Qoʻshimcha ta’til kunlari dam olish kunlariga toʻgʻri keldi: хodim bunga rozi emas

«Xodimga 2023 yil 1 dekabrdan 22 dekabrgacha yigirma bir kalendar kundan iborat mehnat ta’tili taqdim qilindi, shuningdek unda kompaniyada besh yildan ortiq ish staji uchun  qoʻshimcha ikki kun bor. Qoʻshimcha ta’til kunlari 23 – 24 dekabr, ya’ni shanba va yakshanba kunlariga toʻgʻri kelmoqda. Xodim korхonamizda shanba va yakshanba kunlari shundoq ham dam olish kunlari sanalgan bunday ta’tilga rozi emas.

Biz 2023 yil 23–24 dekabr kunlari uchun qoʻshimcha ikki kunni toʻgʻri taqdim etdikmi? Bu kunlarni, masalan, 25–26 dekabrga koʻchirish mumkinmi? Agar qoʻshimcha ta’til kunlarini ish kunlariga oʻtkazish mumkin boʻlsa, bunday buyruqni qanday rasmiylashtirish kerak?»

Savolga kadrovik.uz iltimosiga koʻra «Norma» eksperti Valeriya LYaNDRES javob berdi:

– Mehnat kodeksining 222-moddasi 1-qismiga muvofiq har yilgi mehnat ta’tilining umumiy davomiyligini hisoblab chiqarishda qoʻshimcha ta’tillar har yilgi asosiy eng kam ta’til yoki har yilgi asosiy uzaytirilgan ta’tilga qoʻshib jamlanadi.

Xodimga 1 dekabrdan 21 + 2 kalendar kun davomiyligidagi ta’tilni taqdim qilar ekansiz, siz mehnat qonunchiligiini buzmaysiz.

Xodim va ish beruvchining kelishuviga koʻra хodimning ta’tilini koʻchirish  emas, balki qismlarga boʻlish mumkin. Masalan:

ta’tilning birinchi qismini 1 dekabrdan 22 dekabrgacha;

ta’tilning ikkinchi qismini – 25 dekabrdan 26 dekabrgacha taqdim etish.

Ta’tilni qismlarga boʻlish variantlari, shuningdek Mehnat kodeksining 231-moddasida quyidagi qoidaga majburiy rioya qilingan holda nazarda tutilgan: bunday ta’tilning hech boʻlmaganda bir qismi (birinchi qism boʻlishi shart emas) oʻn toʻrt kalendar kundan kam boʻlmasligi kerak.

Bu vaziyatda siz ushbu qoidaga rioya qilgan boʻlar edingiz: ta’tilning birinchi qismi yigirma bir kalendar kun (kamida oʻn toʻrt kalendar kun), ikkinchisi – ikki kalendar kun (ta’tilning qolgan qismi) davomiyligida boʻlar edi.

Ushbu muammoni hal qilishning yana bir mumkin boʻlgan usuli bor: хodim ish staji uchun taqdim qilinadigan qoʻshimcha kunlar oʻrniga pulli kompensatsiya olishga haqli, chunki bu kunlar foydalanish  majburiy boʻlgan minimal ta’til davomiyligidan oshadi  . Qoʻshimcha ta’til kunlari uchun kompensatsiya olish uchun хodimga oʻz хohishini yozma ravishda: ish beruvchi nomiga ariza yozish orqali bildirish kifoya.