilan bogʻliq boʻlgan tibbiyot xodimlar, pedagoglar va boshqa toifadagi xodimlar ;
– byudjetdan moliyalashtiriladigan tashkilotda ishlaydigan uch yoshgacha boʻlgan bolaning ota-onasidan biri (vasiysi) .

• Ishlab berilgan vaqtga mutanosib ravishda yoki bajarilgan ish hajmiga qarab toʻliqsiz ish kuni (smena). Toʻliqsiz ish kuni vaqtini oʻrnatishni  MKning 186-moddasi tartibga soladi.

E’tibor bering

Uzluksiz ishlaydigan tashkilotlarda va bayram aarfasidagi kunda ish kunini yoki smenani qisqartirish mumkin boʻlmagan ayrim ish turlarida ortiqcha ishlab berish qoʻshimcha dam olish vaqti yoki xodimning roziligi bilan ish vaqtidan tashqari ish uchun normalar boʻyicha kompensatsiya qilinadi .

2 oktyabr kuni hamma dam oladi

Hamma uchun yaxshi yangilik: 2 oktyabr - dushanba kuni haftasiga besh kun ishlaydiganlar ham, olti kun ishlaydiganlar ham dam olishadi. Yangi MK boʻyicha, agar ishlanmaydigan bayram kuni dam olish kuniga toʻgʻri kelsa, bu dam olish kuni bayramdan keyingi ish kuniga koʻchiriladi. 2023 yil 1 oktyabr   yakshanba kuniga toʻgʻri kelganligi sababli, dam olish kuni dushanbaga koʻchiriladi.

Ishlab chiqarish-texnik va tashkiliy sharoitlar (  uzluksiz ishlab chiqarish, aholiga har kuni xizmat koʻrsatish, vaxta usulidagi ish va boshqalar) tufayli toʻxtatib qoʻyish mumkin boʻlmagan ishlar bundan mustasno. Bunday hollarda dam olish kunlarini koʻchirish amalga oshirilmaydi .