Асосий ва ўриндошлик иш жойларини алмаштириш

Ходим икки жойда: асосий иш жойи ва ўриндошлик асосида ишлайди. У ҳозирда ўриндош ҳисобланган Б ташкилотга доимий асосда жойлашиб, меҳнат дафтарчаси расмийлаштирилган А ташкилот билан меҳнат шартномасини ўриндошлик шартларида қайта тузмоқчи. Бу икки ташкилотдан қайси бири меҳнат дафтарчасига ўриндошлик асосидаги жорий иш даври тўғрисидаги ёзувни киритиши керак?

Бундай ёзувни ходим асосий иш жойи бўйича расмийлаштирилган А ташкилот киритади. Мазкур ҳолатда Б ташкилот ўриндошлик асосида тузилган меҳнат шартномасини бекор қилиши ва ходимга Меҳнат ва аҳолини ижтимоий муҳофаза қилиш вазирининг "Ўриндошлик асосида бошқа ташкилотга ишга кириш учун асосий иш жойидан бериладиган маълумотнома ҳамда ўриндошлик асосидаги иш жойидан бериладиган маълумотнома шаклларини тасдиқлаш ҳақида"ги Буйруғи (АВ томонидан 2013-йил 29-январда 2417-сон билан рўйхатга олинган) билан тасдиқланган шаклда маълумотнома бериши зарур. Мазкур ҳужжатга асосан ходимнинг меҳнат дафтарчаси юритилаётган А ташкилотнинг кадрлар бўлими ўриндошлик асосидаги иш даври ҳақида ёзув киритади.