Тавсияномада:

- қайси кунлар дам олиш ва байрам куни ҳисобланади

- дам олиш ва байрам кунларида ходимнинг розилигисиз ишга жалб қилиш

- ходимнинг розилиги билан дам олиш ва байрам кунларида ишга жалб қилиш

- дам олиш ва байрам кунларидаги иш учун компенсация

- дам олиш ва байрам кунлари ишга кимларни жалб қилиш мумкин эмас

- қачон дам олиш ёки байрам кунида ишга жалб қилиш қоидабузарлик ҳисобланади

- дам олиш ва байрам кунларида айрим тоифадаги ходимларни ишга жалб этиш

- жадвал бўйича дам олиш ва байрам кунлари иш ҳақи қандай тўланади

- дам олиш ва байрам кунларида ишга жалб этишни расмийлаштириш

Қайси кунлар дам олиш ва байрам куни ҳисобланади

Дам олиш куни – бу ҳар ҳафталик узлуксиз дам олиш. Дам олиш кунлари сони иш ҳафтасининг режимига боғлиқ:

• 5 кунлик иш ҳафтасида – ҳафтасига 2 та дам олиш куни;
• 6 кунлик иш ҳафтасида – ҳафтасига 1 та дам олиш куни.

Иш ҳафтасининг ҳар икки тури учун умумий дам олиш куни – якшанба. 5 кунлик иш ҳафтасида иккинчи дам олиш куни жамоа шартномаси, ички меҳнат тартиби қоидалари (ИМТҚ) ёки смена жадвали билан, улар бўлмаганда эса – ходимнинг меҳнат шартномаси билан белгиланади .

Қуйидаги ишлардаги ходимлар (ходимлар гуруҳи) бундан мустасно:

узлуксиз фаолият кўрсатувчи ишлаб чиқаришларда;

• ишлаб чиқариш-техника шароитлари ёки аҳолига доимий узлуксиз хизмат кўрсатилиши туфайли дам олиш кунларида ишни тўхтатиш мумкин бўлмаган ишлаб чиқаришларда;
• вахта усулида бажариладиган ишларда.

Бундай ходимларга дам олиш кунлари ҳафтанинг турли кунларида навбатма-навбат ИМТҚ, смена жадвалларига мувофиқ берилади . Яъни шанба ва/ёки якшанба улар учун иш куни бўлиши, дам олиш кунлари эса ҳафтанинг бошқа кунларига тўғри келиши мумкин. Шунинг учун ходимнинг шанба ва/ёки якшанба куни ўз сменасида ишга чиқиши дам олиш кунларида ишга жалб қилиш ҳисобланмайди.